Mizoram sorkar leh HPC(D) an inrem

Mizoram sorkar leh HPC(D) an inremMizoram sorkar leh Hmar People's Convention (Democrat)-te chuan, nimin khan State Guest House, Aizawlah inremna zawngin inbiakna an chhunzawm a, inremna an siam.

Mizoram sorkar leh HPC(D)-te chu political level-in March 7, Nilaini khan State Guest House-ah an inbe ṭan a, nimin khan an chhunzawm leh a; nimina inbiaknaah hian inremna an nei thei ta a ni.

Inbiaknaa Mizoram sorkar aiawhte hotu Lalrinmawia Ralte, political adviser to chief minister chuan zawhna chhangin, August 2016-a inbiakna ṭan a nih aṭanga thu inchuh an neihte chu tun ṭuma inbiakna hian harsatna awm loin tlang takin an sawiho tih a sawi.


Lalrinmawia Ralte chuan, nimina an inbiaknaa inremna an siam chu Mizoram sorkar hotute hnenah thlen a ni dawn tih sawiin, "Chumi hnuah inremna atana thil ṭul pawimawh hrang hrang chu a ṭul anga bawhzui chhoh zel tur a ni," a ti a; inremna thuthlung ziah hun tur erawh sawi theih a nih rih loh thu a sawi a ni.

HPC-D thupuangtu Lalṭhalien chuan, an beisei leh duh ang ngeiin Mizoram sorkar nen inremna an siam thei ta tih sawiin, lawmawm an tih thu a sawi a; inremna an siamah lungawi lohna an neih loh thu a sawi.

Mizoram sorkar leh HPC(D)-te hi remna kawng zawngin August 10, 2016-ah official level-in an inbe ṭan a, September 2017 thleng khan ṭum eng emaw zat an inbe tawh a; September 22, 2017-a inbiak ṭumah inbiak lehna chu political level-a neih turin thu an dah a ni.


March 7, 2018 aṭanga ni hnih chhunga State Guest House-a political level-a inbiaknaah hian Mizoram sorkar aiawha telte chu Lalrinmawia Ralte, MLA bakah, Mizoram Law Commission chairman John Siamkunga, Planning secretary Dr C Vanlalramsanga, Home department 

aṭangin addi­tional secretary Lal­biak­zama, CID(SB) SP RD Chawngthu, deputy secretary R Lal-

ṭhazuala, OSD David H Lalthang­liana leh under secretary Zahmingthanga te, GAD joint secretary Vanlalmawia leh RD director Lalhriatpuia te an ni.

HPC(D) aiawhin Working chairman LT Hmar, spokesman Lalthalien, Dr John Pulamte, Lalthlamuana Hmar, David Buhril, Lalrammuanpuia, Lal­mal­sawma Darngawn, Rohringa, Lal­ven­hima Hmar leh HC Lalmalsawma te an tel. 

Post a Comment

Powered by Blogger.