mizoram election result 2018Chakma Autonomous District Council (CADC) inthlanpui vawi 10-na result puan taka seat pariat latu MNF party leh seat panga latu BJP-te chuan sorkarna inṭâwm siam an tum a; he thu ziah lai hian sorkarna siam dan turah an inbe mek.

Sorkarna inṭâwm siam an tum chungchang hi nimin khan MNF president Zoramthanga leh BJP Mizoram Pradesh president Prof. JV Hluna ten an sawi.

Zawhna chhangin MNF President chuan, sorkar siam dan turah thutlukna an la siam loh thu a sawi a, "Chief Executive Member (CEM) hi chu MDC atana thlan tlinte'n an thlang turah ka ngai. Kal dan pangngaiah chuan seat nei tam zawk aṭangin CEM chu an thlang mai tur a ni," a ti.

Zoramthanga hian nimin khan Mizo Hnam Runah thuthar thehdarhtute a kâwm a, CADC inthlana vote chhiar zawh takah party mala sorkarna siam thei an awm loh thu sawiin, "Congress chu tun hma aṭanga 

ṭha kan tih loh a nih avangin kan thawhpui thei lo. CADC-a sorkarna an siam laiin an record a chhe hle," a ti a; Congress tel lohna sorkarna siam turin an inbuatsaih thu a sawi.

BJP hotute'n sorkar inṭâwm siam tura an inpeih thu an hrilh tih sawiin MNF President chuan, "BJP-te hi NDA-a kan thawhpui an ni a... NDA-a kan la thawhpuite hian sorkarna siampui ṭha an ti a, chuvangin, sorkarna siam dan tur kan ngaihtuah mek. Election-ah chuan BJP nen a hranpa ngatin kan chuh a ni," a ti.

Zoramthanga chuan, CADC-a an seat lak zatah lawm viau mah se, an beisei, mahnia sorkarna siam chu an tlin loh thu sawiin, "Eptu party, sum lama pachhe em em kan ni chunga seat la tam ber kan ni thei hi kan lawm hle. Inthlan result hian Chakma unaute pawhin Congress an duh lo tih a lantir a ni," a ti a; CADC inthlan result chuan inthlan lo awm leh turah nghawng thui tak a neih tur thu a sawi. 

Vanglaini palai zawhna chhangin Mizoram BJP president Prof. JV Hluna chuan, CADC inthlan result-ah an lawm thu a sawi a, "Beisei erawh kan phâk chiah lo. Assam CM leh Delhi-a BJP general secretary nen kan va kal ṭumin, mipui an lo tam khawp a, seat zawng zawng lak theih hial kan inring a ni. Kan beisei pha lo mah ila, result lawmawm takah kan ngai," a ti.

Prof. JV Hluna chuan, result puan hnuah Congress-in sorkar inṭâwm siampuiah an sáwm nia sawiin, "Delhi-a hmarchhak BJP bialtu ka bia a, Congress min sawmna ka hrilh a, mahse, ani chuan Congress nena thawh dun a remti lo. Pu Zoramthanga a biak nghal tur thu leh MNF nen thawh dun tur a nih thu min hrilh," a ti a; an hruaitute thu anga MNF nen sorkarna an siam tur thu a sawi.

Mizoram BJP President chuan, MNF an chet ṭhat chhan chu, Congress party president Lal Thanhawla Chawngtea a kal ṭumin mipuiin an lo lâwm lo a, 'MBBS seat min chhuh­saktu,' tih te, 'Kan minister min bânsaktu' tih banner-te an lo ken khum niin a sawi a, "Pu Lal Thanhawla tihngaihna hre tawh si loin, BJP chu hlauhawm taka puhin, BJP ai chuan MNF vote turin mipuite a chah ta ringawt a, hei hian nghawng a nei ve a ni," a ti.

Congress Legislature Party treasurer Zodin­tluanga chuan, inthlana a hma aia an chêt chhiat chhan chu, Governor-in inthlan dawna CADC sorkar a ṭhiah vang a nih thu a sawi a, "CADC sorkar ṭhiahna chhan tur Governor-in a zawng a, kha kha kan tuar a ni. Hmingchhe deuhin kan awm a, ṭhiah a nih hnu lawkah vote thlak a ni a, khawpuiah seat kan hloh phah a ni," a ti. 

BJP thawhpuia an sàwm leh sàwm loh zawhna chhangin, "Result puan zawhah kan meeting nghal a, engmah thutlukna kan la siam hman lo. CLP hruaitu turte kan thlanpui a, an kal zel dan turah chuan zalenna kan pe ve ang chu," a ti a; mimal anga BJP dawr an lo awm a nih chuan an hriatpui loh thu a sawi. -VANGLAINI

Post a comment

Powered by Blogger.