Duhoma'n ramri chinfel dan chi hnih a sawi

Lalduhoma'n Assam-Mizoram Ramri Chinfel Dan Kawng A SawiZNP president Lalduhoma chuan nimin khan an party pisaa inkhawmah ramri chungchang a sawi a; Mizoram leh Assam ramria ngaihdan inang lo chu buaipui dan chi hnih a awm tih sawiin, chungte chu inbiakna hmanga sawi fel leh, Court-a inkhin a nih thu a sawi.

Lalduhoma chuan, Mizoram leh Assam inrinaah state pahnihte'n ramri anga an ngaih a inang lo tih sawiin, "Keini'n 1875 hi kan ramri kan ti a, tan chhan ṭha tak tak document nen kan nei. Assam lamin a ni lo, ṭhiah a ni daih tawh a lawm, 1933 Inner Line hi a ni a, an ti a, ṭan chhan tur ṭha tak tak an nei ve tho a ni," a ti.

Ramri chinah ngaihdan a inan loh avangin a inhnial zawnga kal chuan insawi rem a har dawn tih sawiin Duhoma chuan, "Ramri pahnih, inang lo, ṭan chhan nei ve ve kan ni a, a indo leh a inkap zawng ni loin, kan chief secretary-te leh chief minister-te hian zanriahte kîl tlangin, cultural troupe-te nen inkawmngeihin insiam rem dan ngaihtuah se la. Tawlh a ngaih pawhin a tu lam ve ve pawh tawlh hreh loin inbiak remna kalpui se la, chu chu inremna kawng khat chu a ni," tiin a sawi.

Lalduhoma'n ramri buai chinfel dan kawng dang chu Court-a khin a nih thu a sawi a, "Court-a kan khin chuan Cachar leh Mizoram inkar nena ramri, Inner Line Reserved Forest an tih, Assam-in nasa taka an rawn luah tâk sq.mile 509 hi kan ram ngei a ni," a ti.

ZNP President sawi danin, Inner Line Reserved Forest sq.mile 509 chu Mizoram ngei a ni a, chhiah pawh Mizoram sorkarah a lut a ni. Chhiah khawn erawh chu Assam lamin an tum a, chhiah lut aṭanga 70% Mizo District Council-ah an chhûng a, 30% chu Assam lamin chhiah khawn manah an ei ve ṭhin a ni.

Innawr zawnga kal dawn chuan inbuatsaih hmasak a ngai tih sawiin Duhoma chuan, "NGO zawng zawng, political party zawng zawng, sorkar nen lungruala Boundary Committee emaw Action Committee emaw dina kan inbuatsaih a ngai a, kan inpeih hunah kan ri hrâwk mai tur a ni," a ti a; chutianga tih dawn chuan economic blockade a thlen pawha Mizoram buai lohna tur kawng zawn a ngaih thu a sawi.

Economic blockade a thlen pawha Mizoram buai lohna tura pawimawh ber Lalduhoma'n a sawi chu - Kaladan Multi-Modal Transit Transport Project (KMMTTP) tihpuitlin a ni. Chu bakah chuan, Manipur lam kawng te, Tripura lam kawngte leh Zokhawthar Land Custom Station-te puitling taka siam a ngaih thu sawiin, "Kan police-te pawh ṭha deuha kan thuam a ngai. State dangte leh Maynmar nena kan inkar kawngte hi kan sorkar neih tawhte'n an ngaihthah rei lutuk hi a pawi a ni," a ti.

Lalduhoma chuan, ZPM a sorkar chuan KMMTTP te, Manipur leh Tripura lam kawng te, Zokhawthar Land Custom Station-te chu an ngaih pawimawh dawn thu sawiin, "Top priority kan pe dawn. Kan inpeih hunah chuan kan huai ve ang," a ti a; Mizorakin a beih tak tak chuan, Assam police, hlawh thlahlela thawkte'n Mizo police, ram chhanna thinlung púte an ngam loh tur thu a sawi.

ZNP President chuan, tuna Bairabi Zophaia Mizoram police awm mekte chu chu sorkarin pawt kîr (withdraw) lo se a duh thu sawiin, "An awm hlen tur a ni. A chhak lawkah outpost an rawn din a, sikul an rawn sa a, vai biak-in an rawn sa a, kawngpui an rawn lâi a, kan ngawi mai mai vek a ni," a ti a; Zophai chungchanga Mizoram sorkar thil tih dan chu rapthlak a tih thu a sawi a ni.-Vanglaini

Post a comment

Powered by Blogger.