Tunlai Zoram Khawvela mikhual lo tak, Zoram mai nilo, khawvel hmun hrang hranga Zohnahthlak awmna tawh phawtah chuan hriat hlawh em em, Zoram khawvela Gospel Singer lar tawp thang leh fan ngah ber pawl Liandingpuii hi tunge anih i han bih chiang teh ang.
Liandingpuii hi Pu R.Tlanghmingthanga leh Pi Lalrawngbawli fa panga zinga palina niin, Dt. 8th July, 1982 khan Presbyterian Hospital, Durtlangah alo piang a.
Nausen hmel fel tak leh duhawm tak niin, a nu leh pa leh thenrual thate lawm a hlawh hle a. Tun ang em hian Zoram khawvelah hriat hlawh ber pawl anih tur leh a chanchin miin an ngaihven ang tih erawh a nu ngei pawh hian a suangtuah phak hauh lovang. Tichuan, u hmeichhia pahnih leh mipa pakhat neiin, nau mipa pakhat a nei a. Tunah hian anmahni In, Venghlui ah an chhungkua-in an cheng mek a ni.
Kum li leh a chanve mi anihin Mary Mount School, Tlangnuam ah a lut tan a. School hrang hrang, Saizahawla Boarding School-ah te, English Congregation School-ah te leh Holy Heart School-ah te lutin, kum 1995 khan Holy Heart school atang Class VII chu Distinction-ah a passed a. Mizoram pumah sawm leh pahnihna (12th) ani pha nghe nghe. Tichuan, kum 1998 December ah HSLC exam in 1999 ah result a chhuak a. HSLC a exam kum hi Mizoram Assembly inthlan kum a ni a. A pa MLA -a a in candidate ve avangin Dingpuii pawh campaign khelin a buai hle a. Chuvangin HSLC pawh IInd Division-ah a passed phah ta a ni. Tichuan, kum 2001 ah Mizoram Institute of Comprehensive Education atangin Class XII chu Ist Division-ah a zo leh ta a. Tunah hian The Bhawanipur Education Society, Kolkata ah B.A. 3rd yr English Honours a zir mek a ni.
Naupan lai atang renga zai leh rimawi ngaina mi ani a. Zaithiam atih deuh te zai play-in a zaipui chiam thin. Kum 1994 khan kum 12 mi lek niin Holy Heart School Parents’ Day Function, Vanapa Hall-ah a zai a. Heihi mipui hma a inlanna hmasa ber a ni. Hemi hnu hian an Vengchhung YMA leh KTP te thil tihna hmun hrang hrangah a zai thin a. Rimawi khawvela a hming a rawn chher tanna atan kum 1999 khan Mizoram Supermodel Contest, Vanapa Hall ah ‘My heart will go on’ Celine Dion hla leh ‘Man, I feel like a woman’, Shania Twain hla a rawn hit chhova. Heta tang hian mi hriat a hlawh tak tak ta a. Hemi kum vek hian N.E. Supermodel Contest, Shillong-ah te, Albatross Concert, Vanapa Hall-ah te zaiin mi lawm a hlawh tawkzet a. Tichuan, hemi kum hian All India radio Artiste niin hemi tum hian Voice test zingah mark hmu sang ber ani nghe nghe.
Tichuan, kum 2000 a N.E. Supermodel Contest. Aizawla neihah leh Miss Millenium Contest ah te zaiin mipui lawm a hlawh takzet a. Hemi kum hian Lelte Award ‘Best New Artiste’ chu a dawng ta mai reng a. Heng hun lai hian sap hla deuh hlir a sa thin a. Pathian tana inhmanna em em pawh nei lovin, thinlung taka Pathian fak duhna leh tul tihna em em pawh anei rih lem lo. Hla pawh ama duhzawng leh mawi tihzawng zawng asa ve mai thin. Hemi kum vek hian ‘Riangvai fate Collection’ ah BDA hla, ‘Thim leh Eng’ tih a record a. Heihi cassette anga hla a thun hmasak ber a ni.
Tichuan, kum 2001 khan ama puala album hmasa ber, ‘Thiamchanna Kraws’ chu a rawn released a. He album hi miten an hlutin a lar em em a. A satu hian a thiam mai bakah thinlung taka Lalpa a fakna hian mi rilru a hnehin Pathian pawhin mal a sawm nasa hle a. Dingpuii hian a larzual phah takzet a ni. Mizoram mai ni lo, khawvel hmun hrang hrang a Zohnahthlak awmna tawh phawtah chuan he album hian thlen loha ram a nei lo hial awm e. He album hi Pathianin a hmang nasa hle a, he album avang hian mi tam tak Krista hnenah hruaiin an awm a, a ropui takzet a ni. Tichuan, he album hian released a nih kum, kum 2001 ah Rimawi Khawvel Award ‘Album of the Year’ a dawng nghal a. Kum 2002 ah Lelte Award, ‘Best Gospel Album’ a dawng leh bawk a. Hemi kum vek hian Dingpuii hian Rimawi Khawvel Award leh Lelte Award ah ‘Best Female Artiste(Gospel)’ a dawng bawk.
