[P.C Malsawmzuala]

Ka Ṭingṭang, ka khumbul mai ṭhutmutna ṭhutthlenga ka dah chu ka ban thuai a. Tuktin leh zantin deuhthaw ka kuaha ka zaipui mahnise khami ṭum kher kha chuan ka hlawhchham chiang kher mai!

Ka kut a khur a, thlanfimin min bawh huh hlup tawh a, theih chu ni se ṭah tlawk tlawk mai ka va han chak tak em! Ka hmai hupin ka insehruh ngawt ngawt a, khawvelah hian ka leng lo ni ta berin ka hria. Pawnah ka chhuak a, inchhungah ka lut leh a, khawilaimah chu ka tan hmun nuam a awm lo. Ka sahal huam huam a ni ber mai.


Ka khum pindanah chuan ka lut leh a, khum chhaklama almirah chu hawngin tlaia ka zu inbang chu ka lachhuak a, a thlit ringawt pawh ka harsat a ni ber mai. A in te chu khawilamah hian a ni ringawt! A no chawp chuan bangkil vawm nan a ni ka hman tak ni. Tlaiah khan a kai nuam tawk chauhin ka in a, zanriah eikham hlima ka lengchhuak kha darkar khat pawh ka thang hmain ka kir leh a, tunah chuan kai nuam tawk chu sawi loh in lo ang hlauh ka ni. Ka harh mah mah zawk. Ruichhum hmawk thei ila chuan ka phurrit hi a ziaawm zawk mahna. Mahse, farkhat pawh ka lem belh thei bawk si lo!

PERHKHUANG ZÚNZÂMRawlchhuah meuha duhtawka ṭah hawm hawm mai a ni ka chak ber chu ni. Engngatinge ka lo va chhuah kher kher le? Kha thil tawng lo tur khan inah lo inkhung mai ila ṭha tur asin. Kum 15 zet zawt chu lungmuang takin he khuaah hian hun ka hmang ve tawh. Ka nunhlui ten min vuak lét ve deuh avangin nupui neihlam hi ka ngaihven teh chiam lova. Duh ila, tum ni ila chuan mahni tumtawk te te chu ka hmu ve chuan ka hria. Mahse, ka rilruah a awm thei tlat lo.

In, parawl in atana lian lam mah tur hi ka pualin ka nei ve a, eizawnna kawngah pawh High School-ah ka thawk ve bawk a, ka inenkawl ve thei viau. Chuvangin ka khawvel hman mek chu hrehawm a ni hauh lova, nunhlui te ka theihnghilh ni a tam zawk avangin ka nun chu a nuam chhawm ve a ni mai. Kohhrana inhmang tak a ni chu min ti hauh lovang le. Sunday school te chu ka kai ve hram hram a, Pathianni zan te pawh tihfuh zanah chuan inkhawm pui chang te pawh ka nei ve ṭhin alawm. Zu in zeuh zeuh ka chin vang hian a kohhran ang zawnga rual pawl chiam chu ka inthlahrung ve deuh ṭhin niberin ka hria.

Chhin khat pawh chhing lovin chu zan chu ka tluan ṭhak a, zingah hmatakah inbualin ka tihtur hre lo chu ka vakchhuak a, khawlai dung tluan mai pawh chuan min daih lo, kawngpui dung zui chuan ka kal kal ringawt mai a, dâi thlengin ka kal tak hial chu. Mahse, chu zingkar boruak tharlâm chuan ngaihtuahna thar min pe thung a, ka fapain ṭap chunga a zawn a pa chuan ka pan dawn, ka fapain pa a nei tawh ang a, keiin fapa ka nei tawh bawk ang. Chu thutlukna ka siam lai chuan ka biangah mittui a luang ngiai ngiai a, zing nichhuak engphût mai hnuaiah chuan ka fapa awmna lama zinchhuah tum chuan ka inlam panin ka kal ta hlawk hlawk a.

HMÂNAH CHUAN : Pawlthum kan nihlaia Rinpuia te nena kawrhma phel dawr dawra kan sikul bang kan tlan haw ṭhin kha ka mitthla theih hla ber a ni hial awm e. A bak chu han chhuidawn leh ngaihna pawh ka hre lo. Ka pa a boral hma avangin ka nu nen ka pi leh pute (ka nu nu leh pate) kiangah kan awm a, naupan lai na na na chuan pa ka neih tak loh chu hrehawm tih nachang pawh ka hre em em lo. Ka pi leh pu te, ka nu te thlazar hnuaiah chuan ka hlim a, ka lungawi tawk viau pawh a ni mahna le.

Ka pa hi a vanlaia tla deuh nge mawni a chhungte tumah ka hre hauh lo! Mahni chantawkah hlimin lungawi viau ṭhin mahila vanduaina a lo thlen hi chuan lehpek a awm tawh hauh lovang tih tur khawp hian a inkahpukchaw zut mai emaw tih tur khawpin a lo thleng leh si. Ka nuin khaw hla tak maiah pasal min neihsan a, chutihlai chuan pawl sarih ka zir ve tawh a, ngai viau mahila ui vak ngaihna pawh ka hre chuang lo. A kum lehah pawlriat kan han kal chho ṭan chu ka puin min boralsan leh a, ka pi nen chauh chuan kan awm dun ta rak rak a, ka nu u, ka putea te chu awm tho mahse anni chuan min rawn puihbawm emaw pawh ka hre ngai lo. Ka pitei hi ka nel em em loh vangin an inah pawh ka chuangkai ngai hran lo.

Khatihlai khan ka pu, middle school chowkidar pension hlawh kha kan ring pitu mai a ni tih tunhnuah hian ka hre leh hnuhnawh. Ka pi chu a khua a har ṭhin hle a ni tih hre mahila keia naupang ta chuan tihvakngaihna pawh ka hre chuang lo. Zanah pawh mut miah loh chang a ngahin ka ring. Chu a chhapah ka nu boral thu kan han hrezui a, keini pitu lah kal thei kan ni si lo. Ka putea chu a kal tain ka hria. Chu thihna chuan ka pi chu a ti awngrawp leh zual a, kum upa lam a nih tawh bawk si avangin a tan chuan a tawrh tham viau ta ve ang. Lungleng leh khawhar reng rengin hun a hmang a, rei min tlinpui ta bik lo. Pawlriat kan exam lai chuan min peih loh san ta nge nge a Zingah lehkhazir turin min kaitho ziah a, chumi tukah chuan kaihthawh ngai lovin keimahin ka harh ve mial a, ka piin min kaihthawh hmaa ka harh hman chu ka intithei khawp a, ka inphihfai zawhah chuan kan exam tur chu ka chhiar nghal mawlh mawlh a.


Reife ka zir hnuah pawh ka pi thawm hriat tur ala awm lo. Dar 7 a rik dawnah chuan a nuamsam lo a nih ka ring ta deuh a, chaw ka lo chhum dawn em tih zawh tumin kan mut pindan lam ka pan a, ka pi chu ka kaitho zo ta lo tawp mai le. A taksa lah chu a vawt thler mai bawk si, ka tung a, amahin a tlu leh zel bawk si. Ka mangang chuan kan ṭhenawm te ka va pun ta ringawt a, chutah chuan ka piin min kalsan ve leh ta a ni tih ka hrethiam ve ta chauh a! Ka piin min kalsan leh tak vang chuan keimah chauha awm rual ka la nih si loh vangin ka putea te chhung chuan min awmpui ta a, an hnenah ka awm nilovin kan inpuiah chuan min lo fin leh zawk a ni. Mahse, ṭhatpui aiin chhiatpui lam ka pan phah ta zawk a lo ni. Zial zukruk aṭangin bul ka ṭan a, Ganja nen ka nun chu a inthlâk chiang kher mai. Ka chhungte nen pawh tuk zan ṭha kan nei mumal ta lova, kan ina riak tura ka haw loh te chu ngaiah an nei ta aniang inzawnbuai pawh kan nei ngai lo.

