- Ziaktu : Lalnunchanga Taitea


Assam Rifle Commandant W.B.Shakespear-a khan a thawka phitah, “Mizo chu sipai tang tlak an ni lo, an dawihzep em mai,” a ti fo mai a. Assam Rifle a Mizo lo lut hmasate chu an tlawmngai bai bai hle a. Tichuan an huaisen nge huaisen lo tih fiah a ni dawn ta a.

MIZO SIPAI TANG HMASATE AN TLAWM LO
Representative
Kum 1933 August thlaah Chhotelal-a shield chhuah inchuh turin sipai zinga Mizo leh Vai inkhel turin Assam Rifle hotute’n an ti a. Hei hi Mizote sipaiah tang tlak an ni em tih fiahna a ni dawn a. Mizo sipaite chu an la tam loh avangin hmun hrang hranga mi an inchah khawm a, team khat daih an in hmu hram a. An inkhelhna hmun tur chu A.R.Lammualah a ni a.

Infiamna satliah mai ni lovin, Mizo leh Vai inbeihna a nih dawn avangin entu pawh an tam hle a. Mihring din theihna tawh phawt chu awl lai awm miah lovin, sazu pawh a leng tawh lo vang tih khawp in an inhnawh muk tlat a. Mizo zinga J.C.O hmasa ber, Jemadar Bawichhunga chuan, “Kan inkhelhnaa hliam, ban leh ke ruh tliakte kan awm palh a nih chuan pawisa kan thawh khawm ang a, Shillong damdawi inah enkawl an ni ang,” a ti a.

Mizo sipai kan hriat theih te:

1. Mana(Rifle man) golie
2. Chhinga (Rifle man)
3. Thangchhinga (Rifle man)
4. Mangringa (Havildar)
5. Ronel Roy (Clerk)
6. Hualmama (Rifle man)
7. Lalsiama (Rifle man)
8. Zika (Rifle man)
9. Hmuia (Rifle man)
10. Lianruma (Lance Naik)
te an ni.

Mizo zinga thiam bera an neih chu, Chhinga centre half-a tlan a ni a. Lammual chu a diak kawi chhuak vek a. Mual chhungah an lut ta a. Referee chu Capt. Robertson a ni a. Thum an han vawr a, Mizo chu chhim lamah an tang a, Vaiho chu hmar lamah an tang a. Tichuan inkhel chu an tan ta a. Vaiho chu sipai khela pangngai, inkhel fo thin an ni a, mahse thiam sawi theih a ni lo. “A ball a chhuak a nih pawhin a mihring chu a chhuak tur a ni lo,” tih a ni thuai mai.

Vaiho chu ball thiam leh tlan chak zawk an ni a. Mahse, an full back Mangringa chuan ball a tum tawh lo; a mihring fuh ngei ngei tur in a lo hlawi tawh mai thin a.

A hmaah chuan tangkawng beng vih ang ngal ngalin Vaiho chu an vial leh ngawl ngawl mai thin a. A entu mipui au hla pawh a nep lo, “In hlau em ni? Pet thlu rawh, hnek rawh,” tiin an sarak nuai nuai a. Referee lah chuan rin pawn a ball a chhuak a nih chauh loh chuan a hamrik ham a tum der lo.

Half time thlengin goal a lut lo va. Second half an han tan a, ruah namen lovin a rawn sur ta. Chutah zet chuan serh leh sang a awm thei tawh lo. Inpet thluk mai pawh duh tawk lovin, a rem dan danin Vai sipai tlu tawh hnu thleng mai chuan a sehin an seh zui a. Ram leh hnam tana inkhel an ni tih inhre ranin tan paekin, mawngkaw tha nen lam an tang a.

Chutah, Hmuia’n Vai lama goal a han tilut zet chuh! sava thlawk lai pawh an autla tawp zo hial ang tih khawpin an au nasa a.

Mizo lamin goal an thun belh leh lawk thei lo chu, Thangchhinga thinin a tuar lo, “Khawi nge, Vai leh ball ka’n khalh lut teh ang,” a ti ther ther tawh mai a. Chirdiak a pal phei bian bian a, a pet goal ve ta nge nge a. Vai sipai chuan sut tumin theih tawpin an nawr a. Si khat chu an sut thei hram a. Goal keeper Mana thinur chuan Vai sipai goal lawma tlan phei chu a mawngah a va pet thlawp a.

Tichuan, Mizo chu si hnih-si khatin an chak ta a. Mizo mipui tan chuan a va han lawmawm tak em.

He inkhel hi Mizo leh Gurkhali inkhel ti pawhin a sawi theih ang. Vailam sipai, a tamber chu Gurkhali an ni tlat. Mahni ram a ni vang vang bawk a, Gurkhali-ho chuan Mizo ho chu an ngam lo hle a ni.

IGP-in shield a hlan a, chuta a thusawi chu, “Gurkhali hi sipai huaisena sawi an ni a, an ni aiin Mizo sipai chu an lo huaisen zawk hle mai,” a ti a. Mizo 50 sipaia lak nghal tur an nih thu a puang zui nghal ta bawk a. Heta tang hian Mizo chu sipaia tang tlak an ni tih chu an hrechiang zet mai.

Source: Mizo History

Post a comment

Powered by Blogger.