Kum 2002 ah khan USA a Mizo Day hmanga zai turin ‘Mizo Society of America (MSA)’ atangin Lalrindiki Khiangte (Daduhi) nen thlan anni a. USA ah hian thla khat leh a chanve chhung zet a cham a. An cham chhungin hmun hrang hrangah an zai hi miten an hlut takzet a ni. USA a an cham chhung hian hmun hrang hrang an tlawh a an fan na ah Khuanu kutchhuak mawi leh nalh tak tak te, Pathian thilsiam ropui takten an thinlung a hneh hle a. Engkimah Pathian ropuizia hmu in an lawm em em a. Pathian hnenah lawmthu sawi nan, tunlai hla lar ber pawl ‘Siamtu Ropui’ tih hi Lalrindiki Khiangte (Daduhi) nen an phuah ta a ni.
Tichuan, Zoram chhung leh pawnah a phak ang leh theih ang tawka Pathian fak leh chawimawiin, a hmangaih Isua tana Beram zawngin rawng a bawl chho zel a. Zirlai anih rih tlat avang erawh chuan a duh angin a in hmang tha thei lo fo thin. Chuan, kum 2003, November ni 3 khan a album pahnihna atan ‘Siamthar Lehna’ tih a rawn released leh ta a. He album a buatsaih lai vel hian milar dangte ang bawkin a nunah harsatna leh sawichhiatna a tawk nasa hle a. Ngaisangtu a ngah ang bawkin itsiktu leh ertu pawh a ngah hle aniang. Nimahsela, miten eng ang pawhin sawichhia in sawihnawm mahsela do let ve duh hauh lovin Pathian hnenah intluk luh zual nan a hman phah ta hlauh zawk a ni. He album ‘Siamthar Lehna’ pawh hi a nun testimony, hlaa a puanchhuahna ropui tak a tih theih hial a ni. He album hi ngunthluk taka I ngaihthlak chuan, thinlung kehsawm takzet a Pathian a auh zia I hmuh hmaih thei loving.
An thlahtu a pu Pastor Liandova atang renga Pathian tihtu chhungkua anni a. A nu leh a pa in Pathian thu nena uluk taka an enkawlna hnuaiah a rawn seilian chho zel a. Amaherawhchu, Rimawi Khawvela a hming a rawn chher tan lai hian Pathian tana inpumpekna em em pawh a nei lem lo. Kum 2001 July ni 30 zana Faktea home Crusade, LPS-in live a an pek chhuah khan Dingpuii pawhin a lo chhim ve a. Faktea sermon a’n ngaihthlak khan a nunah chona nasa tak pe in, Pathian a chawimawi tawk loh zia leh Pathian tana a inpek tawk lohzia te, chhanchhuah ngai tam tak CHHANTU ani thei ani tihte hrechhuakin, thinlung lungchhia leh tap zawih zawihin Pathian hnenah a in hlan ta a. Hemi atang hian Pathian fakna hla chauh lo chu a sa thei ta lo a ni. Hemi zan hi Dingpuii tan zan chhinchhiah tlak, a damchhunga a hriatreng tur, zan duhawm a ni. Tichuan, hmun hrang hrangah Lalpa fak leh chawimawiin a zai zel a. A thupui ber pawh a theih tawka Pathian faka chawimawi leh Pathian mithmuha dik leh thianghlim taka hun a hman zel hi a ni.
Hla hi 40 vel zet chu Radio (AIR) ah a record tawh a, kum 1999 kha a reocord hmasak ber chu a ni. Fakna hla lam hlir a sa a. Hla 3 a phuah tawh.
1. Zaiin ka fak zel ang- 2002 : He hla hi a nu leh pa te hnena lawmthu sawi nan, an pual liau liauva a phuah a ni.
2. Siamtu ropui - 2002 : He hla hi Daduhi nena an phuah dun a ni a. America ram an tlawh tuma Pathian thil siam ropui tak tak an hmuhin, Pathian chawimawi leh fak nana an phuah a ni.
3. Min hmang ang che - 2002 : He hla hi a pa a dam loh laia, mangang taka a \awng\ai laia Pathian thlarau thianghlim pawlna a dawn a\anga a phuah a ni.
Heng a hla phuahte hi a thluk chu Manase H. Saphmingthanga’n a siam sak a. A album-ah hian a sa tel nghe nghe a ni.
Awards:
2000 – Lelte Award: Best New Artist
2001 – Rimawi Khawvel Music Award: Album of the Year (Thiamchanna Kraws)
2002 – Lelte Award: Best Female Artist (Gospel)
2002 – Lelte Award: Best Gospel Album (Thiamchanna Kraws)
2003 – Venghlui Branch YMA Chawimawina
2004 – Lelte Award: Best Female Artist (Gospel)
2004 – Lelte Award: Best Gospel Album (Siamthar Lehna)
Kum 2006, April ni 6 khan Frankie Lallawmsanga nen an innei a. An nupa-in Chanmari-ah an awm a, May, 2008 atangin tuna an awmna hmun nghet Mission Vengthlangah an insawn ta a ni. Tunah hian an fate pathum - Mercy, Hannah leh Matthew te nen an khawsa mek a ni.
Post a Comment