~David Sailo
1. KAWNG LEH KAWNGKAM -
Durtlang, Sairang, Zemabawk, Saikhamakawn atangte hian an lut tlangpui. Aizawl i lut țan tih i hriatna tur chu i lirthei chuanna chu a kal muang tawlh tawlh anga, in tawlh zeuh zeuh țan der ang. Kawng sirah chuan nula chhe lo ve tak tak sam buang ngat i hmu țeuh ang. "Aizawl nula ho hi chu awww" ti ringawt suh. Thingtlang nula tho an ni thei, an hriat hran vak loh. In inkar Step chep deuh deuhah leh kawng sira Rawksai Bag dum ak an lo awm nual chuan zu dawr a awm hnaia zu la tur an ni tih hria la, hmeichhia i hmu nual ang. Mak ti suh mipa leh hmeichhia hi khawiah pawh an inzat deuh vek zu nia !! In tlan zel anga Traffic Police i hmu ang, ding tura zaizira a lo nam din hnu chiah ah chak lutuka tlan turin a hui nghal ang che u, heipawh hi mak ti suh Driver te hian an thiam tawh lutuk. Petrol Pump ni si lo Petrol kan zuar tih i hmu thluah bawk ang.
Kawngkam maiah chuan Kawngkam College leh Director meuhin a awp Office, a țhen chu Building thar tak tak, a dawr tute chu sawi loh thawktu leh zirlai te tan pawha lirthei dahna hisap miah lo, Zirna in ve riang ruang si thingkung pakhat pawh neilo te i hmu ang. Khawpui dai deuha thawl tha taka awm aia hmun laili taka han Office nuam ti tlat te thawh rah a ni tih hria la, i chuanna lirthei lir leh zeuh zeuh thin kha a chhan pakhat a ni tih i hre nghal dawn nia. Kawngkamah chuan dawr nei ten huam hauh takin "Dawr tute tan chauh lirthei hun phal" (Customer only)tih an lo tar fer fur ang. An hunna kawngpui kha an dawr zawn a nih avangin an ta a nih loh zia leh kawng atanga 3ft vel hi nawr tawm zawk theih an ni tih hria la, nui tet tet mah la a pawi lo.
In insi khup mai, tukverh hawn theih loh ve ve in thenawm i hmuh te kha Pathian ni a Biak In khata inkhawm ho thin an ni tih hre tel bawk ang che. An insakna bak an ram chin fanghmir bawk pawh a awm tawh lo. Kohhran Upa in te a ni duh viau bawk. "Ui a awm fimkhur rawh" tih intar i hmuh nazawng ah khan ui a awm lova, ui aia hlauhawm zawk nu ancheh pui pui thlun ve si loh an awm thin a, fimkhur ang che.A țhenin kawng an lo siam mawlh mawlh anga a țhenin an lo lai chhe mawlh mawlh bawk ang.
Mihring i hmuhte chu an hmanhmawh em em vek anga, inchuh Policy, Taxi chuan thlengin an inchuh dawr dawr i hmu thei ang. I chuanna atang chuan i chhuk a hun phawt. I Bag nen Taxi i han pan a, an Welcome tha khawp ang che. Țawngkam tha takin an charge țeuh mai ang che. An ti ti siam siam a, i va ti to ve tih a nuam tawh miah lovang.
2. BAZAR LAMTLUANG -
Sumdawng Motor Part zuar atanga chawhmeh zuar thlengin 80% chu hmeichhia an ni tih i hmu ang. Mipa aiin hmeichhia sumdawnna ah an laktlak zawk a, kan hmatheh zawk tih i hria ang. Sazawrhna ah chuan nu ho hlir i hmu anga an sah țhelh ngailo, a hmuhnawm a, thlir rei suh an auin an pawt luai luai mai ang che. An chem te chu pa tahsak reng an ngai lova nu valai tak tak chuan lung tat in an hru hauh hauh reng a, pa tam tak aiin chem an nei hriam zawk a, Kg 1 chiah an satthla thiam a nia aw. An pasal ten eng tak thawk ang maw? I ti rilru, kan hre bik lo aw.
Dawr nghaktu atanga an michhawr thleng chuan hmeichhia deuh vek an ni a, chawhmeh zawrhna lamah chuan țhu Senior tawh tak tak i hmu anga, an țhut pui te nen hian an chan țhatna tur chuan in hauh erh pawh pawisa lo an awm. Dawr fimkhur ang che.
Veng tinah leh Vanapa Hall bul velah chuan ualau takin Pump atanga a tlawma Petrol an lei an zawrh chhawnna i hmu anga, an ngampa, an hralh thei bawk. Zu Dawr atangin a tlawma lei chhuak a, zuar chhawngte erawh chu an ngampa ve lova, an man fo thin thung. Aizawl tih dan ah ngai mai la i hah dam viau ang.
Tlai lamah chuan Taxi chuan in chuh a dingkhawm tuau tuau i hmu nual anga, veng tlabirh deuh, ITI, Bethlehem Vengthlang, Edenthar, Zonuam etc an ni ang. Tam tak chu hawna remchang lo tih hre renga muangchang hle te an ni hlawm thin a, chuan man an duh tlawm thei hle lawi a ni. Heng veng te hian Aizawl hmun laili chuang chhuak tur chuan an kal ve vang vang a ngai ve tho a nia.
