Vawiin hian Tuirial East Block MNF huaihawtin Lungdai YMA Hall-ah SEDP & Political Training neih a ni a, MNF Vice President Dr. R. Lalthangliana, Ex-Minister chu khuallian a ni a, mipui kalkhawmte hnenah political training a pe a ni.
Khuallian chuan, "Tun sorkar hian sorkar an inbeisei tawh lo. Sum harsatna sutkian nan tiin zu an zuar a, an zawrh dawnah tumah kan rawn lo vang an tih ang ngeiin NGO leh kohhran tumah an rawn lo va. Zu hmangin hmeithai leh fahrah siamna khawl (factory) an din a, police ringawt hi 400 chuang an thi tawh a, zu avanga ṭhalai thi hi 2000-3000 vel an tling tawh bawk. MNF chuan hmeithai leh fahrah siamna he khawlpui (factory) hi kan switch off dawn a, a ṭhalaite suatna lam ni lovin a siamṭhatna lam hi MNF chuan kan kalpui dawn a ni," a ti.
Pu Thangtea chuan, "Tun sorkarin an thiam ve riau chu, reilote damna tur nachhawkna an pe zeuh ṭhin hi a ni. An sorkar kum tam tak chhungin kawngpui ṭha min pek theih loh laiin inthlan dawnah reilote chauh daih turin kawngpui an tidum a. Chutiang chuan inthlan dawn kumah chuan reilote nachhawkna pek zawk che u an tum a; NLUP nachhawkna te, NEDP nachhawkna te pawh an la rawn ti zel a ni," a ti a, "Tun sorkar hian thiam takin nghakuai an chiah mek a, an nghakuai chiahah chuan chawchah an nei a. Chu an chawchah, NLUP chawchah te, 7th Pay chawchah te hi in ei ka duh a ni. Chung pawisate chu Pu Hawla pawisa a ni lo, Bhavan Congress pawisa a ni lo, mipuite pawisa a ni. Kha pawisa kha Congress pawisa emaw kan tih avangin a nghakuai thlenga ei kan tum ṭhin a. Vawiin niah chuan a chawchah chauh in ei ang a, a nghakuai lai tak erawh chu a zumin a chhun dawn che u avangin ei tel suh u. Tumah phih-awh theihin awm lo vang che u," a ti bawk.
MNF Vice President chuan, "MLA bial anga MNF kan chhiatna ber chu CADC area Chawngte bial saw a ni. Kan han chhe laileng khawp a, 2014-a UDF hminga Pu Robert Romawia Royte MP-a a din khan, Mizoram hmun hrang hranga kan chak em em laiin saw lai bialah sawn vote 8000 chuangin kan chak lo a ni. Chutiang a nih laiin tun ṭumah CADC MDC inthlanah MNF-in seat 8 kan la a, Congress-in seat 6 an la a, chu pawh seat khat a la chiang lo zui a, BJP-in seat 5 an la a. Mizoram biala kan chhiatna ber ṭhina MNF-in MDC kan neih tam ber theih chuan Mizoram pumah kan sorkar dawn tih a chiang viauin ka hria," tiin a sawi bawk a ni.
He hunah hian Dr. C. Lalsangzuala, SEDP Team Expert chuan SEDP training a pe a, Pu F. Aithanga, PAC Member te, Pu MS Dawnga General Secretary-te'n thu an sawi bawk. Pu Thangtea hi MNF General Headuarters hruaitute, Women Front leh Senior Front-te bakah MNYF Headquarters hruaitute'n an ṭawiawm a ni.
He hun hi Pu H. Lalremsanga, President, Tuirial East Block chuan a kaihruai a, tlaiah kalkhawmte'n zanriah an kilho nghal a ni.
Source: Media & Publicity Dept , Mizo National Front
Post a Comment