politics in MizoramLunglei District Congress Committee (LDCC) chuan nimin khan Lungleia Congress Bhavan-ah Special Meeting an nei a; Congress Legislature Party (CLP) treasurer leh minister Zodintluanga chuan, Mizoram pumah MNF hotu lawkte'n Assembly inthlan hunah tlinna tur bial him an la nei lo niin a sawi.

Zodintluanga chuan, MNF Vice President chu Lunglei district-ah ding duh se, a duh bial a thlang thei tih sawiin, "Lunglei district-ah hian a duhna bera ding thei a ni. Lungleiah hian MNF chakna tur bial hmu se thlang thei a ni a, mahse, vawiin thlengin thlan tur a hre lo," a ti.


Zodintluanga chuan, "Hmar lamah MNF top leader Pu Zoramthanga leh Pu Tawnluia te pawhin dinna tur bial thlang thei mah se, an tlinna ngei tur bial thlan tur an la nei lo," a ti a; MNF party hruaitute'n nasa taka an zawnpui chung pawhin an bial tur an la chiang thei lo niin a sawi.

Chakma Autonomous District Council (CADC) inthlan chungchangah Zodintluanga chuan, "Inthlan puan hma ní-in Governor-in CADC kan sorkar chu mualpho takin a ṭhiat thut a, hei hi kan chhiat phah em em a ni. Ṭhiah ngai lo a ṭhiat lui kha a pawi kan ti hle a ni," a ti bawk.


Congress sorkara minister dang, PC Lalthanliana pawhin thu sawiin, CADC inthlan result puan ní-ah NEDA leh NDA zawmtu MNF president Zoramthanga'n 'BJP nen sorkar kan siam dawn,' tiin thu a puang tih a sawi a, "Keini chuan thawkho se kan ti khawp a, duhsakna pawh kan hlan. Mahse BJP MDC-te'n MNF thawhpui an duh tlat lo a, mipuiin sorkar an nei thei ta lo a ni. CADC-ah Congress leh BJP-te hi party angin kan thawkho lo, Congress leh BJP MDC thlan tlinte'n sorkar a awm theih nan United Legislature Party dinin hma an la mai a ni," a ti.-VANGLAINI

Post a comment

Powered by Blogger.