Chutiang chuan hun engemawti chen chu suahsual rawng ka bawl a, ka nun lah a beidawng. Kan khua chu nuamtihna ka nei hlawl lo a ni ber mai. Kumtawp lamah, chhungkaw ṭhenkhat chuan Krismas boruak an er tawh ang tihah chuan kan khuaa Hmarcha laa lo kal vai motor hnungah chuangin ka haklai nen chauh chuan kan khua chu ka chhuahsan ta a, chutihlai chuan kum 15 mi ka ni a, kal tumna em em ka neih ka hriat loh tlukzetin kirleh tumna ka neih pawh ka hre chuang lo. Motor a din apiang chuan ka ṭumthla ve nghal thuai zel a, kha vai, hmarcha latupa kha a fel khawp mai, thingpui te min intir a, kawnglakah rilṭam ka hriat loh phah. A hming lah chu ka hre lem hlei lova.

Tichuan Aizawl chu zan thimhmulah kan lut a, pan tur ka hre lova, ka hawina lam apiang mai chu beidawnna hlirin min tuam vel a ni ber e. Hmanah ka nuin min kalpui tawh a, khami ṭum kha chuan ka ngen apiang kha min leisak ti ila a sual awm love. Silai lem ak chunga kan khaw sumo a intitheitaka ka chuan lai te kha ka mitthlaah a lo lang leh uai uai a, ka mittui chu a lo hnam ṭiam ṭiam a, ka nu kha ka va ngai tak em!

NUN INTHLÂK : A kum hmasa lama kan khua ka chhuahsan hun ang vel a nih loh pawhin a inhlat lutuk lovin ka ring. Chutiang hunah chuan a vawi thumna atan Police ho man ka tawk leh ta! Kum tling lo ka la nih bawk si avang chuan Remand Home lamah min dah ta a, ka tan chuan nunbul inṭanna tur a lo ni reng mai.

Kumkhat chhung khan ka nunah hian a chhelam thil, thleng lo a awm lo hial ang tih tur khawpin thil chitin reng ka tawng kual a, ruk ka ru a, zu ka in a, damdawi nen, zu zuarin min chhawr bawk a, insual leh mi han tihthlabar te chu engah teh vak ka ngai lo, ka nuna bet ve reng emaw tih tur khawpin kha kumkhat chhung khan ka khawsa hman, ka ngaihtuah let chang hian a rapthlak hi ka ti tak meuh a ni. Chutia Home lama ka han awm ta chu zalen taka lo tal kual vel tawh ka ni bawka hrehawm hi ka ti ngang mai. Security a ṭhat em vang chuan tlanchhuah ngaihna a awm der mai bawk si lo. Ka tan chuan hremhmun patê hi a ni ringawt mai.

Han awmrei ve tak deuhah chuan ngaiah ka nei chho ve thuai a, ruihhlo lama talbuai (addict) ka nih lem loh vang chuan ka awmnain a zir em bawka nunphung pangngaia awm chu ka ti ve leh thei mai. Chhungte ngaih tur chuang ka nei bawk si lo. A chang phei chuan ka awmna tur hmun dik tak niten ka hre hial a.

Home enkawltu NGO lam chuan hmathlir thui tak an lo nei fel viau mai a, Home-a awm te chu a duh apiang lehkha zir theihna tur kawng an buatsaih a, a timi lo tan kutthemthiam lam hna te, huanthlai enkawl chenin tihtur a awm vek a ni ber mai. Infiamna lam pawh football khelhna tham khelmual kan nei lo a ni mai a, a bak zawng chu kan khel thei vek mai. Ei leh inlamah lah buaina kan nei ngai bawk si lo. Keipawh chu NIOS hnuaiah admission ka la ṭha ve leh a, Home enkawltu te lamin admission fee, monthly fee leh ṭuldang zawng zawng an ngaihtuah vek vang chuan kan tan chuan ṭhuthmuna 'duh e' lo tih kha a ni mai a, thil harsa a ni hran lo. Kan riahna ṭhin building lianpui maiah chuan khum hi a intlar pût mai a, khum awl hi kan nei ngai meuh lo a ni ber e.

Ka piah chiahah chuan Kum 40 vel tur, samsei hnûp mai hi a mu ṭhin a, mak ka tih deuh chu kan mut rual hian a mu ve ngai meuh lova, kan muthilhah a lo mu ve chauh ṭhin ni hian ka hria. Midang lo awmrei tawh te ka zawh chuan, "Ruihhlo ngai dam leh a nia, zanah hian a mu thei lo ṭhin a, inchungzawlah khian guitar a perh a, zanrei tak tak thleng a meng ṭhin," tiin min hrilh a, a chhan hre mah suh ila ka lo khawngaih ve ngawt pek a!

Zankhat chu muturin khumah ka lawn zet tawh a, ka bula mu ṭhin Pa Puia kianga han kal ve chu ka chak tlat mai pek a, ka inha leh a, inchunglam pan chuan ka chhuak chho zui ve nghal a. Kan building hian a hrana hungna a neih vangin a chhungah na na na chuan kan zalen khawp mai a, zan dar 10 mut hun tih inkaihhruainaah a awm rualin a mu lo pawh bengchheng kan siam te a nih loh chuan hauh tawk kan awm ngai lem chuang lo. Inchungah chuan Sintex nghengin Pa Puia chu rem fe hian a lo ṭhu a, an sawi ang tak takin Guitar a lo kuah ran bawk a. Eng deuh ruau hnuaiah chuan a lam pan chuan ka kal chhat chhat a, a zai ri hriat tur a awm lova, a Ṭingṭang thai ri erawh chuan min ti phur kher mai. A bul ka thlen chuan, "E, Rina i lo chho ve a ni maw, ṭhu ve rawh," tiin a lo tawlh rem nghal thuai a. A Guitar perh lai chu a sirah chuan a tung ṭha a, kan ti ti nasa kher mai. Zanlai pelh rawk thlengin alawm kan ṭhutdun le.

"Shillong-ah lehkha zirin ka awm ṭhin a, music kan atchilh lai a nih vangin kan lehkhazir bakah music class te kan kal ṭhin a, kan khawihhnem a, kan tuichilh bawk vang khan inchhuan thu suhah a thiam pawh kan thiam chak khawp mai. College kan han kal chho va, band te dinin hma kan la chho ve a, kan indin kumah chuan North East Rock Contest-ah khan pakhatna kan ni ve mial a, chuta ṭang chuan zirna pawh ngaihsak mang lovin music lam chu kan luhchilh chhova, Shillong leh a chhehvel bakah hmundang dangah pawh hriat kan hlawh ve hman viau a, Record Label min rawn dawrtute pawh an awm ve hman hial.

Chutiang boruak kan han tawng chho ta chu kan zo lo tlang viau aniang ruihhlo nen kan kaihkawp chhova, kumhnih kumthum dawn kha chu kan la tizui ve thei mai a. Mahse, rei kan daih ta ngang lo a ni. 'India ramah nangni aia ṭha tur an awm chuang lo' ti hiala fak tawktu te chuan ruihhlo ngawl kan veisan hlawm ta a, kan kehdarh tak tak hmain kan basis phei chu a boral hman hial a, midang pawh kan vanneih vanga liam lo mai chauh kan ni.

