Chief minister Lal Thanhawla chuan, ramri chungchanga buaina chu thurum hmanga chinfel chi a nih loh thu a sawi rualin, a ṭul hunah chuan sorkar chu auh eih ngai loin amahin a eih mai ṭhin niin a sawi. Home minister R Lalzirliana chuan, ramri buaina chungchanga tuna hmanraw ṭha ber chu ngawih rih niin a sawi bawk.

Nimina Congress Bhavan-a inkhawmah CM Lal Thanhawla chuan thu sawiin, "Ramri hi pawl emaw, mimal emaw ṭhahnemngaihnaa senghawi mai chi a ni lo. Assam hian an ṭhenawm state zawng zawng nen ramri buai an nei vek a, pakhatmah a la senghawi lo a, thil harsa tak a ni mai thei. Tharum hmanga senghawi an tum lo a, inbiakna hmanga senghawi an tum a ni," a ti a; ramria buaina chu sawi fel chi a nih thu a sawi.


Bairabi Zophaia Zofate Chawlhbuk sak tumnaa MZP-te'n harsatna an tâwk chu pawi an tih thu sawiin, Lal Thanhawla chuan, "Buaina a awm zel lohna tur atan nizan (Ningani zan) dar 10 pelh tawhah Home Minister hriatpuinain Political Adviser to CM Lalrinmawia Ralte leh Home Addl. Secy-te kan tîr thla a, MZP hruaitute nen an inbia a. Mahse, hma an sâwn teh chiam lo a, engtin nge a kal zel dan erawh kan hre lo," a ti.

Chief Minister chuan, ramri chungchangah sorkar a awm mai mai lo a, theihpatawp a chhuah nia sawiin, "Buaina siam hmasa zawktu nih erawh kan tum lo." a ti a; remna duh pary leh sorkar an nih thu a sawi.

Nimina Congress Bhavan-a inkhawmah vêk Home minister R Lalzirliana pawhin thu sawiin, "Ramri hi keini sorkar aia ngaihtuah an awm chuang lo. Tuna hmanraw ṭha ber chu kan ngawih rih hi a ni a, sorkar leh sorkar kan inbe tur a ni. " a ti.

R Lalzirliana chuan, MZP-te'n chawlhbûk an sakna hmun chu ram inchuhna hmun a nih avangin MZP-te chu chawlhbuk sa lo tura a ngen thu a sawi a, "He lai hi kan ram a ni lo, kan ti hauh lo. Khulai ram khu disputed area, ram inchuh lai a ni a, Assam police-te leh an Forest-te'n eng emaw chángin an rawn tibuai ṭhin a, an tihbuai chuan kan police-te a rang thei ang berin kan tír ṭhin. Ramri chungchangah sorkar a muthlu lo a, a tih tur hi a la ti zel ṭhin. Tunah hian a dik tak chuan keini hi kan thiam lo zawk a ni," a ti.

Home Minister chuan, Bairabi-a chawlhbûk sak tumtute chu an ngaihtuah hle nia sawiin, "Assam police tam tak an awm a, mi kut tuar mai ni loin, nunna pawhin a tuar ang tih kan hlau hle," a ti a; sorkar hotute chuan hma an lak nghal char char thu a sawi.



Assam Chief Secretary-in Mizoram sorkarah lehkha a thawn a, chu chu Mizoram sorkarin a ngawihpui mai mai nia chanchin thara tarlan chungchangah R Lalzirliana chuan, "Status quo maintain tura tih a ni a, kan DC leh Hailakandi DC-te'n sawiho se la, tumah mahin kutthlak lo se, bûk sak tumte pawh ko kîr vek ni se tia rawtna a ni. Thu thar a awm lo a, hengte hi kan lo tih tawh sa vek a ni," a ti.

State pahniha DC-te'n inremna an neihah, ramri buai lai, disputed area chhungah a khawi lam zawk zawk pawhin kut thlak loh tur tia thu dah a nih thu sawiin Home Minister chuan, Bairabi Zophai chu Assam lam pawhin an khawih lo a, Mizoram lam pawhin hman aṭanga tun thlengin buh leh bâlte an la chíng thei reng tho niin a sawi.

R Lalzirliana chuan, ramri siam felna hun ṭha ber chu MNF leh India sorkarin inremna thuthlung an ziah dawn hun lai vel kha a nih thu a sawi a, "Ramri buai tun thlenga kan neih chhanah hian a mawhphurtu chu MNF-te hi an ni," a ti.-Vanglaini

Post a Comment

Powered by Blogger.