Mizoram sorkar official state partner Innovations India Advertising & Events Pvt. Ltd. chuan Mizoram-a an Brand Ambassador atan Miss Mizoram 2017, Rody H. Vanlalhriatpui chu inremna an ziahpui ta. Inremna hi Innovations India Managing Director Captain Rahul Bali leh Rody ten April 17, Thawhlehni zan khan Hotel Floria-ah an ziak a ni.
Captain Rahul Bali chuan, “Brand Ambassador atana Miss Mizoram 2017 - Rody H. Vanlalhriatpuii inremna kan ziahpui thei hi ka lawm hle a ni. Ani hi Mizoram aṭanga Miss India Pageant-a 'Miss Talented' sub-title la thei awm chhun a ni a, India leh khawvel hriata Mizoram mawina leh danglamna pholang thei turin a ṭha tawk a ni. Mizoram mawina hi tun thlengin khawvel hriatah pholan a la ni lo a, ami chengte nen lama khawvel mit hmuha phochhuak thei turin Rody-i te nen hian hma kan la ho dawn a ni" a ti.
Innovations India Brand Ambassador thar Rody H. Vanlalhriatpuii
Rody-i pawhin Innovations India nen inremna an ziak thei chu lawmawm a tih thu sawiin, Mizoram tan theihtawp chhuah a tum thu a sawi. Rody chuan, "Innovations India-in ka chunga rinna nghata Mizoram Brand Ambassador atana min ruat hi ka lawm hle a, phu loh chawimawina a ni. Theihtawp ka chhuah dawn a, Brand Ambassador ka nih ang ngeiin Mizoram tan thil ṭha hnutchhiah ka tum a ni" a ti.
Lawngtlai nula Rody-i hi India leh khawvel huap pawha Multinational Company-in Mizo zinga Brand Ambassador atana a ruat awm chhun a la ni. Innovations India thil tihah ram chhung leh pawn thlengin Mizoram aiawhin a penchhuak ṭhin ang.
Innovations India Managing Director Rahul Bali hi tunah hian Aizawl-ah a cham mek a, April 20-21 chhung hian Mizorama Global Business Meet and Convention lian ber tur “MAGNETIC MIZORAM INVESTORS SUMMIT” a buatsaih dawn. He hunah hian Mizorama sumdawnna la kalpui loh thilte tarlan a ni dawn a, investor te hipluhna tur te tarlan a ni bawk ang. -VANGLAINI
Post a Comment