Tichuan Mizoram lamah ka lo chho ta a, chuti maiin ruihhlo thlahngawt chu a lo theih awzawng si lova, regular-in ti lo mahila han tih ve leh zauh te ka nei zel a, zu in ka ching chho leh a, vanneihthlak takin damdawi lam chu ka thlah thei ta hlauh a. Mahse, zu chuan mi lo bawih leh hman fe si. Kum 10 chuang fe ka buai leh hnuah heti hian Home lamah inenkawl turin ka lut a, tunah chuan nun pangngai ka hnaih ve ṭan viau tawh e. Kum khat chuang zet chu ka lo awm ve leh ta reng mai."

Zantin inchungzawlah chuan ka zui chho ve ta ziah a, kan ti ti hman meuh tawh lo zawk. Guitar chu uluk fe mai hian min zirtir ṭhin a, min tuihneh ka ti mai a, karkhat vel chutia min tihpui tak ziahah chuan nuam hi ka ti ta khawp a, zan hi ka nghakhlel et et zel mai nia mawle. Chhuna kan awl deuh hlek chuan Guitar chu ka lo ban hman deuh ziah a, ama guitar bik anih vang chuan ka inthlahrung viau nachungin ka insum thei lawi si lo. Ani pawhin min hrethiam khawpin ka hria, tlangval ve ek ek, thaza ṭantir, engkim ti theia inngaihlai kha a ni miau alawm le.

Pafa rual zet kan ni nachungin kan inkawp rawt a ni ber mai. Hnathawh a ṭul leh kan inzui a, chaweinaah thlengin mawle. Chutiang chuan hunawl leh awl lovah pawh kan inzui chawt a, Hmeichhe riahna pindan lama Guitar an khawih ngai loh chu kan chei ṭha a, lungrual takin zan kan tumtawi dun thei ta a. Music instrument chikim chu kan awmna building piah deuhah chuan a awm thova, a nazawng chuan kan kal peih lem lo. Inrinni leh Pathianni chawhnulamah hian kan kal ve zauh ṭhin chauh a ni. Band angreng deuha inhlawmkhawm an awm vangin lo va inrawlh ve sek pawh a nuam chiah lo ve bawk. A kum a kum tel kan awmdun takah chuan, "Kei aiin i kut a rang a, i kutchhuak ri a dik zawk bawk. Idea i neih ṭhat phawt chuan heibak a awm thei chuang lo," min ti ve ta hial a, ka lawm teh asin.

Chutih chhung chuan zir mumal lo viau e ti lo chuan NIOS aṭangin pawl 10 ka pass ve mial a, kan Home Director te duhsakna zarah pawl sawmpahnih admission min tihfel sak leh nghal a, Pa Puia pawhin min lawmpui kher mai. Pafa tehchawk kan chang a, engkim hi kan inṭawm a ni hawt mai.

"Beat Contest a awm dawn a, Director ten ka kutah an dah a.." ti a Pa Puia'n a sawi chuan tel ve inbeisei chu sawi loh chulam hawi chu ngaihtuah ngaihna pawh ka hre lo hial zawk a, a chhan chu Band awmsa kan neih vangin midang inrawlhna tur chi-ah ka ngai lem lo. Bakah keini zawng kan tui a ni mai a, mi hmaah vawikhatmah kan la dingchhuak si lova.

"A nuam ngawt ang, i kutah an dah chuan an intihsiak hunah lo zui ve che ila a ṭhat dawn chu. Chhim ve pawh a chakawm alawm le," ka lo ti a.

Engdangmah a sawizui leh chuang lo.

A guitar kuah lai chu muangchangin a thai a, zandanga kan 'play' ngai loh, a hriat pawh ka la hriat ngai miah loh chu muangfan raih, lungkuai zet hian a 'play' riai riai a, ngaihnawm ka ti lutuk chuan ngawireng hian ka ngaithla kar a, lo zawm ve pawh tum ila tihngaihna ka hre der lo.

"A mawi kher mai.." tiin guitar a thlahfel zawt tihah chuan ka lo sawi zui sap a.

"Kha hla kha hun rei tak ka 'play' ngam tawh lo asin. Kan band kehdarh hmaa ka siam a ni a, kan sachhuak hman ta lo a ni." Tiin lunglen hmel tak chuan kan ral lama eng de sep sep lam chu a thlir zui vang vang a.

Chu a hla thulkhung chu nalh ti viau mahila min zirtir turin ka beisei ngam hauh lo thung. A chhan chu a nunhlui hriatchhuah tirtu a nih vangin a rilru tih hrehawm ka duh lo a ni.

Mahse, a tuk zanah chuan min enpui ta thova, ama phuahdan chuan sap hla a ni a, aw ngaihnobei lo ve tak mai chuan kan han sa dun a, kan rimawi leh kan aw chu a inmil chiam lovang!

Inrinni tukkhat chu hna an rawn sem diat diat a, Pa Puia hming chu an lam ve hauh lo mai a, ani lah chuan chulam chu ngaihven awm pawhin a lang lo. "I hming an lam ve miah lo," tiin zawt ti tih hian ka be zui a.

"Nia, vawiin chu band ho hlazirpui ka lo tum deuh a," tiin min chhang mai a. A tel lova hnathawh ka peih vak lo asin mawle.

"Naaa.." ka tih nãng nãng lai chuan a sam chu a lo ṭawn ṭha mawlh mawlh thung a.

Vawkchaw la tur group-a ka tel lo hrim hrim chu ka lawm tho mai. Kan huan sam hmabak sâm chhunzawm turin kan inzui thla ta diah diah a.


Hmalai chawlh hun vel turah hian tlangval pakhat hian kan huansam chu min lo kova, "Pa Puia te'n an mamawh che a," a tih chuan ka hrethiam lo kher mai. Ani lah chuan sawi thui tur a hre bik der si lo. Inngaihtuah rauh rauh chung chuan ka zui chho ta hnak hnak a, hlâ ni mawlh hek lo, kan thleng thuai a, ka hnathawh thuam pawh thlak lo chuan Music Room lam pan chuan ka zui ve zel a, thawm chu an lo nei ve ṭang ṭang alawm.

Kawngkhara ka dak lut chiah chu Pa Puia chuan min lo hui thuai a, "Guitar hi perh teh, Sangpuia'n rythm hi perh sela, kan hla thlan a rang bawk sia, music a thawl lutuk chuan a mawi dawn lo tlat," a tih zawm zat a. A dik tak sawi chuan ka lawm ru khawp mai. Tel ve phaka ka inngaih loh vanga beisei ngam lo kha ka ni a, Pa Puia'n remchang min siam sak chu ka lawm tak zet. Mi band kara tel ve chu a inthlahrunawm viau tho nachungin.

Hla pahnih sak tur a ni a, chu chu final round thlenga rintlang tur a ni. An hlathlan chu sap hla 'Destination' tih a ni a, remchang min zawn luih sak deuh emawni aw ka ti hial mai. A chhan chu 'Destination' tih hla chu kan pahnihin kan play ngun kher em a, Hollow Guitar chauh pawhin ka bei dak ve tawh viau tlat alawm.

