Vawiin  khan Mizoram Youth Commission Office, New Secretariat Complex, Khatla, Aizawlah Jet Airways Cabin Crew interview final round neih a ni a;  Mizoram Youth Commission buaipuia Jet Airways Cabin Crew Recruitment final round thleng  pha mi 12 zing  atangin Mizoram thalai nula mi 5 chu Jet Airways Air Hostess atan lak an ni. Heng Mizo thalai nula mi panga te hian Medical fitness certificate leh Police verification an tihfela an theh luh hnuah Jet Airways Academy, Mumbai-ah training tura koh an ni dawn a ni.



Pu Joseph Lalhimpuia, Chairman, Mizoram Youth Commission, tuna a bial chhung Lungleia awm mek chuan heng Jet Airways  Air Hostess atana tling tharte hi phone call hmangin lawmpuina leh duhsakna a hlan a; training hlawhlting ngei tur leh Mizoram thalaite tana entawn tlak leh hmahruaitu zinga mi ni thei ngei tura theihtawp chhuah turin a fuih a, hun remchang hmasa berah lawmpuina thingpui in hopui a tum thu a sawi bawk. MYC Chairman chuan, “Thalaite khawvel zauh ang aw,” tih hi MYC au hla (slogan) a ni a, “Mizoram thalaite tan MYC chuan theihtawp a chhuah zel dawn a ni,” a ti.

MYC Mizoram hnaruakJet Airways Air Hostess atana tling tharte chu hengte hi an ni :-

  • Vansangkimi, Chhingchhip Mualpui
  • Diana Lalrinpuii, Zotlang, Aizawl
  • Diana Lalramthari, Thakthing Veng, Aizawl
  • Ruthi Lalduhsaki, Zemabawk, Aizawl
  • Priyashree Hemam, Khatla, Aizawl




Jet Airways Cabin Crew interview final round neihnaah hian Jet Airways hotu pahnih Kaushik Shah, Human Resource Manager, Kolkata leh Vikram Bhat, Base Manager, Chennai te chu Aizawlah an lo kal a ni. MYC Chairman Pu Joseph Lalhimpuia'n Jet Airways hotute a lo sawipui tawh angin, Jet Airways Cabin Crew Recruitment hi August 2018 emaw, September 2018 emawah Mizoram Youth Commission Office, Aizawlah neih leh tum a ni nghe nghe a ni.-DIPR

Post a comment

Powered by Blogger.