-Dr. C. Lalrampana
A KAMKEUNA:
Hotea in lama mahnia inenkawl dan tlem tarlang ila, a vaia vawi khata hman rual thup thin tur tihna erawh a ni lo. Allopathy pawh Generic thuhmun Brand hrang hrang a awm ang hian a damdawi hi chihrang hrang a awm ve a; a engemaw ber hmang la, I ngeih ber awma I hriat thlang mai rawh. Doctor leh damdawi in chhawr pha ve lo Zokhaw lama chengte leh a chhawr pha tan pawh mahnia tih theih maite a nih avangin hman tangkai tum thin ang che.
ENGTE NGE THA CHU?
1. NIMBU & CARROT:
Nimbu tui fir leh Carrot tui (juice) siamchawp thar lam tak zat leh zata chawhpawlh nitin zingkarah thirfian lian khat in thin a tha.
2. ALU:
Alu pum khat silfai la, a kawr kheh lovin pante tein zailep la, Rialno khat tui vawt thianghlimah zankhuain chiahin chhin tha la, a tuk zingah I kaw ruah lai takin in ziah thin a tha.
3. PURUNVAR: Purunvar mum khat Sapsaum (Butter) tela kan ro a tel chawpa ei/in thin a tha.
4. CARROT TUI: Carrot tui (juice) siamchawp thar lam tak leh Apple umtui (Apple cider vinegar) inzata chawhpawlh thirifan lian 1 tuktin kaw ruah laia in thin a tha.
5. CHHAWHCHHI: Chhawhchhi dum chi thirfiante 1 rialno chanve tuivawt thianghlimah zankhuaa chiahin chhhin tha la, atuk zingah kaw ruah laiin a zavaia in/ei thin a tha.
6. PURUNVAR HLANG:
Nitin purunvar mum 2-3 kheha ei thin a tha. Hei hian ruh na a chhawk bakah thisen kal vel a siam tha nghal thei bawk.
7. SAWHTHING: Sawhthing pante tea zailep ruh chuktuah na laiah bela tuam hnan a tha a, tin, sawhthing tuisaah puanthem chiaha a na lai deh thin a tha bawk. Sawhthing ei erawh ruh na leh Thana tan a tha lo thung.
8. COCONUT TUI:
Nitin Coconut tui no 3-4 in thin a tha
9. KHAWKHERH: Khawkherh (walnut) pa 3-4 ei thin a tha.
10. LAKHUIH TUI:
Nitin lakhuih thei tui sawr chawp ngei rialno1 in thin a tha.
11. TUILUM:
Tuilum rialno 1 ah khawizu fir thirfiante 1 leh thakthing powder thirfiante ½ chawhpawlh nitin in thin a tha.
12. GREEN GRAM:
Tui rialno 1 ah green gram soup thirfiante 1 leh purunvar mum2 rawtsawm telh nitin vawi 2 in thin a tha.
13. SAWHTHING & CASTOR:
Zantin mut dawnah Sawhthinga siam thingpui rialno 1 ah castor hriak thirfiante khat chawhpawlh in thin a tha.
13. TUILUM & AIENG:
Tuilum rial no 1 ah Mizo aieng dip thirfian 1 telha nitin v2 in thin a tha.
14. GUGGULU: Nitin vawi 2 chaw ei khamah Guggulu hnah chhum tui thirifante ½ tuilum rialno 1 ah chawhpawlha in thin a tha.
16. CHHAWHCHHI & SAWHTHING: Chhawhchi tel rialno 1 ah sawhthing tui fiante 1 leh hmarcha tai pum 1 chawhpawlh uluk taka chawh ban hnuah a nalaiah hnawih thin a tha.
17. SAPSAUM: Sapsaum thei (Avocado) hnah chhum tuiah puanthem thianghlim chiahin ruh chuktuah nalaiah tuktin leh zantin deha zut thin a tha.
17. TUIAL: Tuifinriat al (iodine) tamnaah nitin inbual thin a tha. Tuifinriat chhawr pha ve lo tan tuilum al lep lep chi al hmanga inbual thin a tha a, a nalai tuilum chi ala deh thin pawh a tha bawk.
A TLANGKAWMNA
Heng tarlan bak pawh hi mahni inenkawlna chihrang tam tak entir nan-physio therapy, massage, magneto therapy, acupuncture/acupressure etc. a la awm teuh a, sawi vek theih a ni lo. Khingte khi chhawr tangkai tumin tan la la, sumsen a tlem a, a awlsam tlangpui bawk. Zokhaw lam unaute leh Doctor pan ve thei lote tana thahnemngaia kan ziah thin hi thenkhat a dodal zawnga comment pe leh maksak pui puia comment pek ching hrim hrim an awm thin a; mahse, hengte hi khawvel tifamkimtu tho an nih avangin ngaihthiamna leh enremna nen kan dawh thiam a pawimawh hle. Tihsual palh tam tak a awm thei a; a chhuanchhe zawng leh mualpho zawnga comment pe mai lova infinchhuah zel hi dawnsawn a nuam hle thin tih hre reng ang che. Mite tana malsawmna nih tum theuh ila malsawmin kan awm ve mai thin a ni.
Post a Comment