Mizo Zirlai Pawl (MZP) chuan nimin khan Mizoram khawpui hrang hrangah 'Ram humhalh kawngzawh' an huaihawt a, mi ṭhahnem tak an tel. Resolution pass in, Mizoram sorkar chu Mizoram humhalh turin an phût a, "Zofate Chawlhbûk hi a ding ngei tur a ni," an ti.
Kawngzawh hi Aizawlah chuan Sikulpuikawn leh Chanmari kâwn aṭangin zawh a ni a, chawhma dar 10.30-ah ṭanin, Vanapa Hall panin an kal a, Vanapa Hall kawtah an intâwk khawmin, inkhawm buatsaih a ni.
Sikulpuikawnah chuan kawngzawh ṭan hmain MUP Gen.Hqrs. president RK Thanga'n hunserh a hmang a, MZP adviser VL Krosshnehzova'n thu a sawi. Chanmari kawnah chuan MHIP assistant secretary Lalengkimi'n hunserh a hmang a, MZP adviser C Lalrokhuma'n thu a sawi.
Vanapa Hall kawta inkhawmah Mizoram Kohhran Hruaitute Committee (MKHC) treasurer Lt. Col. Lalbulliana'n hunserh a hmang a, MZP general secretary Lalnunmawia Pautu-in Zofate Chawlhbuk sak chungchang a sawifiah. MZP vice president B Vanlaltána, Central YMA president Vanlalruata, MSU president RB Lalmalsawma, Aizawl City College Joint Students' Union vice president Zorammawia ten thu an sawi a ni.
MZP vice president B Vanlaltána chuan, Bairabi Zophaiah Zofate Chawlhbûk sak ngei an tum a sawi a, "Nilaini (March 14) hian Zophaiah khuan Zofate Chawlhbuk kan sa ngei dawn a ni," a ti. Vanlaltána chuan, vai vuak an tawrh chu ná an ti lo tih sawiin, "Kan ram venghim theitu sorkar kan nei lo hi a ná kan ti. Kan zirlaite thisen chhuah leh silai puah nghak chhuak kher sorkar kan nei hi a ná kan ti a ni," a ti.
Kawng zawhtute hi 'Mizoram humhalh ngam lo sorkar - kan mamawh lo' tih te, 'Silai mu kara Zofate chhan ngam lo sorkar - kan mamawh lo' tih te, Mahni ram hmangaih ngam lo sorkar dawizep - pawnfen fêng rawh se' tih te, 'Ram hmangaihtu police-te sorkarin an kut a phuar hi - phelh rawh se' tih te, 'Zofate thisen chhuak venghim ngam lo sorkar hi - báng rawh se' tih te, 'A fate thisen pawhin a a auh eih theih loh sorkar - kan duh lo' tih te, 'Ram leh zirlaite venghim ngam lo sorkar - báng rawh se' tihte leh, 'Mizo mipuite'n eng nge kan duh - ramri venghim ngam sorkar' titein an au rual a ni.
Aizawla kawngzawhah hian zirlai 6,000 vel an tel a; kawngzawhnaa tel mi eng emaw zain pawndum an bât a, 'Ro min relsak ang che' tih hla an sa bawk.
Mizorama district khawpui hrang hrangah pawh zirlaite'n kawng an zawh a, mi ṭhahnem tak an tel a, resolution an pass vek bawk. March 10-a Assam police nen intihbuainaa hliam zinga mi, MZP president L Ramdinliana Renthlei chu Bairabi-a kawngzawhah a tel a ni.
Kolasib-ah chuan Hmarveng Presbyterian biak-in bul aṭanga Diakkawn Square thleng kawngzawh a ni a, Mamitah chuan Charkawn aṭanga Field Veng traffic point thleng kawng an zawh. Serchhipah chuan, kawngzawhnaah mi 500 vel an tel a, AOC Veng aṭangin Serchhip Bazar thleng an kal.
Kawngzawh Resolution
- Assam state-in min nêk laia kan sorkar a muthlu hi pawi kan ti a, kan ram chhungah Cr.PC 144 an rawn puan hnuah pawh kan sorkar a muthlu hi kan dem hle a, Assam police-te'n Mizo ṭhalaite min beih lai pawha ngawi reng thei Mizoram sorkar hi kan dem hle.
- Mizoram sorkar hian ram humhalh rawh se.
- Ram leh hnam tan Mizo ṭhalaite'n theihtawp kan chhuah zel ang.
- Zofate Chawlhbûk hi a ding ngei tur a ni.
Source: Vanglaini
Images: Facebook
Post a Comment