Mizoram chhim lam District pathum Lunglei, Lawngtlai leh Siaha tlawha zin mek Mizoram Chief Secretary Pu Arvind Ray, IAS chuan nimin khan Lunglei alo thleng. Lunglei Additional DC Pu Benjamin Lalzama, DRDA Project Director Pu K. Lalrohlua, 2nd Bn MAP Commandant Pu C. Lalruaia leh sawrkar official dangten lo dawngsawngin Circuit House-ah inkawmhona hun an hmang.

MIZORAM CHIEF SECRETARY-IN LUNGLEI A TLAWH


 Pu Arvind Ray chuan amah lo hmuaktu Lunglei District official-te chungah lawmthu sawiin Lunglei District-a sawrkar hna kalpui a nih dan leh hmasawnna ruhrel Project te a hmuna tlawh tura lokal a nih thu a sawi a. Dan leh thupek kenkawh kawnga harsatna lian tham awm lovin boruak ralmuang tak hnuaia sawrkar hmalakna te kalpui a ni chu lawmawm a tih thu a tarlang bawk. District hmasawn zelna atan zirna leh hriselna a pawimawh hmasak thu sawiin Chief Secretary chuan Lunglei District mipui hriselna dinhmun te, damdawi ina khawl awmte, faina kawnga hmalakna te, zirna lam dinhmun te, kawlphetha leh tui supply dinhmun tlangpui te official kalkhawmte a sawipui. District official-te hian an hmalakna tlangpui te sawifiahin an hnathawh kawnga harsatna an tawh te Chief Secretary hnenah hian an lo thlen a ni.

 Chief Secretary chuan nimin vek khan Lunglei District chhunga hmasawnna hna kal mek pahnih – Lena Stadium, Serkawn leh State Sports Academy, Zobawk te a hmunah tlawhin a enfiah a. Heng hmunah hian a changtu officer ten Chief Secretary chu lo dawngsawngin hna kal mek dinhmun leh hmachhawpte an sawiho. Sawrkarin hmasawnna ruhrel asiamte chu duat tak leh neitu rilru pu chunga mipuiten an enkawl a tul thu a sawilang bawk. Nizan khan Lunglei Circuit House-ah riakin, tukin zing khan Aizawl lam panin a haw leh a ni.-DIPR

Post a comment

Powered by Blogger.