Pakhat dang leh chu Mizo hla tur a ni a, la thlan chawp tur. Destination chu a chord kaldan aṭangin min han hrilhfiah leng phawt a, chumi hnuah instrument hrang hrang - Guitar, Bass Guitar, Drums leh Keyboard te chu play zel pahin a mal malin a kal dan tura a duh chu min hrilhfiah leh a, chutiang em em chuan music instruments chu a bel ang tih pawh ka lo ring ngai lova, a thiam a ni deuh tawp mai. Ri a tihchhuah reng reng chu a dakthlarh vek mai a ni. A tirah chuan kan inman lutuk lo nen kan helnuai chho viau a. Mahse, kan han tih tlak tlak hnuah chuan kan rem chhuak ve thei ta sawih sawih a, kan bassis chuan, "Tunge zai dawn?" tiin Pa Puia chu a lo zawt hman hmawh a, eng nge maw awmzia teh reng ni, ani leh ni lo angin, "A hunah chuan a lo kal mai ang," a lo ti bak hluk a, zawh nawn leh chu chakawm loh tak a ni. A awrawl vin hi ka hre ngai hauh si lova, an lo in bakkaih deuh tawh nge maw ni dawn ni.

Karkhat zet kan zir hnuah pawh chuan a zai tur chu a lo la lang thei chuang lova, tumah chuan an zawt ngam tawh bawk si lova, an hre chak bawk si. A tawpah phei chuan 'amah a zai dawn niang' te an ti ta vel mai mai. An band-a an zaipu ber lah chu a duh bau si lova, a tawpah chuan hmeichhe sam boyscut; tukkhum lang vah mai, hmel fel ving veng hi a rawn hruai a, ani chu mikhual a ni nge Home-a lo awmthar zawk pawh a tu amah chuan kan hre lo. Mak tih hmel takin phawk fe hian kan lo melh hru a ni ber mai.

A hnua kan hriat leh danin kan Home Director fanu a lo ni awm e, Pa Puia te nen hian vengkhat an nih vangin an lo inhrechiang viau ni tur a ni. Kan hmuh hlim kha chuan kan tui vak lo tih kha zep buangbar pawh a ngai lo. Mahse, kan han tichho a le, sawifiah vak ngaihna pawh ka hre lo tunlai ṭawng takin 'a rapthlak reuh tawp' ti ila a fiah ber ang. Kan Pa Puia chuan a duhkhirh si, midangho chuan an ning thei khawp a, keichuan duhthusama inbuatsaihna ṭha ka neih theih phah thung a, 'Ar-a lungchhia, Sanghara lunglawm' tih ang deuh a ni. Mizo hla zawk tur chu Pa Puia'n a thluk leh music arrangement a khawih a, keiin a hlathu ka lo dah thung a, band original hla kan nei ve ngei dawn a nih chu.

Tichuan, a hun a lo thleng ta!

Vana Pa Hall Green room-ah chuan kan zaihun nghakin kan ṭhu ther ve far a, kan elpui tur te chu en mai pawhin an huphurhawm nghal hliah hliah mai. An incheina leh an hawiher engkim mai chu kan chunga leng an ni tih a hriat ngawih ngawih a, keini lah a ṭhen damdawi sulhnu kut la vung deuh te, en mai pawha thle ve nasa ṭhin tih hriat deuh tur hlir hi kan ni.

Ka naupang ber a, kei leh kan vocalist chu han hmuh maia mipangngai hmel pu deuh chu kan ni mai awm asin mawle. Keilah ka sam chu sei ni chiah lo hian a buk em em a, enkawl loh niawm fe hian ka la ti pawr chhur zui leh ta nghal a, keini ṭhukhawmho min en hrek hrek pawh chu an demawm viau loh. Kan hmaa zaiho chu an thiam hlawm kher mai. Ka vawikhat dinchhuahna tur a nih vang chuan ka huphurh tak zet. Thlanfim chuan min bual ṭak ṭak a, ngaihtuahna fim ka pu thei hauh lo mai ka ti.

"Vawikhat chauh dingchhuak turah inngai ula, vawikhat chiah indinchhuahah chuan intheihtawp inchhuah ang. A bak ngaihtuah suh u. In theihtawp inchhuah leh chhuah loh chu in result-ah a lo lang ang," tih chiah kan boss lah chuan a sawi bawk si. Huiham, kan khuangpu hnungah chuan khur deuh ti tih hian ka chhuak ve a, mipui lam phei chu a hawi hian ka hawi ngam lo hrim hrim.

Guitar ka in 'set' fel hnua ka han thai chhin vel chu ka zamna boruak zawng zawng chu vawmbo ang duak mai a ni. A mak kher mai! Mipui lam hawi chuan ka bân te chu ka han vai ṭha leh hnuhnawh a!

Hun kan hman lai boruak chu engtin chiah nge ka awm ka hrethiam lo, a nuam ka ti lutuk niberin ka hria. Tlangval chhuak zawt, keiber emaw intihlai a ni bawka hla hnih kan neih pawh chu ka kham lo lam mah chu a ni ta hial a! Leh em em si chuan.

Backstage lam chu phur leh tiṭha inti fe hian kan pan a, Pa Puia chuan ṭha taka min lo dawn sawn ka rin teh reng nen, engmah pawh a lo sawi lo nia! Kan ti ṭha vak lo zawk emawni le. Mahse, kan ti chhe lovang, khabak chu tihngaihna kan tan a awm lo.

Sahawk ve viau kan chak nen kan boss lah chuan eng teh ualah a lo ngai bawk si lova kan boruak chu a vawchhe zo leh vek mai. Keimah nena inhnimhnai ber kan ni bawka ka zawt ta chawm a, "Eng nge a an?" midangho pawh chuan min lo melh ṭhap hlawm a.

"A pangngai.." teh tawrh chuan leh!

Tlin pawh kan inring leh tawh hlawm lo, ani 'expert'-a kan neih berin min fak miau loh chuan phur deuh surh chu a har khawp mai. Ngui ru deuh tak chungin a ni kan inzui haw tak ni.

A tukah chuan hlazir pawh kan lo awn vak lo nge ni engmah pawh kan sawi lo. Pa Puia chuan, "Ila inpeih nange, hmeichhe insiam chen zet hi i insiam ta ṭhin a.." min ti a.

"Eng nge kan tih dawn a?" ka lo ti deuh hu a.

"E, hla kan zir leh ang chu." vel mai mai chuan a!

Mahse, kha Beat Contest-ah khan 'Best Guitarist' lawmman ka hum haw asin! Kan vocalist khan a hlathu a theihnghilh zauh a, chuti ni lo se chuan pakhatna kan nih ngei ka ring. Kan lawm ve viau e.

Chu intihsiakna chuan ka nun hi music lamah a hnuklut thuk zual sauh a, band-ah pawh chuan ka intatlut zui nghal a ni mai a, an guitarist ka nêkchhuak a nih tak ber chu.

A hranpain keimahni pualin concert em chu buatsaih lo mahila kan band chu kan zaichhuak nasa angreng khawp mai a, a hunlai na na na kha chuan Live band sawm hlawh ber kan ni ve chuan ka hria. Mizo hlahlui aṭanga Sap hla leh, keimahni siamchawp hla thlengin kan sakual nasa viau a, chutiang vang te pawh chu a ni mahna mi lawm kan hlawh ve em em ni.

AMAH CHU KA BIALNU A NI: Chutianga nuam ti taka hun kan hman ve reng lai chuan hun a lo liam ve duak duak zel a, kan home chu tihlen niin fahrah naupang kum 5 chin chunglam enkawlna tur hmun an siam belh a, school leh naupang enkawlna tur mamawh hrang hrang chu sawrkar lamin a rawn dah a, keini tan chuan lo ngaimawh emaw, ngaimawh loh emaw chhan tur teh chiam a awm lo.

Pawl sawmpahnih ka pass hnuah chuan School lamah chuan min pawtzui nghal a, Primary School Teacher te kan han ni leh lawp lawp mai a nih chu.

