chapchar kut Mizote Kut zinga lar ber, Chapchar Kut chu ni 2 chhung hman a ni a, nimin khan state chhung hmun hrang hrangah hlim leh phur taka hman a ni. A hmanna pui ber Aizawl-ah chuan Kut Pa chu Home Minister Pu. R. Lalzirliana niin, Kut thlengtu chu Tourism Minister Pu John Rotluangliana a ni bawk.

Kut pa Pu R. Lalzirliana chuan, beidawng thawi damna kut ni thin kha hlimna kut, lo vah chhung zum leh hriam karah dam taka chapchar hun piputen an thleng thei chu hlim vangin he kut hi an hmang ta thin a ni, a ti a. Mihring nun hlutna tak tak tehna chu midangte tana malsawmna nih leh nihloh ah a ni a, Kut thupui “Sem sem dam dam, Ei bil thi thi” anih angin midangte dah hmasak leh midangte tana malsawmna nih tum chu mizo nunze mawi diktak chu a ni a ti. 

Mahni hnam aia hnamdang zia ngaisang apiangte nun chu belhchian a dawl lovin a chi-ri thin a, mahni hnam a chiang erawh chu an nun a nghet a, khawi hmunah pawh awmse an tlo fo thin, a ti bawk. 

CHAPCHAR KUT HMAN A NIKut Thlengtu Tourism Minister Pu John Rotluangliana chuan Chapchar Kut chu Mizo Kut hrang hrangte zinga hlut ber pawl anih thu leh he Kut ah hian Mizo thuam te bakah mizo nunzemawi chu uar taka phochhuak leh turin kalkhawm te a chah a ni.

Chapchar Kut lawm naah hian Kut Pa chu Khuallam a lo hmuah a ni a, Mizo Cultural Organisation ten Hla do an chham a, Mizo Cardinal Choir ten hawnna hla an sa a, CYMA ten Cheraw kanpui leh Costume Parade an entir a, Mizo incheina entirna hunte awmin kalkhawm zawng zawngte tan chhawnghnawh buatsaih a ni a, zaithiam taktak ten hun an hman bakah zavai chaina hun an hmang bawk. Chapchar kut 2018 lawm naah hian zohnahthlak Tripura, Manipur leh Myanmar atanga rawn kal an awm bakah hnamdang Meghalaya, Assam te leh Germany atanga rawn chhimte pawh an awm bawk.

CHAPCHAR KUT HMAN A NILungleiah chuan |huamluaia mualah Chapchar Kut ropui taka hman a ni a. Kut Pa atan Mizoram Youth Commission Chairman, Pu Joseph Lalhimpuia hman a ni a, Kut Nu atan Lunglei DC Pi Lalzarmawii hman a ni.  Kut thlengtu Lunglei YMA Sub Hqrs. President, Pu R. Lalnunthara’n hun a kaihruai a, Hlado chham, Zawipawl leh hnam lam bakah malzai te entir a ni a, UD & PA hmalaknain MUP General Hqrs. Lunglei Volunteer for Sanitation ten faina kawnga inzirtirna ni pahfawmin Kut hmanna |huamluaia mual leh a chheh vel vilin bawlhhlawh an chhar khawm bawk a ni.

Champhai-ah chuan Kahrawt Field-ah Sub-Hqrs. YMA kaihhruaiin Chapchar Kut ropui taka hman a ni a, Champhai DC charge la mektu Pi Lalsangpuii Hmar, Addl DC chu Kut Thlengtu a ni a, Pu H.Lianruma, YMA hruaitu hlun chu Kut Pa a ni. Kut-ah hian Champhai Sub-Hqrs. thuthmun huamchhunga YMA Branch hrang hrang atang te, Zomi Cultural Society, MHIP leh MUP atang tein malzai, zaipawl, rimawi tum leh hnam lam te ngaihtlaka thlirho a ni a. Mizo hnam lam pholan zingah Arsi lam, Dar lam, Buhtuh lam, Par lam, Chheih lam, Chawnglaizawn, Sarlamkai, Cheraw chi hrang hrang te ; Buhza-aih Cheraw, Kantluang Cheraw, Zonunpar Cheraw leh Zialung Cheraw te entir a nih bakah Chai-in Kut hi khar a ni.


