HPC(D) Te Chuan Ralthuam Nen Tunkar Hian Sesawng CTI An Luh Hman Beisei A Ni

HPC(D) mite CTI-ah an lut dawn hnai

Mizoram sorkar leh Hmar Peoples Convention (Democrat) ten inremna thuthlung an ziah tawh angin, HPC(D) hel pawl mi 100 chuangte chu an rálthuam nen tunkar chhung hian Sesawnga Central Training Institute (CTI)-ah an luh hman beisei a ni a; April 14, 2018 lawm luhna inkhawm buatsaih tum a ni.

Thu dawn danin, HPC(D) hel pawla tel, nunphung pangngaia let turte chu Tuiruang kama Zilthawchhuah aṭanga Mizorama lut tur an ni a, Zilthawchhuah aṭangin Vaitin khaw kaltlangin Sakawr­daiah an lut ang. Sakawrdai aṭang chuan anmahni lawm luhna hmun tur Sesawnga CTI an pan dawn a ni.

Vaitin leh Zilthaw­chhuah inkar kawng chu a chhe tawh lutuk nia sawi a ni a, tun hnaiah PWD-in an siamṭha tawh nia sawi a ni. Hei vang hian HPC(D) mi leh sa, ralthuam nena sorkara inpe turte chuan harsatna an tawh loh beisei a ni. HPC(D) mi leh sate hi April 12, 2018-ah CTI, Sesawngah lawm luh tum a ni a, lawm luh dan tur programme duan mek a ni.

Tarlan tawh angin, Mizoram sorkar leh HPC(D)-te chuan April 2, 2018 khan inremna thuthlung an ziak a; inremna angin, HPC(D) hel pawla awm zawng zawngte chu an chairman H Zosangbera hoin a bo a bâng awm loin nunphung pangngaiah an let dawn a, an ralthuam neih zawng zawng pawh sorkarah an thehlut vek dawn a ni.

Mizoram sorkar pawhin HPC demand area tia hriatah Sinlung Hills Development Council aia thuneihna sang zawk nei, Sinlung Hills Council (SHC) a din ang a, chutah chuan Council member 14 an awm dawn. SHC din nan hian Mizoram Legislative Assembly chuan dan thar a siam ang.

SHC din tur chu Chief Executive Member-in a ho ang a, Chairman leh Deputy Chairman leh Executive Member pali an awm dawn a ni. Member zinga 12 chu thlan an ni ang a, a bak pahnih chu ruat (nominated) an ni dawn a ni.