Chutianga school lama ka kal takah chuan ka lo talhoh zia ka hrechhuak a, inchei ve deuh te a lo ngai a, thuamhnaw pangngai taka han incheina tur alawi pawh ka lo nei hauh lo mai a, ka neihho ve lah chu kan zaina vela kan hak ṭhin, incheina atan chhuanawm lutuk lo te a ni deuh vek mai bawk si.

Kan zaina aṭanga kan sum hmuhchhuah tlem tlema ka khawl ve chu lakchhuah mai ṭhaa ka hriat thu Pa Puia bulah chuan ka sawi a, ani chuan awlsam fe hian, "Ka pawisa hmang rih mai rawh, i dahsa lakchhuah chu dahluh leh mai hi a har a nia," a lo ti et a, inthlahrung duh bik lovin Rs 1500 chu ka hmansak ta nge nge a, School lamin hlawh ang reng deuh tlem azawng min pek an tum vang chuan chumi ka lak hunah chuan ka rul ve leh mai ang chu ka ti.

School lamah chuan ka han su ve leh lauh lauh a, zaitur ten kan chhuak leh lawp lawp bawk a, band lamin hlazir an lo duh ve ṭhin bawk nen hunawl pawh ka nei hleithei lo a ni ta ber mai. Mahse, a nuam ka va ti si em!

Kum chanve dawn school lama ka then ve hnuah chuan Zirtirtu pakhat hi sawrkar lamin an lo dah thar a, ka hmuh hmasak ber chuan pawnfen a feng a, 'khawpui nulaah chuan a hawiharh lo pawl a nih dawn hi' tiin rilru ka lo siam ngawt a.

Mahse, kan han inhrechiang chho zel a, kum lama naupang fal dun ta chu kan inpawh em em a, kawm a nuam a, a lo puitling em em mai chu lo niin. Pa Puia baka ka rinngam awmchhun a ni ta hial a, a fel famkim bik kher lovang, mahse, mi ṭha tak chu a ni alawm.

Ani chu Home-ah chuan a awm ve lova, tukṭhuan eikhamah school kal turin motor remchang leh Taxi hmang te'n a lo kal ṭhin a, chaw kan eilai aṭang hian a lo kalna kawng lam chu ka lo thlir fo tawh ṭhin a, ka hmuh loh hlek chuan ka lo ngai ṭhin hle a nih dawn hi.

Ni, chutiang chuan amah ka ngaihna chu a zual zel a, ani pawh chuan ngaihbel tur tingtang hian school chawlh a nin thu chu ka hnenah chuan a sawi ve fo asin.

BA chu a remchan dan ang anga chhunzawm leh tur chuan min nawr ngat ngat a, Sum leh pai harsat chu thuhran BA em chu ka pass zo tawh dawn emawni le, kan awmdan hian a zir bawk si lo tih rilru ka pu deuh tlat. Mahse, mi nawrluih dan a thiam em vang chuan IGNOU-ah huphurh ru tak chung admission chu ka ti ve leh ta rawih a, sum han sen tur em em pawh a lo awm hran chuang lova a tihzia hlauh.

'Ka hmangaih che' tih thu sawi awm hauh si lo chuan kan inngaizawng tawp a ni ber mai. Tuma tihpui leh i pawh awm lo chuan ka ngaihzawng hmasa ber chu ka nei ve ta ngei alawm.

A lakah ka lungawi a, engkim mai hian hlimna min pe ni ber hian ka hria, ka zinkawng zawh tawh te ka chhui let phei chuan ka hrehawm reng hi a phal tawh bik lo a niang tiin hlim takin ka hma hun tur ka ngaihtuah vang vang ṭhin.

Ruahmanna ka neih ve danah chuan BA ka zir chhung zawngin ka sum hmuh ang ang te khawl ila, ka pass ve thei hlauh a nih chuan mahnia awmhran te pawh tum ve ta ila tichuan Miss Muanpuii nen pawh kan innei ve thei turah ka ngai a. Chutiang chuan ka duhna leh ruahmanna te chu ka zam kawi ve nasa mai ṭhin a, ani pawh ka hrilh ve nghe nghe, 'a va la rei dawn ve' a tih sap tak kha maw le.

A chang chuan zanah a pualin hla te ka siam a, Pa Puia nen chuan kan zirdun chang te a awm ṭhin. Chutianga hla ka neih apiang chuan a tukah school chhaka chawlhbuk an sakah chuan guitar nen kan chhova ka sak sak ṭhin. A lawm thiam a, keilahin nuam ka lo ti bawk si. Khang hun te tak kha aw...

Zaina tur programme an veng lam hnaiha kan neih chuan a nau tlangval hruaiin a lo tel ve chang te a awm ṭhin a, an inah pawh ka chuangkai ve zeuh zeuh.

Khatih lai vel kha keini band pawh kan vanglai ve a ni ber ang chu. Local TV lamah pawh interview te pawh kan neih ve nual tak asin! Audio album te pawh kan siam ve a, TV lama pek chhuah tur video te nen kan tikim ve biai mai. A hunlai na na na kha chuan kan lar ve alawm Zoram chhungah kha chuan. Mahse, Home lama inkhuahkirhna ṭha tak vang chuan tumahin kan chhiatpui lem lo niin ka hria. Kan sum hmuh pawh Home tan a ni deuh ber mai a, a hmingin hlawh kan nei ve ang chauh a ni.

"Nizan in mu hma em ni a?"

"Mu hma love engati nge?"

"Ti vak love, vawiin kan zai dawn lo mi ka ti mai mai ania, i zai ka hre khat tawh em a," tiin a nui ver ver a.

"Ni zan chu ka ṭap a..." hul deuh hak chuan ka tichhuak a.

Rang takin min lo thlek thuai a, "Eng ngati maw?"

"Thil ka ngaihtuah nasa lutuk a, ka tetlai hun vel ka ngaihtuah pek alawm mawle. A hma zan khan ka pa te ka mumangah ka lo hmu a chu chu ka hrechhuak leh pek a."

"A nih chu mawle, a zia lo hle mai. Thil ngaihtuah let chiam hi a ṭul hun awm bawk mahse, a ṭul tam lo viau a nia," tiin min hnem zui a.

A bulah chuan naupang chhia ang mai hian ka awm leh fo ṭhin zawng a nih hi.

A tuka school a lo thlen veleh chuan, "Nizanah hla ka siam a sin," tiin ka lo hrilh thuai a, ani pawh chuan phur hmel tak hian, "Maw, ka va'n ngaithla chak tawh, chawlhlawk ni thuai thuai se aw," tiin hlim tak leh nghahhlelh hmel tak hian min lo chhawn a.

"Mahse, i beisei ang chu a ni lo mai thei a nia, pate ngaihna lam hla a nia."


"A pawi hleinem, a nalh leh ngawt ang, nizanah i ngaihtuah leh pek a ni maw?" A ti zui a.

"Nia, ngaihtuah a ni mai e. Mahse, ka ṭap tawh lo a.." ka tih chuan a nui sek a, "A ṭhat chu," a ti ve mai a.

Chhunchawlhah chuan Guitar nen chawlhbuk lam chu kan pan leh ta a, he hla hi ka hlaphuah hnuhnung ber a ni ang tih pawh ka ring phak lo.

Ka sak zawh chuan ka mittui a luang ngiai ngiai a, a romol chuan min hruksak a, ani pawh chu a mittui a tla ve a ni tih hai rual a awm lo. A mit a sen ram a, a mithnawih te pawh a lo hrupherh ve deuh niaih alawm.

