Mama'n football khelh a chawlhsan dawn tawh a, academy hmangin Mizo naupang tan theihtawp chhuah a tum.
Sorkar school behchhanin session thar ațangin academy hi kalpui a ni dawn a, class 7, 8, 9 leh 10-ah zirlai 50 lak a ni ang.
Professional football-a Mizo tam zawk an luh theih nan he academy hi kalpui a ni dawn.
Hre chiang duh tan Govt Aizawl High School, Republic Vengah zawh fiah theih a ni. (9862564791)
Mizo zinga professional football-a sulsutu S Malsawmtluanga chuan Mizo naupangten awmze neia lehkha leh football an zir theihna tur 'M28 Football Academy' a din a, sorkar school behchhanin session thar ațangin kalpui a ni ang.
East Bengal, Mohun Bagan leh Delhi Dynamos player hlui Mama chuan : "Mizo naupangten football kan tuipui a, zirna mumal tak erawh kan nei țha tawk lo hle a. Zirna pangngai leh infiamna inrem taka kalpui hi a pawimawh ka tih em em țhin a ni a, a hlawhtlin ngei beiseiin bul kan ţan dawn a ni," a ti.
Republic Veng khawtlang hruaitute nen thawk hovin, he academy-a kal turte hi Republic Veng chhunga sorkar school pahnih - Govt Aizawl High School leh Govt Republic Middle School-ah an luh a ngai a, lehkha zirna pangngai zawm vekin a hranpain football khelh an zir țhin dawn a ni.
School ban hnu tlai lamah darkar 1:30 ațanga darkar 2 vel Republic field-ah football khelh an zir țhin dawn a, a țul dan a zirin school kal loh niah pawh football class bik an nei bawk ang.
Academy-a lut tur hian class 7 leh 8-ah zirlai 10 ve ve, class 9 leh 10-ah zirlai 15 ve ve lak an ni dawn. Football an zirna tura an mamawhte school-in eng emaw zat a tumsak ang.
Mama chuan academy-a lut naupangte chu India rama football club lian leh hmunpui hrang hrangah vah chhuahpui a tum a, talent nei bikte phei chu hlawhtlinna changa thui tak an thlen theih nan kawng zawnsak a intiam.
"He academy-a lut naupang talent nei ţha zualte tan hmunpuia zirna ţha zawk an neih theih dan tur ka dappui dawn. Professional kawng zawh thei an awm a nih pawhin ka phak tawkin theihtawp ka chhuahpui țhin dawn a ni," a ti.
Aizawl FC tana khel mek Mama hian inkhelh chawlhsan a tum hnai tawh a, Mizote tan football-a ţangkai taka inhmang zel turin academy a buaipui zui ang.
"Kan lo upa ve zel a, player anga ka hun a tawp hnai ve tawh. Football hi Mizo mipuite tana ka ţangkaina ber a ni tih ka hre chiang a, he academy naupangte tan hian theihtawp ka chhuah dawn a ni," a ti.
M28 Football Academy hi school session thar ațanga kalpui tura ruahman a ni a, 'M28' tih hi a hmingchawiin Mama - M leh jersey number a hak țhin - 28 la kawpa phuah a ni.
He academy-a lut duh tan Govt Aizawl High School, Republic Vengah zawhfiah theih a ni a. He school Headmaster Pu Lalrawngbawla hi Mizo zinga national football match commissioner hmasa ber niin, Mama leh Republic Veng khawtlang hruaitute nen thawk tlangin hma an la a ni.
Input: Thang Khuma T-a
Input: Thang Khuma T-a
Post a Comment