Kawngsir ah chuan Traffic Police emaw Police pangngai emaw i hmu nual anga, engtin nge a tlin theih i tih rilruk khawpa pa tawi mangkheng pawh i hmu ang. Ngaihtuah buai duh suh tih tlin an ni diam tawh. Lirthei chep tak karah chuan VIP motor hmanhmawh em em, tihngaihna tak awm chuang lo pawh i hmu thut maithei, VIP nihna Show chak viau pawhin tih vak ngaihna a awm bik lo a ni.
Vantlang zunin leh Side-drain ah chuan A senchi umruak a in tung fur bawk ang.
3. ZAN LAM HUN -
I thlenna vengah pawh chuan zan lamah veng laili laiah JAC Office, Carrom Board an pen dar darna hmun i hmu ang, Zu ber phalna neiin an zuar tawh a i ti rilru mai thei, Mizo Local zuara in tungnung ve hram hram mi rethei zawkte man a, hnawtchhuak thin tute an ni. I lut ve a hnai takah i va thu ve a nih chu zu rim nam ve tha tha bawk i hre thei mai thei. Ruk ruk thil leh khawtlang venhimna ah chuan an la thawhhlawk viau a nia.
I cham chhungin zankhua emaw nilengin emaw inthlenna vengah Current(Power Supply) a awm lo maithei a, khawpui berah pawh tiin mak ti lovang che. Hetiang hian chumi KV Sub-Station chu siam a ni dawn a, Nileng/Zankhua in Current a awm dawn lo, an ti fo a, siam a ni tak tak nge, hetianga nileng lenga Off ngaia siam ngai fo mai hi Aizawl mite pawhin an chhut peih tak tak bik chuang lo a nia.
Zan a rei poh leh zurui țawng i hmu hnem ang. A țhen chu mi dawr kawta mu ringawtte, țhu kun lup mai te, heng hi khawpui zia a ni maw ti ve mai rawh. Lirthei in pelh țhat duh loh vanga in vin tuarh thawmte, Scooty khalh tlu thlawrh te i hmu ang. Heng hi ngaia neih vek tawh a ni.
4. SUNDAY -
Sunday i cham hlauh chuan inkhawm la, a hma kara Jeans Kekawr tight mangkheng, chhungte puihna lo chuan a phelh theih lovang aa ti a i ngaihtuah te, kekawr țet pawr fep fup mal them lang huai huai a khawlaia kalte, kawr awm zau tak ha te, Bazara lo in hau erh te, sam rawng leh sam tih dan maksak puipuite, Taxi a zu nam ru thar thar i chuanpui te, Setana betu an tihte kha an nih ngei dawn hi i tih rilruk te kha puan nalh tak tak bihin necktie sin zit zet awrhin Biak Inah i hmu țeuh mai ang. A then chu Zaipawl zai mekah chuan i hmu nghal pang bawk a.
Biak In kawtah chuan dawrte a lo awm anga, kar tluanin an hawnga Sunday Close ti mahse an khar phui vek lo. Kawngka pakhat an hawng anga, an in hralh hem hem tho ang. Inkhawm bangte chu in Line ngai dawn khawp khawpin chu dawrte ah chuan an in hawr tuau tuau i hmu thei ang. Țhenawmte nen inkhawm tur an in zui ve duah duah ngai lo. An kal fel nalh nalh mai a ni.
5. THLEN INTE -
I thlenin ah chuan zinglamah chaw ei in tlem viau dawn tih hria ang che. Naupang School kal an awm chuan an ei hmasa ber anga, an kal felah nangmah tiamin nu leh pa te nen in ei ang. Khawnge an nula/tlangvalte an zing chhuah a ni maw ti hu hu suh. An la mu. Nakin deuhah an rawn tho anga, choka Gas hunna velah Plate/Bowl ah chaw chawiin chawhmeh bel hawlhin chaw an ei ruk ruk ang. Hman hmawh em emin Class kal tur emaw chhuak tur emaw in an insiam zui nghal ang.
Zanah Sitting Room nuam deuh ah chuan chhungkua an țhukhawm ngai meuh lova, ngawi rengin an inpel thuak thuak anga, mahni Room ah an tawm fur mai ang. Men chhung reilo te in neitu nu leh pa te chuan TV an enpui che a nga, inriahna tur Room an kawh hmuh che anga, an ham bui bui anga, Room ah an luh san daih ang che. An la muhil teuh lo a nia. An ui i chul i chul tawh anga, i mu ve thei mai ang.
6. HAW NI -
Party Office thenkhat haw paha i kal pelh hlauh chuan Pathian thu an lo sawi piap piap ang. Khuangte vua in Camping a awm emaw ti suh. Aizawlah chuan Theologian ten Politics an sawi a, Politician ten Pathian thu an sawi thin. Petrol Pump ah an lo in Line put chuan Phai lamah buaina a awm hnai turah dah tawp la i ti sual lovang..
Aizawl dai i thlenga Țawngtaina hmun atang chuan in tlan leh ta par par tawh mai. Kawng erawh a chhia a nih kha...
Post a Comment