Chu hla chu Audio casette ruak leiin kan Director Tape-ah dahṭhat atan tiin ka record ve ngei a, Muanpuii ka hrilh chuan min laksak daih, "Ka lo kawlṭha ang, ka ngaih che apiangin ka ngaithla bawk anga" tiin hnial ngaihna pawh awm lo chuan min chhuh daih leh nghal a, 'tibo miah suh' ka tih chuan a lawm lo lek lekin ka hria.

Pa Puia'n Guitar uluk fe hian min rem sak a, rythm keima'n ka perh a, Hollow guitar nen a zût lampang chi pawh muang leh lungkuai takin uluk fe hian a bei tho mai. Hmanrua duhthusam lo mahse rinai tak chuan a ngaihthlak tlak a, bakah ka tan chuan a hlutin a hlu em em bawk a ni.

Chutianga boruak nuam leh hlimawm tak hnuaia hun ka hman tak vang nge ni hun pawh chu a lo liam chak ve viau mai a, BA result a lo chhuak a, pass châk, inbeisei deuh si, beisei ṭha ngam si lo chuan ka ngaichang ru reng a, ka pass tih ka han hre chiah chu ka mittui a far zawih thei nia, ka nuna bungthar lo inherchhuak tur chu ka nghakhlel tak zet a ni.

FAHRAH KAN DUH LO: Chutia inngaizawng ve ta chu Home lamah kan lo tlatlum ve deuh tawh bawk nen kan inzuichhuak ve ta fova. Ruahmanna ka lo neihrûk tawh ang deuhin mahnia inbawl hran ve tum chuan hma ka la zui ve ta a, Muanpuii pawhin min phurpui khawp mai.

Home lama kan Director te berawn chunga ti ka nih vangin anni lam pawhin harsatna min thlen lo. Chu chu sawi loha lum ni ta se, an theihna kawng kawnga min ṭanpui chu an inhuam em em zawk a, mahnia ding ve thei tur anga ka awm ta chu min lawmpui a ni ber e.

Hna ka neih hma chu school lama tlawmngaih chhuaha thawk chhunzawm turin min ngen a, chu chu ka tih ngei ngai a ni. Chumi a nih loh chuan sum hailuhna mai tur ka hre dawn hauh si lova.

Chutiang vela hma ka lâk chhoh ve vang chuan pawnlamah pawh ka chhuah tam phah hle a, Muanpuii nen pawh thil ṭul leh buaipui ngai min buaipui ṭhin vangin kan inzui tam nangiang mai. An inah pawh ka chuangkai fo a, chaw em chu ka ei ngai lem lo.

Inluah tur te pawh kan be fel ve ta rup mai a, ka duhai chuan alian deuh a, a luah man pawh ka duh aiin a sang deuh a, mahse, amah Muanpuii'n 'tun' nilovin nakin thlir tur a tia, a lungthlûkna a ni miau si a, ka hnial duh ta lem lo mai.

Thlakhat vel inlakkhawm chhung nen chuan luahluh loh phawt ka rilruk a, chumi chhung erawh chuan mamawh zualpui tur tal chu ka inlamkhawm ve zel ang chu ka ti.

Chutia Muanpuii te in meuh ka chuan kai ve tak sekah chuan kan inngaizawng a ni tih chu zêp reng theih pawh a ni lova, mi pangngai chuan sawi kher lo mahila kan khawsazia aṭangin an lo man ve mai aniang chu.

Mahse, chu thil chuan a ṭha zawngin thil a thlentir chu sawi loh ka nundan thlengin a thlak thleng zo leh ta vek a!

An ṭawngkam leh min tihdan tam zawk kha chu hriatrengna lamah hian ka chelh duh lem lo, chu'ng te chu an fanu kalsanna tham chhuanlam mahnise, an fanu berin min duh miau chuan ka paltlang thei mai ang tiin ka intipaukhauh lui ve ṭhin a nih kha maw.

Mahse maw, 'FAHRAH makpa atan kan duh lo' tih kher kha chuan ka intih luhlulna zawng zawng min ṭhiah sak chiang em a ni! Kha thu ka hriat zan khan ka ṭap tlaivar ti ila ka sawisual kher lovang.

Min hnem a, minpui ṭhintu ber Pa Puia lahin Home a lo chhuahsan fel tawh bawk si, mal leh khawhar takin inchungzawlah chuan ka ṭhu tlaivar ta ringawt a nih kha.

Nat zual zel aichuan Muanpuii chu kalsan mai turin thutlukna ka siam ta a, thutlukna awlai tak zawng ava ni lo chiang tehlul em ve le.

Ka thil ruahman dan pawh buaithlak chin a awm ta, in ka luah hran chuan hna ka hmu mai awm silova School lama ka kalzui chuan Muanpuii nen kan harsatna chu a zual mai mai dawnin ka hria a, in chu luah hrang lo ta pawh ni ila chu ka harsatna chu a kiang dawn chuang si lo.

Awlsam leh ṭha bera ka hriat tak chu Home chhuahsana hmundang pembo daih a ni. Mahse, khawiah nge ka kal chuan ang? Chu lo chu duhthlan tur dang ka hre chuang si lo. 'Khawiah nge?' tih chhanna chu khawi khaw motor service-ah emaw a awm ang.

Zingkarah chuan kan Home Director pindan lamah chuan huphurh ru angreng takin ka kal chho hnak hnak a, engtinnge ka inphatmar ang tih ngawt chu a ni ka ngaihtuah ni.

Thingpui a lo inmêk a, ṭha takin min lo dawngsawng e ti lo chuan ka huphurhna chu a kiamphah der si lo.

"Ka inlâkchhuah fel hmain ka nu thlân tlawh ka duh deuh a..."

"A nih tak chu, inkhua kha eng nge ni i tih khah?"

Ka nu awmna khua zawt lova kan khua min zawt daih chu ka lawm kher mai, 'unau te pawh ka nei ve-in ka ring a, zawnchhuah te pawh ka duh a..' tiin ka sawizui a.

"Ni e tiraw, puitling i ni ve tawh a, chu chu thiltih awm tak a nih chu," tiin thu ṭha tak tak min fah hnuah a phalna thlapin Home chu ka chhuahsan thei dawn ta niin a lang.

Mahse, Muanpuii hmu lova kal liam ringawt chu ka hreh tak zet a ni. Tukṭhuan eihmaa chhuah tum ka ni nâin tukṭhuan chu ka ei leh phawt a, Muanpuii School lo kal tur chu kan awmna building chung aṭang chuan a hmuh theih loh tur si hian ka lo thlir reng a, ka rilru chu a na tak zet, ka mittui tla tur chu ka dang hram hram a ni ber mai. Fahrah nih hi a lo va rapthlak ngai ve le!

Chumi zanah chuan Pa Puia te inah ka va riak a, ka inluah tuma bungrua tlem ka dahluh ve te chu min lo tihral sak mai turin ka hrilh ta ringawt a, Home lam pawh ka awmdan tur lo va hrilh mai turin ka chah a, ka awm tum dan ka sawi chuan a ngaih dan a ni lo nasa mai. 'Kan hnenah hian awm mai rawh' te a'n ti ngawt a, thil ṭha ber a ni si lo. Ṭha taka lêt leh ka intiam hnuah chuan harsa ti fe-in a pawm ve ta hram a, lêt hun tur erawh ka sawi duh bik ta lo!

