Indian Super League champion Chennaiyin
Star Sports a ni a, Indian Super League final pek chhuahna sports channel hi khawvel hmun hrang hrang aṭangin mi maktaduai telin an thlir. "Mizoram aṭanga minlo thlirtu zawng zawngte, in zavai chungah lawmthu ka sawi e," tiin Mizo ṭawng a rawn ri chhuak a, Mizo tlangval Jeje Lalpekhlua thusawi a ni.
Jeje Lalpekhlua leh Jerry Lalrinzuala khelhna Chennaiyin FC chuan Inrinni zan khan ISL final-ah 3-2 in Bengaluru FC an hneh a, India rama football inelna ngaihhlut hlawh berah an champion.
Mizo tlangval Jeje-a'n goal khung lo mah se an goal thumna Raphael Augusto khung tur chu duhthusama ṭhain a siamsak a, Jerry-a'n game pawimawhah 'pressure' a zo tih pholangin Emerging Player of the Match-ah thlan a ni bawk.
Inkhel hmuhnawm
Sree Kanteerava Stadium, Bengaluru-ah final khelh a ni a, mipui 25753 an pungkhawm - mipui tam zawkin Bengaluru an ṭan a, minute kuana lekah an duh an hmu nghal. Udanta Singh-a'n mual ding lam sir aṭanga ball a cross phei chu Sunil Chhetri-a'n ṭha zetin a tauh lut a, India captain ngaihtuahna leh chet ranna chu fak tlak a ni.
Blues hlim chhung erawh a rei lo. Minute riat a liam a, Gregory Nelson corner aṭanga ball kal chu midang zawng aia zuang sang Mailson Alves-a'n ṭha zetin a tauh lut. Bengaluru-in goal khung ngei tumin Chennaiyin goal zawn chhunzawm mah se Dimas Delgado-a'n chance ṭha a hloh hnua goal khungtu chu Chennai club bawk an ni a, a khungtu pawh Alves bawk a ni. Brazilian defender hian a vawi hnih nan corner aṭangin a tauh lut.
Chawlhlawk hman a nih hnuah pawh Bengaluru aiin Chennaiyin an khelh ṭhat chhunzawm a, minute 67-naah an goal thumna an hlawhchhuah chhunzawm - Jeje-a'n goal-ah a pet tawh dawn nia a lan hnuah hmasial lo takin Augusto tan a siamsak a, Brazilian midfielder hian an goal thumna ni turin 'cool' zetin a khung.
Team vanduai BFC
Bengaluru-in point 40 hmua league hmahruaitu nichungin ISL final an lut a, mahse league-a an khelmuala an ngam loh hnu Chennaiyin bawk an ngam lo. Bangalore club tan Chhetri-a'n goal hmahruai a khung bakah hun pek belhah Miku chuan ṭha zetin a tauh lut a, harh chhuah nan erawh a tlai tawh.
Chhetri-a'n goal khung mah se hun tawp hnaih lamah goal 'ruak' ah a khung thei lo a, hnai set sawt aṭanga a tauh Karanjit Singh-a'n ṭha zeta a dan sak te chu uiawm tak a ni. Bengaluru tan Udanta goal khung chu offside vangin pawm sak a ni lo a, Inigo Calderon-a'n Nishu Kumar a tih tluk vangin Blues hian penalty beisei mah se pek an ni lo bawk.
Replay thlirin Udanta a offside tih a chiang a, Calderon-a'n Nishu a tih tlukah thutlukna pahnih awm thei niin a lang bawk. Bengaluru coach Albert Roca erawhin chhuanlam a zawng lo. Spanish coach hian rin loh takin 3-4-3 formation a hmang a, hemi chungchang hi sawi langin Roca chuan, "Formation-ah khan tihsual ka nei tih ka hria. Player leh coach-in mawhphurhna kan nei ve ve a, tun ṭum chu keima thiam loh a ni," tiin a sawi.
