MIZORAM JOURNALIST-TE THLAVANG HAUH - TIMES OF MIZORAM

Breaking

Home Top Ad

Post Top Ad

MIZORAM JOURNALIST-TE THLAVANG HAUH

MIZORAM JOURNALIST-TE THLAVANG HAUHInformation and Public Relations Department chuan chanchinbumite tana nodal department an nih angin Assam Police-te laka kut tuar journalist-te thla hualna leh thlavang hauhna hun chu vawiin chawhnu khan I&PR Auditorium-ah an buatsaih a. He hunah hian I&PR Minister Pu Lal Thanzara, Agriculture Minister Pu KS Thanga leh MLA Pu Chalrosanga te pawh an tel a ni. 

Pu Lal Thanzara chuan journalist-te chu mipui hriattur thil pawimawh puangzartu an ni a, mipui rawngbawl hna an thawhna tihthuanawp tur zawnga Assam Police-ten Mizo journalist kut an thlak ta mai chu pawi a tih takzet thu leh an lungawilohna pawh  Assam sawrkar hnenah ziaka a thlen thu a sawi a. Mahni nunna thapa, silai mu kara mipui rawngbawltu press mite chhuanawm a tih thu sawiin hliam tuarte a tawrhpui takzet thu he hunah hian a sawi a ni.  March ni 20 ah Mizoram leh Assam ramri chungchang sawihona New Delhi-a neih turah pawh Mizoram Chief Secretary in he thil thleng chungchang hi a thlen dawn niin a sawi bawk. 


Pu KS Thanga pawhin journalist-te laka  Assam police chet dan chu India democracy ropui tak bawhchhiatna leh ram timualphotu nia a hriat thu a sawi a. Indona hmunah te pawh chhinchhiahna kengin press mite an kal fova, vanduaina avanga hliam tuar leh thi te pawh an awm thin a, tihpalh thil thu ni lova tum reng vanga police ten chanchinbumite kut an thlak erawh hi chu Press mite zalenna rahbehna nasa tak a ni Minister chuan a ti.

Mizoram Journalist Association President Pu Vanlalrema Vantawl leh Vice President Pu Zonunsanga Khiangte te pawhin thu sawiin Minister of DoNER, Ministry of Information and Broadcasting, Press Council of India, National Human Rights Commission bakah Prime Minister hnen thlenga an lungawilohna an thlen thu leh Mizoram sawrkar I&PR Department-in Assam Police kut tuar journalist-te thla hualna leh thlavang hauhna hun a buatsaih chu lawmawm an tih thu an sawi.


Vawiin vek khan I&PR Minister Pu Lal Thanzara chuan Assam Chief Minister, I&PR Department changtu ni bawk Pu Sarbananda Sonowal chu lehkha thawnin Mizo journalist-ten March ni 10-a Zophai buainaah Assam Police te kut an tuar pawi a tih thu te, Journalist-te thil phut ngaih pawimawh sak tur leh he thil thleng avanga chan emaw, hloh emaw an neih apiang phuhruk sak tura a beisei thu a thlen a ni. 

Journalist-te thlavang hauhna programme hi I&PR Director Pu David L. Thangliana’n a kaihruai a, I&PR Secretary Pu Biaktluanga pawhin thu a sawi. Journalist hliam tuarte hi - Zohmingmawia,  The Aizawl Post; Joseph Lalnuntluanga, Zonet; C.Lalthansangi, AIR; Emy Lawbei, News 18; Malsawmdawngzela Hrahsel, Vanglaini; H.Vanlalnghaka, Doordarshan Kendra; Zomuanpuia, Zingtian leh R.Lalnunmawia, Duhlai te an ni.-DIPR

No comments:

Post a Comment

Post Bottom Ad