Sinlung Hills Development Council (SHDC) term chu May 31, 2018 khian a tawp dawn. Hetih lai hian, Mizoram sorkar leh Hmar People Convention (Democrat)-te inremna angin Sinlung Hills Council (SHC) din tura hmalak mek a ni. 

 Sinlung Hills Council (SHC) din tura hmalak mek a niMizoram sorkar leh HPC(D) aiawhte an inbiak ṭuma HPC(D) aiawhte chu tun hnai khan Aizawl­ah kalin, nimin zing khan politi­cal adviser to chief minister Lalrin­mawia Ralte chu a chenna bangla-ah an kâwm a; SHC din a nih thuai theihna atan SHC Bill pass Assembly House-a pass thuai turin an ngen. HPC(D) aiawhte hian vawiin hian Home Minister hmuh an tum a, a ṭul dan azirin Chief Minister pawh hmuh an tum a ni.

Vanglaini palai zawhna chhangin, inbiak ṭuma HPC (D) aiawhte thupuangtu Lalṭhalien chuan, SHC interim-a din ai chuan, SHC din theihna tur bill pass thuai chu an thupui a nih zawk thu a sawi a, "Bill hi pass a nih chuan hmalak pawh a nuam ang. Mipuite'n inremna avanga lo thleng tura an beisei ang ngei a thlen kan duh. Bill pass a nih hmaa interim sorkar lo din ngawt chu a fuhin kan ring lo," a ti. 

Lalṭhalien sawi danin, SHC hi chak zawka din a nih theihna atan nodal department-ah GAD hmang loin Home department hman zawk tura ruahman a ni. Mahse, file a kal sual palh avangin GAD lamah document pawimawhte thawn a ni a, chu chu Home department lamin an ko kir leh mek a; file kal sual palh vangin hmalakna a kal chak loh phah a ni.

Mizoram sorkar leh HPC(D) aiawhte inbiaknaa duh dante sawi tlan a nih hnuah SHC Bill duan (draft) a ni tawh a, chu chu sorkar leh HPC(D) ten a thuphungin an pawm tawh. Inremna ang chuan, interim sorkar a piang ang a, inthlan pangngai chu inremna siam aṭanga thla ruk chhunga buatsaih tur a ni.

Zawhna chhangin Lalṭhalien chuan, interim sorkara SHC member turte an la thlan fel loh thu sawiin, "SHC member-te hi Mizoram sorkar ruat tur ni mah se, keini'n kan tana ṭha tur ang bera kan ngaih anga rawtna kan thlente chu min pawmsak turah kan ngai. Sorkar lam pawhin duh dante an nei thei a, lehlam lehlam inráwn chunga interim sorkar hi lungrual takin kan din theih kan beisei," a ti.

Lalṭhalien chuan, SHC huam chin tur tihfel a la nih loh thu sawiin, "SHDC chin chu a huam phawt ang a, SHC din a nih hnuah a zir chiangtu turte inruatin, anni'n sorkarah rawtna an thlen ang. SHDC-in a huam loh ramri hrûla khuate chu SHC area-a an awm duh leh duh loh zawtin, a khaw mipuite duh thlanna zahsak ni se, inbiaknaah chuan tih a ni," a ti a; SHDC area-a awm sate erawh SHC-in a huam zui zel tur thu a sawi. 

Lalṭhalien sawi danin, HPC(D) mi leh sa sorkara inpe tate chu an chan tur sum pek an la ni lo. Sor­karin a thuin a pe chhuak tawh a, HPC(D) inpe tate leh an chhungte sorkara zangnadawmna hi an hmuh ngei theihna turin sorkar leh HPC (D) aiawhte chuan ruahmanna an siam a, an dawn tur chin chu an hmu ngei dawn a ni. 

HPC (D) in surrender ta te hi ID card pek vek an ni a, sorkar hna hrang hrang 5% an tan reservation siam sak an ni. Sorkar hna hrang hrangte an dilve duh a nih chuan an ID card hmang hian an dil thei dawn a ni.

Vanglaini palai zawhna chhangin SHDC chairman Hming­chungnunga chuan May 31, 2018 hian an term a tawp dawn tih sawiin, "Sorkarin kan term a pawtsei tawh lo a nih chuan kan office kan chhuahsan mai turah ka ngai," a ti. -VANGLAINI


Post a Comment

Powered by Blogger.