KHAWPUI KOHHRAN DINHMUN-II (Constructive Criticism)

~ David Sailo

1.PA HO PAWL -

Kohhran a hran angin an pawl hming pawh a in ang lo. An phur thei hle a, hla zir leh Member intlawh an taima phian. An inkhawm tur hi Cotton Jeans ha in Kamis ban bul nen a inbilh ve zaih a, inkhawm ban kawngah chuan Kamis kawrkilh chunglam phelhin kawrâwm hawng huaiin, kawrh bilh chhuak phungin an haw a, kuhva an eisen hman hle tawh thin. A țhing rim nam ham ham pawl pawh an awm ve țhin. Zu in leh zauh thinte pawh in en hrek hrekna a awm ve lova, a zalen phian thin. Henga inhmang tharte avang hian an nupui inkhawm thlahdah ve tak te pawh pasalte avanga chhangchhe bawra inkhawm kawng zawh phah an awm bawk. Pa ho hi inkhawm banin biakin kawtah an ding hual tuau a, zial an zu khu hluah hluah thin. Committee/Rorel an awlsam thin hle bawk.

2.NU LÃI -

Nula Senior, Thalai pawla Over tawh leh naupang taka pasal sunte, Kohhranin Naupang zirtirtu pawha a chhawr ve lem loh te hi an lai duh viau. Nu ho pawla tel an peih chiah si lo, Thalaiah an Over tawh bawk si. Inkhawm tur hi an nalh thei hle a, Kohhran ah an phunchiar lo hle a, an vei ve tak tak peih bawk lo. Mawhphurhna chhete pawh pe se tha taka hlen an duh thin. An inkhawm bang te hi haw tlang mai lovin an zawlpui deuh tu emaw inah an awmkawm tel tel a, an fate chanchin an sawi ho thin. An kawr thar neih a rual țum chuan thla an la ho leh ringawt bawk thin. Sunday bak hian an inkhawm peih meuh lo a, țhutna tur pawh an lai viau thin.

3.NAUPANG -

Sunday School a 'Zirtirtu' kan tih mai thin kha 'Miss/Sir' tih hi Kohhranah kan chhawm luh tir mek a, a pawi ngawt mai. An zirtirtu ten an kaihhruai dan hian kawngro a su hle. Worship Dance awmzia phawk chhuak si lovin kan zirtir a, naupang tete mipa leh hmeichhia inkawpin kan lam tir a, puitling zawk kan lo lai lek lek fo mai. Tleirawl lian ve deuh tawhte pawnfen chhing tak tak nen kan lam tir a, Upa ho phei chuan an thlir tha ngam mang lo. Kohhran Hall emaw a tih chi awm tak tak hi Biak inah kan tih tir leh tlat thin. Sunday School kai kim hi intih hmuh ah kan nei a, a tha viau. Kaikim ngawr ngawr an rilru ah kan tuh sak erawh hi chu Sunday School awmzia anmahni ah a phawk chhuak lova, kum 10 kaikim tawh hnu ah pawh mi hnawksak takah an chhuak leh thei tlat hian kan Product that tawk lohna a pho lang. Nu/pa te pawhin zirtirtute tih sual palh vanga an fate kaikim lova lo chhinchhiah palh vanga hmai sen țawn țawna Complain duh kan awm ta.Kan tum ber hi a hriat a, kan tum ber tawk ang zelin kan țhanglian mai chu a nih hi.

4.KOHHRAN HMEICHHIA -

Kohhran hmeichhia a inhmang Active tak, Thlarau mi taka lang thenkhat hian an pasal Officer te hi an piangthar tha viau ang tih an hlau zawk lek lek emaw a tih theih. Kristian chhungkaw din thei lo deuh țhiau in din turin kan han in fuih țhin a ni a, a tla na mawh hle zawng a nih hi. "Nangpawh" an tih hlau zek zek chungin hruaitu ni siin dawih aw takin Kristian chhungkua an vahchhuah pui thin. Pathian thu hi 'SAWI' a tan chauh a duh tawk hi a tam zawk an ni. An sawi hluah a, an lengkhawm a, an sawi ho a, an fate chuan an ngaithla peih der si lo. Chhung inkhawm an hman te hian fate nin an hlawh em em mai hi engemaw lai tlak balna chu an nei a ni. Țhalai angin changkanna hian a ei chhe nasa ve hle a, an awmkhawm titi chu in changkan siak, in hriat țhat siak reng rengin an khat thin. Khawpui nu ho finna chu an lungawi lohna leh an eiloh zawng an thup thiam em em hi a ni. In chhung dungah an thlavang an tawnga an rel bawrh bawrh te hi hmaichhanah chuan lem takin an nuihpui har har thei zel. Inti changkang takin New Year Cake, Easter Cake etc tuihnai tak tak an lei a, an kuah haw țun țun a, inah eipui tura lawi an nei ngailo thung.