Siaha-ah pawh District Playground, Siaha Vaihpi-ah Chapchar Kut hlimawm tak hman a ni a. MADC CEM Pu N. Zakhai chu Kut Pa a ni a, DRDA Project Director, Pu VL. Hruaizela Khiangtechu Kut Thlengtu a ni a. Siaha Distric-a School hrang hrang atangin Zirlai naupangten Pawnto hmuhnawm tak an entir a, MTP, M.CH.P., YLA, LWA, MHIP leh MGYA ten hnam incheina leh hnam lam hrang hrang an entir bakah lamthiam leh zaithiam \hahnem takin Kut hmangtu mipui zai leh lamin an awi a. Chapchar Kut Organising Committee-in kumina Padma Shree Award dawngtu Pu A. Zakia hnenah chawimawina leh lawmpuina an hlan a ni. 

Serchhip-ah chuan Leisekawt Mualah Chapchar Kut hlim taka hman a ni a, Serchhip Sub-Headquarters YMA President Pu R. Sanghmingthanga chu Kut thlengtu a ni a, Serchjhip DC Pi Sangchhin Chinzah chu Kut Nu a ni. Kut hmanna hi hun thumah then a ni a, Hun khatnaah Kut thlengtu leh Kut Nu te’n thu an sawi a, Serchhip YMA Branch hrang hranga YMA Chhangten Tlang Lam an entir a, MUP ten Bawhhla nena tlang tlirin Marian H/S naupangten Darbu an tum a, Sub-Hqtrs YMA Zaipawl ten hla an rem bawk. Hun hnihnaah zaithiamte zaiin Sarlamkai, Khuallam, Cheraw, Kalchhet kal te YMA Branch hrang hrangin an entir bakah Chhawnghnawtpui buatsaih a ni .Serchhip Chapchar Kut hmannaah hian MHIP Serchhip Sub-Headquarters ten hmanlai hmeichhiate la deh dan mual sirah an entir a, MUP ten hmanlai thiamhnang deh dan chi hrang hrang an entir bawk.

CHAPCHAR KUT HMAN A NIMamit-ah pawh GSA Playground-ah Chapchar Kut ropui taka hman a ni a, DC Pi Lalbiaksangi Kut Nu a ni. Chapchar Kut Mamit-a hmanna hun hi hun hniha then a ni a, hun khatnaah thusawi ngaithlain zaithiam an zai a, hnam lam chi hrang hrang entir a ni bawk a. YMA branch hrang hrang te Mizo infiamna hrang hrang hmangin an intihsiak a, khawpui pawn atangin Kawrthah YMA in Hnam lam an entir bawk.

Lawngtlaiah chuan DC Pisa tualah Chapchar Kut hman a ni a. LADC Chairman Pu V. Zirsanga chu Kut Pa a ni a, Lawngtlai DC Dr Arun T., chu Kut thlengtu a ni. Lawngtlai Area Baptist Choir-in Kut hawnna hla remin, MUP Sub Hqrs Lawngtlai-in hlado leh bawhhla chhamin tlang an tlir a. YLA leh MHIP Sub Hqtrs Lawngtlai te’n hnam lam chi hrang hrang an entir a, zaithiamte an zai bawk a. Chhawng hnawtin, theitui leh chhangban eiho a ni a. Hlim taka chaipui leh lam thaipui hun hmangin Kut hi khar a ni.

Kolasib-ah pawh Tumpui Playground-ah Chapchar Kut hman a ni a. Minister Pu KS Thanga chu Kut Pa a ni a, Kolasib Bialtu Pu PC Zoram Sangliana chu Kut thlengtu a ni.  Kolasib Chapchar Kut hmannaah hian MCO, YMA leh MHIP ten hnam lam an entir bakah zai thiamte an zai a, MUP-in Hla do an chham a. Tlai lamah Kut Lunglen hun hmangin Kolasib bakah Mizoram chhunga zaithiam te leh Kolasib-a Band tha te an inlan a ni.

(IPR, PTCs & Corr)

Post a Comment

Powered by Blogger.