Khawzawl District tihpuitlin an phutKhawzawl District Implementation Demand Committee (KDIDC) bultumin Khawzawl mipuite chuan nimin khan Dinthar Bazarah an kal khawm a; reso­lution pass in, district headquarters atana Khawzawl puan tawh chu Mizoram Legislative Assembly inthlan puan hma ngeia tipuitling turin sorkar an phût.

KDIDC thuchhuah tarlan danin, nimina Dinthar Veng bazara Khawzawla chhungkaw tin aiawhte kalkhawm chuan resolution an pass a; "Resolution-te hi a hlawhtlin ngei theih nan KDIDC chuan hma kan la dawn a ni tih Mizoram sorkar leh mipuite kan hriattir e. Khawzawl khua hian district kan neih theih nan kum 40 chuang thâ thlah loin kan lo nawr tawh a ni," an ti. 


Expert commission eng emaw zat pawhin Khawzawl district function turin an rawt tawh nia sawiin KDIDC chuan, "District ni ngei tura kan inngaih tawh hnuah eng emaw avanga sawnsak leh kan ni," an ti a; kum 2008-a Mizoram sorkarin Khawzawl district thar notification siama a puan tawh, function a nih theihna tura vawi tam tak sorkar an ngenna a hlawhtling thei lo chu pawi an tih thu an tarlang. -Vanglaini


Post a Comment

Powered by Blogger.