HIGHER & TECHNICAL EDUCATION MINISTER IN MI 11 HNENAH CASH INCENTIVE AWARD HLAN
Vawiin khan Secretariat Conference Hall-ah Higher & Technical Education Minister Pu R.Romawia'n mizo thalai UPSC exam pe, Cash Incentive Award dawng thei tura inziak tling, mi 11 hnenah cheng Nuai khat theuh a hlan.
Minister Pu R.Romawia chuan, Mizoram sawrkara dinhmun pawimawh tak tak chelh tur mizo IAS officer kan awm ta manglo hi a pawi hle a, hei hian mipuite leh sawrkar indawrna kawngah harsatna a awm phah thei a ni, a ti a, he cash award hian UPSC exam paltlang tura inbuatsaihna kawngah mizo thalai tam zawk tan la tura a cho chhuah ngei ka beisei a ni, a ti bawk.
He hunah hian Pu Lalrinliana IAS, Commissioner & Secretary, Higher & Technical Education Department chuan thusawiin, UPSC exam chu intlansiakna a ni a, tlan thlen ringawt hi a tawk lova, a thleng hmasa ber nih a tula, chuvang chuan tihtakzetna tello chuan hlawhtlin a harsa hle a ni, a ti a, thalai UPSC exam bei turte chu tumruhna nena theihtawp chhuah turin a fuih bawk.
He hunah hian mi 11 hnenah cash incentive award hlan a ni a, UPSC NDA & Naval Academy exam paltlang 4, Combined Defence Services exam paltlang 1, UPSC Civil services prelims paltlang 5 leh Mains paltlang 1 an tel a ni.
Incentive Cash Award hi 1992 khan UPSC exam a prelims emaw Mains a tlingte hnenah cheng Sangnga pek thin a ni a, 2004 khan cheng Singkhat ah tih pun a ni leh a, Higher & Technical education department hnuaia Mizoram scholarship Board meeting 2017 chuan cash award hi cheng Nuai khat ah a ti sang leh a ni. He lawmman dawng tur chuan Mizo thalai Mizorama cheng nghet UPSC exam (Prelims emaw Mains) a in ziak tling an ni tur a ni a. Candidate te hian coaching an kal a nih chuan cheng Singhnih thleng leh Hostel a awm an nih chuan Mess fee cheng Sanghnih, thlaruk chhung an dawng thei bawk a ni.-DIPR
Post a Comment