5.THAWHLAWM -

Thawhlawm ah kan țhang hle. Upa ho nuih rinna ber leh lawmna ber pawh Testimony sawi tur an awm emaw piangthar an awm emaw a ni lo, Sawma Pakhat a luh tam țum leh Target khum hian a ni. Thawhlawm khawn chuan kan vak taima hle a, Thlarau bo zawng erawh chuan kan kha a chih a, kan khup a zawi thin. Sawma Pakhat pe thate chu a dak vah a, nihna neisa lo mahse Committee in chhawrna tur an zawng chuk chuk thin. Kum khat chhunga Pathian Ram pek dan chu Kohhran thenkhat chuan Biakin Notice Board ah tarin chhungtin hnenah chhungkua zawng zawng pek dan an sem bawk thin !!! Lei lama lawmman hmu zo tawh an tam anga, pek tlem vanga zak ngawih ngawih chhungkaw engzat tak siam ang maw!!

School Result chu mahni Report Card chiah kan dawng a, midang Report zawng zawng kan hmuh sak ve lo. Kohhran berah erawh chuan mi chhungkaw Pathian Ram pek dan zawng zawng nen in hmuhsak vek hi țul ti pawl an awm vangin hrehawm ti tak tak an awm. Pek lama teh ve lo, kan la kawl zat lam atanga teh thin tu Pathian ngaihdan hi eng tak ni ang maw.

6.BUILDING -

Biak In sa zo thei aram kan awm lo. Kan sa reng mai a, kan siam reng a, kan zawng chawp a, Bulding Committee a ding reng bawk. Duh thala kan sak zawh meuh chuan a thar sak leh kan duh a, kan nawr chim leh rum rum thin. Biak In sak danah duhdan/ngaih dan a ruak lova, hruaitute pawh ti tau mai mai pawl an awm thin. Biak In chhung, Hall, Choka leh inthiarna kan chei zo thei lo. Kan khawng țhiat a, kan ti tha reng mai chu a ni. Pawisa a awm tih a hriat.

7.EVANGELIST -

Evangelist rawih dawnin khawi veng nge, eng ang chhungkua nge, lehkhathiam a ni em? kan hre sa vek thin. Evangelist mai a ni lo inkhawm dawn reng rengin 'Zanin tu hun nge?' tih kan ching a, thusawi aia a sawitu lamah kan buai zia a chiang hle. Tunhma anga Evangelist huaisen, Kohhran hruaitute dik tawk lohna pawh huaisen taka sawisel ngam ang kha an awm tawh mang lo. Tunah chuan an thusawi pahin Upa tlar a mitsir ralh ralh a, Pathian aiin Upate lawm loh zawng sawi palh an hlau tawh zawk. Evangelist ah pawh mahni lawinaa Upa ni pha chin chu an inla ve leh zel a, Sermon 10-15 vel bel taka vawn an nei a, an sawi kual chhawk ve mai mai bawk thin. Sermon thar dawnglo tak tak an tam ve mai. Kohhranin an rawih tawp zanah in tihtheihna rawngkai lek lekin an Programme leh pek tur an sawi țeuh a, a mawi zawngin țawngtai pui turin an sawm zui thin. An rawngbawl tawhna Upa/Kohhran chanchin hmusit rawngkai lek lek a a nihna aia phuah belh hret a sawi an thiam hle bawk. Evangelist ah hian chhuan tur neilo, nupuite pawh engmah ni chuanglo te hi mahni engmah thawklo nupuite Sorkar hnathawk Evangelist te aiin an Nung duh viau zawk.