HRIATLOH VANGKHUA : Zîngah chuan ka lu ka mehkawlhtir vek a, ka thuamhnaw tlem a zawng, ka pawisa neih zawng zawng leh ka Hollow Guitar nen Pa Puia chuan an kawt aṭangin min vailiam a, ka kalna chin a hriat ka duh loh vanga motor thlenga inthlahtir duh lo ka ni. Pa Puia lehzel ka mangṭha chuan ka rilru a tino thar leh a, khawvelah hian mal ngawih ngawih hian ka inhria a, ṭapchhuak lo turin ka heh chu ka pet fan fan a, ka mittui erawh ka dang zo ta ngang lo a ni.

Sumo tukverah chuan ka dâk vauh vauh a, ka lung a leng ngawih ngawih a ni ber mai. Muanpuii'n ka kalsan tih a hriata a tawrh dan tur te ka ngaihtuah kai zel a, ka bîng mum mum hialin ka hria. Ni e, ani nen khan hmangaihna hruikhat chu kan vuandun ve chiangin ka hria, a thianghlimna chenin ka tan a hlan si a.

Ka chuanna sumo neitute khua aṭang chuan ka nu te khua chu ke a kal ngai, kilometer 20 vel zet tur niin an sawi a, ka huphurh viau nain ka thisen zawm ngei, ka nu hrin ka farnu a awm tih ka hriat vangin chu chuan huaisenna leh tumruhna min pe viauin ka hria. Ka putea khan ka nuin fanu pakhat a boralsan thu a sawi miau alawm le.

Sumo chu tlai dar 4 velah chuan a ding ta lawih a. Ka chuanpuite chu mahni khuaa thleng an nih vangin an chhungte'n a ṭhen an lo hmuak a, an ri le lu mai a, keive chu mautêl kara pawhdawk bik ang maiin ka ding mal leh ta viau mai.

Mualzopui khaw kalna kawng chu ka zawt chawp a, chiang fe a kawngpengṭhuam nen lam ka zawh kêlh hnuah chuan khuain min thimhnan tur pawh pawisa lovin ka inchhep chhuak zui ta a, kawnglakah meichher tur ka dap pah mai ang chu tiin ka bag leh guitar hnungpuak chuan ka kal vang vang a.

Motor kawngpui pangngai, blacktop loh hi a ni mai a, motor service pawh an nei lo emawni le ka ti rilru nauh nauh a. Chhanna erawh min hrilh tur an awm lo thung.

Thui fe ka kal hnuah chuan ka hmalamah hian nui thawm niawm tak hi ka hria a, 'mahnia kal ngawt aichuan umphak ila an ruala kal te pawh a nuam ang chu' tiin ka theihtawpa chak chuan ka um a. Ka umpha mai dawn emaw ka tih hnuah pawh chuan umphak tih a awm thei reng reng lo mai a, an thawm lah ka hre zauh zauh bawk si. A tawpah phei chuan ka umbuai duh ta lova, khua lah chu a lo thim fel der tawh mai bawk si.

Ka hmaa mi te ka umna lamah khaw awmdan pawh ka lo ngaihtuah hlek lo a ni awm asin mawle.

Meichher tur han dapkhawm mai tur pawh hmuh a har viau tawh mai a, ka eng neihchhun lah chu lighter a ni tlawng mai a, vanvâr ringin kawngpui dung a ni hrim a ka kal thei mai mai chauh a ni.

Kawnglakah mi meichher bung, tawngchen vel tur hi ka rahhrualna lamah ka hmu fu hlauh a, lighter hmang chuan tihnun ka han tum a, a har ngat ngat khawp mai. Hnahthel ro te ka hamkhawm hnu-ah chuan ka ti alh ve thei ta hram a, meichher ka neihlai hian a thui thei ang ber kal a ṭha ang. A dang tur melh pah bawk ta ila.

Thui pawh ka kal hman lo, meichher tur tak ngial pawh ka lakkhawm hman hma chuan ka rin loh tak maiin khawchhung chu ka lut deuh thut a, ka thawhuai mai nia mawle.

Mahse, ka nu pasal hming pawh kha ka hre tawh lo, a fanu hming phei chu ka hre lo lehzual, engtinnge ka zawn ang aw..

In lo hmasa ber kawngkhar chu ka kik ta kauh kauh a, 'lo leng rawh u,' an tih hnuah chuan ka lut zui a, mak min tih hmel teh asin!

"Ka pi, Pi Mawizuali boral tawh kha, khawilai nge an in a awm le aw?" tiin ka zawt ta chawt a. Ka pi ka tih thlâk ngawt chu ka han enchiang a, nulat pawh ala inti nula lovang tih tur rual lek hi a lo nia, a pawi chuang love.

"Ka van hre love, ânu tunge Pi Mawizuali? amah chu a boral tawh?" tiin a nu a auzui a.

"Ka va'n hre mai love aw... Hmingtei nu kha a ni mai lo maw le, a hmingpum ka lo hre miah lova, Zuali kan ti mai ṭhin kha a nia," tiin inbual zo tih hriat taka sam huh, pheng tih hriat zet mai chu a lo khuih chhuak chawt chawt a.

"A chhungte hming hriat i nei em?" a ti zui a.

"Aih, nei miah lo," ti a chhân ka ngai chu a hrehawm ka ti kher mai.

"Amah chu khawdang aṭanga pasal lo nei ania, a boralna chu a rei tawh angreng a.." tiin an hriat theihdan tura ka rin chuan inthlahrung angreng takin ka sawi leh a.

"Hmingtei nu a nih dawn chu, an chhungte em ni i nih a?"

"Aw ni e, a boral vel khan kal thei kan ni chiah bawk silova, remchangah a thlan tal tlawh ve ka duh deuh a," tiin ka chhang ve mai a.

Ka farnu chu Hmingtei a nih awm chu maw. Eng hmelpu tak niang maw, ka hmuchak tawh kher mai.

"Engtin nge an in awmna ka hriat theih ang, min kawhhmuh lawk thei ang em?" ka ti leh a.

"Mami, i lo va hruai mai dawn em ni. A..! Ngawiteh, an veng lamah ka phei dawn tho a, min lo nghak lawk mai rawh, hei ka insiam mek a.. Mami thingpui te lo thlit la, chaw pawh ala ei awm si lo," a ti zung zung a, ka ril a ṭam ve angreng phian a, chhuanlam pawh ka siam nawi buangbar lo. Thingrem hnûm hlurh mai chungah chuan ka ṭhu a, thingpui senthlum chu tui ti takin ka lo inkhalh khalh a. Kua a dawm ta deuh e.


Ka rinai takin a muang reuh ka ti!

Kan inzui chhuak ta chu a fanu chuan min enzui nasa viauin ka hria. Eng hmuhin nge maw min hmuh ber ni.

Zan thil a ni deuh bawk nen an khawthleng awmdan leh eng ang nge an nih chu ka hrethiam thei hauh lo, current te chu a awm ve bawk nâin khawthleng pum en chuang hek lo le.

An khaw chanchin te chu ka zawt nual a, ka duhaia thui a sawi, ka ning hman deuh alawm le! Vêng hulum deuh lai chu kan kal pel leh ta zel a, kan kal pelh te chuan min thlek zui nasa hlawm khawp mai. Guitar ka ah deuh ṭup vang chu nge, mikhual ka nih vang hrim hrim pawh ka hre lo.

Ka nu te chhungkaw chanchin chu hriatlawk ve deuh ṭul ka tih vangin ka han zawt deuh thuak a, "Mi pangngai tak chhungkua chu an ni ṭhin alawm. Mahse, Zuali boral hnu khan a pasal khan nupui dang a nei leh a, a nei fu vak lo niin ka hria, kan ral hriat deuh mai hi a nia, chiangkuang chuan ka hrebik lova," a ti a.

"Chutia nupui dangte a neih tawh chuan han thlenchilh ngawt pawh chu ava fuh lo kai awm ve?"

