Mizoram aiawh tur Lily Lalremkimi Darnei
Tun Pathianni khan FBB Big Bazar Mall, Guwahati-ah Femina Miss India North East State Audition neih a ni a, Miss Mizoram contestant Lily Lalremkimi Darnei chu Miss India Mizoram 2018-ah thlan a ni. Lily Lalremkimi Darnei hian Miss India 2018 Finale-ah Mizoram ai a awh dawn a ni.
Femina Miss India North East State Audition-a tel Lily leh contestant dangte hi DRC & Staff, Mizoram House, Guwahati leh Guwahati leh Shillong Mizoten an lo ṭawiawm ṭha hle a, Zonet chungkua chuan an chungah lawmthu an sawi a ni. Tun thla 19 khian Kolkata-ah Crowning neih leh tur a ni dawn a, Miss India Mizoram 2017 Rody H Vanlalhriatpuii chuan a nihna a hlan chhawng dawn a ni. Miss Mizoram 2018 T. Ramthanmawii (Thanthani) erawh tun ṭumah hian zirna avangin a tel lo a, inpuahchahna ṭha zawk nen nakkum lamah tel a tum a ni. Thanthani hi nimin khan an khua, North Khawbung panin a haw a, Champhai Vengthlang kawnah ropui taka hmuah a ni. Vawiin hian an khua a thlen beisei a ni a, Miss Mizoram kal chhuak ta Rody H Vanlalhriatpuii chuan a ṭawiawm a ni.-Vanglaini
Post a Comment