Vawiin hian Minister of State Pi Vanlalawmpuii Chawngthu in a pu Ch. Selchhunga hriatreng nana a bial mipuite tana a buatsaih Ch. Selchhunga Memorial Football and Volleyball Tournament kharna, E. Lungdar tlang playground a neihah khuallian niin a hman pui a. Tun hmate ngaihtuah chuan infiamna khawvel thara cheng mek ang mai kan ni, a ti.


INFIAMNA KHAWVEL THARAH KAN CHENG MEKA kharna inkhawm tawi buatsaihah Minister chuan a puin a ngaihtuah thin zia leh a duat thin zia a ngaihtuahin amah hriatreng nana Tournament buatsaih chu a tih tur dik tak nia a hriat thu a sawi a, hun remchang a awm a nih phawt chuan buatsaih chhunzawm zel a tum thu a sawi. Chutihrualin tun Tournament a a bial chhung khuate an tel kim thei lo chu pawi a tih thu a sawi a ni. Pi Vanlalawmpuii Chawngthu chuan, sawrkarin tun hnaia Hrangturzo bial chhunga sawrkarin infiam mite tana hma a lakna tlangpui sawiin E. Lungdarah leh N. Vanlaiphaiah mini sport complex sak mek a nih thu a sawi a. Ruahmanna te a kal tluan chuan hei aia lian zawk hmalakna pawh a awm thuai a beisei thu a sawi bawk. Mizoramin infiamna ruhrel lama hma a sawn nasat thu sawiin tun hmate ngaihtuah chuan infiamna khawvel thara cheng ang mai kan ni tawh ani, a ti a. Mizoram hmasawnna chu India ram huapa hriat hlawh a nih mek thu a sawi a ni. A bial chhung thalaite chu infiamna hi eizawnna tling a nih tawh thu hrilhin theih tawp chhuaha bei turin a chah a, chutihlaiin he inelna a buatsaih chhan ber pakhat chu inthian thatna leh inunauna tha zawk an neih theihna nise a duh thu a hrilh bawk ani. Tin, tournament tha taka kalpuitu Tuichangral Games hruaitute chungah lawmthu a sawi ani. A kharna inkhawm neih zawh hian footbal final match neih a ni. Lawmman te hi Pi. Vanlalawmpuii Chawngthu leh a chhungte hian an hlan nghal bawk.

VANLALAWMPUII CHAWNGTHU 

MINISTER OF STATE



He Football and Volleyball Tournament hi Dt. 3.4.2018 khan Pu Samuel LR Ralte, SDO PHE, E. Lungdar chuan a lo hawng tawha mipa football teamah team 8, volleyball team ah team 11 leh hmeichhe volleyball team 6 ten intihsiakna an nei a. Volleyball mipaah hian N. Vanlaiphai team champion in lawmman Rs. 20000 leh trophy an dawng a. Hmeichhe Volleyball Teamah Bungtlang Venghlun team champion in lawmman Rs. 10000 leh trophy an dawng a ni. Football ah hian N. Mualcheng leh E. Lungdar ten final an khel a, hun pangaiah 4 - 4 a an inhneh hnuin tie break ah E. Lungdar hi 7- 6 in an chak ta a ni. Football Champion hian lawmman pawisa fai Rs. 40000 leh trophy leh Jersey set thar an dawng a,  pahnihna hian pawisa fai Rs. 20000 leh trophy an dawng bawk. Heng bakah hian mimal lawmman engemawzat sem ani bawk.

Pu Ch. Selchhunga Memorial Football and Volleyball Tournament kharna hi a buatsaihtu Pi Vanlalawmpuii Chawngthu laina Aizawl leh Champhai lama mi engemawzatin an rawn telpui a, a bial chhung mipuiten an hlutin a kharna hun hman pui tu pawh an thehnem hle a ni.-DIPR

Post a comment

Powered by Blogger.