-Dr. C. Lalrampana
A KAMKEUNA:
Sorkar; Khawtlang; Kohhran; Zirna in; Damdawi in; Pawl & mimal etc. hmalakna kawng hrang hrangah 'HLEIH NEIHNA' hian hmun a awh zau hle thin tih hi zep rual a ni lo. Mizo zinga hranghlui saptawng thiam Pu J.F. Laldailova chuan saptawng thumal pakhat 'Favouritism' hi 'Hleihneihna' tiin mawi takin a hrilh fiah a, a hrilhfiah dan hi a dikin a mawi hle. 'Hleih neih' kawnga Lal Isua thusawi hi ngun takin chhut hmasa teh le. Hetiangin:
"In hmangaitute chauh in hmangaih hian lawmman engnge in hmuh ang? chhiahkhawntute pawhin chutiangin an ti ve lawm ni?"
(Mat. 5:46)
Isua thusawi ang khian kan hmangaitute chauh hmangaihna leh tih bik/thlei bik/hleih neihna hian khawi kipah pawh hmun a awh zau hle. Chungte chu kawng hrang hrangin i lo thlir teh ang:
SORKARAH:
Inthlanpui zawh hlima Sorkar thar siamtu apiangin "Kan Sorkar chu thlei bik/hleih nei lo, huapzo Sorkar a ni ang" tiin thuthar thehdarhna hmanraw hrang hrang hmangin an au thum dum dum thin. Hun a lokal a, policy/scheme/flagship program thar tha tak tak an han duang a, a taka an han hman meuh chuan 'HLEIHNEIHNA' bawkin a umzui nghal a; an party mi leh sa ni ve lo tan chuan beiseibo policy/scheme/flagship program a nileh mai thin. Chumi hnu hmanah an party mi leh sa rau rauah pawh thleibik/hleih nei lehzelin uchuak takin anmahni hmangaitute, an chunga thate leh campaign laia beisei nei lawk rana mawngvawmba ang maia phe char char thinte chungah chauh hleihneih malsawmna an vurleh si thin. Huapzo Sorkar zawng a langa mawi tumna mai niin a lo langleh thei thin. Mi zawng zawng tihlawm theih erawh a ni lo. Mahse, mipui dikna chanvo hi rualkhai thei ang bera semrual theih a ni.
KOHHRANAH:
A te emaw, a lian emaw, khawi kohhranah pawh hleihneihna hian hmun a awh zau hle. Pathian thlarau pawlna avanga piantharna nei hlei lo, hausakna; neihnunna; hnasang thawh leh thawhlawm chihrang hrang thawh tam thei an nih avanga hleih nei taka Kohhrana nihna chanvo pawimawh hrang hrang chantir an ni thinte hi Isua kha la damin rawn hmu ta se engtin tak ngai ang maw??? Pathian thlaraua khat mirethei chhumchhiate'n kohhranah hmun an chang pha ta lo. A taka lanmawina, mi hmuh loh hlauva kawtthler leh kawng pengthuama tawngtai thin Pharisaite dinhmun ang chauh a ni ta. Mirethei Pathian thlaraua thuamte'n kohhranah hmun an chang pha ve ta meuh lo niin a hriat theih.
PAWLAH:
NGO Pawl lian leh teah pawh hleih neihna hian hmun a awh zau takzet ta. Pawl thiltum, inkaihhruaina hre miah si lo, neihnun leh dinhmunsang chelh avanga invawrhlar tumte'n pawla mi thahnemngai leh inpumpekna tinreng nena thawk thinte chanvo leh nihna dinhmun chanai luahlana an han inchherarbawm thinte hi a rapthlakin hleih neihna tenawm tak a ni. A thlang theitu leh ruat theitu Pawl member-te lah hian mi langsar apiang an bawh nghal huam huam zel bawk nen. Hetiang mi hi Intihlal leh Nihna chauh duh a taka thawk thaleh peih si lo an nih duh fu lehnghal!
DAMDAWI INAH:
Ram a changkang zel a; Sorkar enkawl chauh ni lo, mimal din Damdawi in changkang tak tak a pung chho zel bawk. Mipui dawrtu damlote tan pawh a awlsam tawh hle. Mahse, damdawi in lehzelah pawh 'HLEIH NEIHNA' hian hmun a awh zau hle. A bikin Sorkar enkawl damdawi inah mirethei damlote'n ngaihsak an hlawh tawk thin lo niin a lang. Thuneitute hmelhriat nei tha leh Hausa apiangin ngaihsak an hlawh a; mirethei zawkte tan tisa damna leh rilru damna a vang ta hle niin a lang. Damdawi ina In admit dawn leh investigation kawng hrang hrangah pawh hleih neihna hian hmun a awh zau hle niin a lang. Hetiang bawk hian mimal enkawl damdawi inah pawh neinung deuh leh dinhmunsanga dingte chuan ngaihsak an la hlawh bik cheu niin damlo thenkhatte tawngka atangin hriat tur a awm thin.
ZIRNA INAH:
Sorkar/Mission/mimal enkawl zirna in hrang hrangah hleih neihna hian hmun a awh zau hle. Mirethei leh zirna tha neih loh avanga hlawhtling ve tawk tawkte tan admission lak a theih ve loh tluk a ni ta. Admission ti thei chin rau rauah pawh neinung leh dinhmun hniam deuhte hleih neihna a la awm cheu niin a lang. Passed thate chauh thlana in admit-na Sikul thlengin a la awm lehnghal! Tunah pawh HSLC/HSSLC Result a'n chhuak leh mah na'nga hleih neihna chu a lo inlarleh chuai chuai mai dawn niin a ngaihruat theih.
SOCIAL MEDIA-AH:
Social Media hrang hrangah pawh hleih bikna hian hmun a awh zau hle. Pawl/NGO/Pressure group/Kohhran liante chauh chanchin thehdarhna niin a ngaih theih. "Pawl tlemte thiltih that leh chanchinthar lam chu social media-ah pholan tum ve mah ila bengkhawn kan hlawh ve ngai lo, harsa tak a ni." tia an phunnawi thawm hriattur a awm fo thin. An Pawl a len avanga Mipui nawlpui tana hriat tul lem lo thleng thlenga vawrh darh chuai chuai thin ai chuan pawl tlem zawkte thiltih that leh chanchin hriat atana tangkai tur chi a awm ve a nih chuan hmun chantir ve thin awm tak a ni a, mahse, hleih bikna hian hmun a awh zau tlat niin a lang.
A TLANGKAWMNA:
Sawi tur a tam hle; sawi sen a ni lo. A zualzawpui chauh tarlan a ni e. Khawikipah pawh hleih neihna hian hmun a awh zau tial tial niin a lang. FB leh Whatsapp group thleng hian hleih neihna hian hmun a awh zau hle. Mahni hmelhriat leh mi lar, hausa leh neinung deuhte thu post eng ual ni lem si lo pawh an post apiang like/comment zat zat peih, hmelhriat loh leh milar lem lo thu tha tak tak post like/comment duhleh miah si lote hi an tam hle. Heng hleih neihna tha lo takte hi tireh theitu chu mimal tinte hi kan ni tih hriain kan hmangaitute chauh hmangaiha hleih nei lo turin tan i la thar theuh ila, tichuan Zoram nuam kan siam mai dawn a lo ni e.
Post a Comment