MZP chuan an president L Ramdinliana Renthlei hmingin nimin khan Zonuam Police Outpost-ah FIR an thehlut a; National Institute of Technology (NIT), Mizoram zirlai Devsharan Kumar thih dan leh a thih chhan chhui chiang turin an ngen.
FIR-ah hian MZP chuan, NIT, Mizoram hostel, Tanhrilah first year zirlai Devsharan Kumar chu March 26, 2018-ah damlo ṭanin, a nat deuh avangin Guwahati lamah phurh thlak a ni a, March 31 khan a thi a ni. NIT, Mizoram zirlaite sawi danin, Devsharan Kumar chu an hostel-a an ei leh in chhiat vanga thiah an ngai a; hei vang hian MZP chuan NIT hostel-a zirlaite ei leh in a chhiat leh chhiat lohte, Devsharan Kumar chu ei chhiat vanga thi a nih leh nih lohte chhui turin police an ngen a ni.
NIT-a zirlaite sawi danin, NIT hostel warden chu faculty a ni nghal a, warden chuan ei tur a pe chhe hle nia sawiin, "Zirlaite sawi anga ei leh in tur warden hian a supply ṭha lo reng em tih min chhui fiahsak tur leh, a supply ṭha lo a nih chuan warden chungah dan anga hremna pe turin kan ngen che a ni," an ti.-Vanglaini
Post a Comment