RII & HAWLA INTER VILLAGE FOOTBALL TOURNAMENT HMAWR BAWK A NIChamphai District Football Association (CDFA) buatsaih Football team 30 telna, Champhai District chhunga Fotball tournament ngaihhlut hlawh leh lawmman keng tam ber Rii & Hawla Inter Village Football Tournament-2018 chu vawiin khan zawh fel a ni. Final Chhangphut Field, Champhaia neih hi Champhai District Bawrhsap Pu Vanlalngaihsaka chuan a telpui a ni.

April Ni 4, 2018 atanga khelh tan football tournament hmawr bawkna Final hmuhnawm takah hian Hnahlan VC Team chuan 3-2 in Kanan VC Team an hneh a ni. Champhai District Bawrhsap Pu Vanlalngaihsaka chuan Champhai District thalaite hmangaia ram hruaituten football tournament an buatsaih thin chu lawmawm a tih thu a sawi a. Football tournament ngaihhlut tak a nih avangin District thalaite a fuih phurin football-ah hmasawnna a thlen a ni, a ti a.

Final khel tur team pahnihte chu infiammi thinlung pu chung zela theihtawp chhuah tur in a fuih a. Chak zawk nih pawhin lawm dan tawk thiam tur leh chak loh palh pawha tuar dan thiam turin a chah a. Final hmuhnawm tak mipuite hlui sak turin duhsakna a hlan nghal a ni.

Lawmman dangte pawh sem chhuah a ni a. Lawmman dawngtute chu Fair Play Award- Kanan VC Team; Best Referee- Jonathan Lalngaihawma; Top Scorer- Zosangliana (11 Goals) Tlangsam VC Team; Best Player Zoremsiama Chhangte, Hnahlan VC Team-te an ni. Champion team hian pawisa fai cheng nuai khat leh trophy an dawng a. Pahnihnain pawisa fai cheng singnga leh trophy an dawng a. Semi Finalist team Vengthlang North VC team leh Zotlang VC Team-I ten cheng sing khat ve ve an dawng a. Fair Play Award-in cheng sing khat dawngin heng bakah hian Top Scorer, Best Referee leh Best Player-ten cheng sangkhat theuh an dawng bawk a ni.-DIPR

Post a comment

Powered by Blogger.