Mizoram People Forum (MPF) & Zoram Peoples' Movement (ZPM)

MPF leh ZPM inngen tawn

Mizoram People Forum (MPF) hruaitute chuan nimin khan Zoram Peoples' Movement (ZPM) pisa an tlawh a, MPF general decretary Rev.Dr R Lalbiakmawia'n thu a sawi bakah, ZPM hruaitute nen an inkâwm.

MPF General Sec­re­tary chuan, MPF leh political party-te thawh­hona thuthlung chu hlawhtling ngei se an duh thu a sawi a, "State dang ngaihtuah chuan kan candidate-te hi mi ṭha tak tak an ni a. Policy inziah ṭhat siak ringawt ni tawh loin, a tak ram thleng thei ngei tur election manifesto ziak turin political party tin kan ngen a ni,” a ti.

Joint platform chung­changah Rev. Dr R Lal­biakmawia chuan, "Inthlan puan a nih hnuah chuan joint platform neih loh ni se. MPF-in ṭul a tih chuan state level-ah neih theih a ni ang a, MPF buatsaih a nih loh chuan joint platform-ah hian eng party mah tel loh tur a ni," a ti a; joint platform neih loh tura MPF duh dan chungchangah MPF chu a intithu a ni lo a, thuneihna pawh an nei lo tih sawiin, political party zawng zawng duh dan a nih thu a sawi.

MPF General Secre­tary chuan, 'Ram chu Lalpa ta a ni' tih a nih thu sawiin, "A thlawnin Pathianin ram min pe a, a thlawna min pek kan ram hi min petu duh zawngin i enkawl ang u. Contract leh supply hna zawng zawng party miin an thawk a, ram hmangaihtute thawh dan tur lo ang takin contract hnate chu a chhia a ni," a ti. 

ZPM hruaitute chuan MPF hruaitute chu inthlanna thianghlim a awm theih nan thawhhona thuthlung kenkawh kawngah khauh tak leh dik taka kal turin an ngen. 

ZPM pisaa inkhawm hi ZPM Steering Commi­ttee chairman Lallian­sawta'n a kaihruai a, Rev. Thangchuailova’n hunserh a hmang a ni.