Vanglaini Biangbiakna
India rinrawl nih ka tum - Jerry
Jerry Lalrinzuala'n Indian football-ah a season hnihna a hmang ve chauh a, ISL nomawi a chawi nghal. Mizo rawlthar Jerry chuan, "Hmabak tam tak ka la nei a, India rinrawl ni thei turin ka bei dawn a ni," tiin chawlh mai a la tum lo.
Bethlehem Veng rawlthar chuan, "Champion nih ka beisei lo. Mahse, kan thawkrim em em a, kan thawhrim rah kan hmu a ni. Ka season hnihna chauh ni mah se mahni inrintawkna ka ngah tawh a, coach-in min rintawk bawk avangin a nuam a, ka season hman danah ka lawm thawkhat viau," tiin a sawi.
Jerry hian match 21 khelh tur aṭangin match 20 a khel a, Emerging Player of the match-ah vawi riat thlan niin Hero of the Match-ah vawi khat thlan a ni bawk. ISL-a a season hmasa bera Emerging Player of the League ni nghal thei defender hian India tan match thum a khel tawh.
Vanglaini Biangbiakna
Champion kan inring sa - Jeje
Jeje Lalpekhlua'n nomawi lian tham pasarih I League (1), Federation Cup (1), Indian Super League (2) leh SAFF Cup (3) a chawi tawh a, tun season-ah pawh ISL nomawi chawi a inrin sa thu a sawi.
Hnahthial tlangval chuan, "Season ṭantirh aṭanga kan tum ber chu champion a ni a, kan champion avangin a nuam takzet. Season dang angin player langsar nei lo mah ila kan squad a chhah tawk a, champion turin kan ṭha tawk tih hi a tir aṭangin ka hria," a ti.
Jeje chuan final thlir kirin, "Bengaluru defender te kha feet ruk chuang vek an ni a, coach ruahmannaah tlarhmaah ka maltlat bawk si. Ball kanga khelh kha kan ruahmanna a nih bawk avangin a harsa takzet a, mahse zawi zawia insiam remin hnehna kan chang a ni," tiin a sawi.
Mizo tlangval chuan, "Sawi tawh angin coach-in min ring tawk a, striker maltlat rinrawl ka nih avangin pressure a sang bawk. Goal kua aia tam zawk khung thei ka ni a, mimal bikah chuan duhthusam season tih tur a ni lo," tiin India ram striker langsar hian hmasawnna tur a la neiah a inngai.
Jeje chuan Mizo mipuite chungah lawmthu sawiin, "Kan inkhelh hma aṭangin phone call leh message tam tak ka dawng a, Mizo mipuiten min ṭawngṭaipui nasa em em bawk. An chungah ka lawm takzet a ni," a ti a, a tana ṭawngṭaite a theihnghilh lo.
Final - Lawmman
Limitless PlayerRaphael Augusto, Chennaiyin
Winning Pass of the MatchGregory Nelson, Chennaiyin
Fittest PlayerSunil Chhetri, Bengaluru FC
Emerging PlayerJerry Lalrinzuala, Chennaiyin
Hero of the MatchMailson Alves, Chennaiyin
Emerging player Ruatthara
Hmunhmelṭha tlangval Lalruatthara chu ISL khelh zawh takah Emerging Player of the League atan thlan a ni.
Kerala Blasters defender Ruatthara'n he chawimawina a dawn hma hian Chennaiyin champion puitu Jeje Lalpekhlua leh Jerry Lalrinzuala te chuan he chawimawina hi an lo dawng tawh bawk.
I League-a Aizawl FC champion puitu zinga mi Ruatthara hian ISL season khatnaah Kerala match vawi 18 aṭangin vawi 17 a khel a, vawi sarih zet Emerging Player of the Match-ah thlan a ni.
Season Awards
- Golden Boot AwardFerran Corominas, FC Goa (18 Goals)
- Best Pitch of the seasonDelhi Dynamo
- Fittest Player in the leagueInigo Calderon, Chennaiyin
- Golden Glove AwardSubrata Pal, Jamshedpur FC
- Emerging Player of the ISLLalruatthara, Kerala Blasters
- Hero of the leagueSunil Chhetri, Bengaluru
Post a Comment