"A, chutiang lamah chuan harsatna a awm pawh ka ring hran lo. Hmingtei pawh a nula ve tawh a, ani i behchhan ve te pawh a mawi ang chu. Engemaw harsatna i nei a nih leh kan inlamah i lo phei dawn nia," tiin min thlamuan zui a.

Thui vak lo kan kal leh hnuah chuan kawngchhak lama in hi min kawh hmuh a, keimaha chhoh mai ka tum chu min ngaihtuah deuh aniang, 'ka lo dah ang che, mahni chuan a nuam lo palh ange,' tiin min chhohpui zui a.

"Sangpuii nu, in awm em?" tih leh kawngkhar hawn chu a rual a, inchhung lama nupakhat lo awm cyuan min lo en ran a. Awmdan thiam a har kher mai.

"Hei Aizawl lam aṭangin mikhual in nei dawn a nih hmel e," a ti zui nghal a. Tapchhak lamah chuan nu pakhat hian vawkchaw tur niawm tak bâl hi a lo chan mek a, a thil chan lai dah meuh chuan min thlek leh a.

A pawnfena a kutbal han hruk zauh pah chuan a lo dingchhuak a, "Inchibai ila," tiin a kut chu a lo phar chhuak a, kan han inchibai fel hnuah chuan ka bag leh guitar te chu kan bula ṭhutthleng sirah chuan ka hung zui a, ka kalpuinu chuan, "U Rovi damlo ka tlawh dawn e ka tia, ka kalsan ang che u," tiin kawngkhar lam chu a pan zui a.

Kan pahnih chauh chuan kan awm ta ran a, chu nu chu ka nu pasala nupui thar chu a lo ni a, fa pahnih middle school kai lai hi an nei a, Hmingtei nen, an chhungkua chu panga an ni tihna a nih chu. Keiin ka belh leh ta bawk sia, a parukna atan!

An ṭha khawp mai hun eng emaw tichhung kha chu. Mahse, hrin hrang ta chu inngeih reng a lo har a niang harsatna kan nei ve leh zauh ṭhin a, keichu mipa ka ni a, hmaichhanah phei chuan min sawisel lo a ni deuh ber a, mahse, ka farnu Hmingtei an enkawl danah chuan ka lawm vak bik lo a ni.

Kum thum dawn an hnena ka awmchhung chuan an thawh ang leh tih tur an tih ang chu ka ti ve mai zel a, ka vanneihna aite pawh a niang High School an dintharah chuan zirtirtu atan min la ve hlauh mai a, Private school mah nise sum lut awm ve reng ta chuan kan chhungkaw khawsak phung pawh a tiziaawm ve viau a, In te pawh kan saṭha ve thei ta.

Mahse, ka nu leh ka farnu inkara neuh neuh awm ṭhin chu hahthlak ka ti kher mai. Ka pa nen chuan khûnkhan takin kan ti ti dun a, kan unau chuan inluah hran kan rel ve ta rawih a, lungawi lo anga inchhuahsan kher chu a ṭha lo ka tih vanga indan pawh sawi duh lo kha ka ni a, ka pa berin chutia rem min tihsak takah chuan ka lawm kher mai.

Mi inhnuai luahin kan unau chuan kan invawm hrang ve ta rawih a, kum 5 Mualzopui khuaa ka awm kum chiah a ni ta awm e.

Chuta ṭang chuan inhmun te dil ve-in in te kan sa chho ve a, ka nau thlamuang taka a a awm ka hmuh chu ka lawmna ber a ni hial awm e. Ka nu thlan tlawh kan ching lutuk erawh chu thil ṭha ber a ni lo khawp mai. Kan fahrah zia min hriattirtu mai a ni ṭhin si a.

Nupui neiturin ka nau chuan min ngen fova, mahse chulam chu ka hawi fahran lo khawp mai. Ngaihzawng ka ngaihtuah apiangin Muanpuii ringawt ka rilruah a lan zel vangin ka ngaihtuah buai peih lo. Nakinah a hun a lo thleng ve mai ang chu.

Ka nau te (ka pahrawn fate) chuan min han ngai thei khawp a, kan veng a lo inhlat deuh tawh bawk nen kartawp lam hi chuan riak turin an lo kal nal nal ṭhin a, an lo leikan huna ka thlavang hauh tur unau ka nei tih ka hriatna chuan min ti thlamuang ve ṭhin khawp mai.

Ka chenchilh tak vangin Mualzopui khua chu a changkan chakdan ka lo ngaihtuah ngai lova, ka ngaihtuah let chuan khaw hmasawn chak tak a ni tih ka hre thei a, motor service chu sawi loh, motor hrim hrim nei pawh an awm fur tawh a, kan High School pawh Sawrkarin an lo la ve bawk nen, chu khuaah chuan ka nghet ta viau mai.

Ka nau chuan Aizawl lam aṭanga lo kal, kan school-a lo thawk ve hi pasalah a nei a, an inchhar dan pawh ani hmelhriat nei lo chuan min rawn bel a, chuta ṭang chuan an lo induh chho a ni ngei ang. Reipawh an inzui lo, an innei zui mai a.

Party lamah an lo tlana deuh nge mawni Aizawl lamah a in transfer tir daih leh ta nghal a, keimah chauh chuan ka awm ta rak rak a. A khawhar thlak khawp mai. Ka naute awm lo phei sela chuan a hrehawm viauin ka ring.

FAPA KA NEI MAW! : Tichuan, chu khuaa kum 15 zet ka awm kumah chuan a ni kan thubul ṭanna khi a lo irhchhuah tak ni.

Zanriah ka kil hmain Lawmsanga nu zu ka leisak chu tlem ka in a, zanriah ka eikhama ka lenchhuah peih loh chuan guitar te ka perh a, a nih loh leh TV te ka en a, nula rim lam a lang vak lo. Chu chu zan hun ka hmandan tlangpui chu a ni mai.

Kuhva ka neih loh vang chuan ka inpiah maia dawr lam pan chuan ka chhuak phei a, pa berin thingpui hâng ina min sawm vang chuan an inah chuan ka ṭhu lut ve mai a, TV en an lo bawr deuh ṭai mai bawk.

Local channel en tur a awmloh vangin Doordarshan leh VCD player hmanga an chhuah ṭhin chu en theih awmchhun a ni mai a, chutia an bawr hnaih viau danah hmuhnawm deuh an neithar a ni awm mange.

"TV hmaah khan ding ṭhin suh u," tiin inneitupa chuan tapchhak aṭang chuan ava auva, naupangho pawh an ṭhu fel ta ṭhap a. Chiang takin TV lam pawh kan thlir thei ve ta.

"Tunlai hian Aizawl lamah Talent Search an ti a ni awm e, sawlamah chuan an ngaihven khawp mai. Local channel-ah an pechhuak bawk si a, kan Pu Ringa fanu pawh a lo zai ve a ni awm a, saw an zai zan a mi disc apain min hawntir a.." tiin a sawi chuar chuar a.

"A nih tak chu mawle," te ka'n ti ve taknain ka bengkhawn vak lem lo thung.

"Tunge i hming le?"

"Rinawma Jr."

"Eng ngatinge Junior tih i dah tel kher?" tiin Host chuan chu rawlthar chu a zawt leh a, "Ka pa hming a nia, ka ṭawm ve a," a lo ti mai a.

"A nih leh tunge i hming pangngai?"

"Rinawma."

"Rinawma ve tho maw!?" tiin a la zawt zui zel a.

"Aw"

"A nih leh eng nge zaninah hian i rawn show dawn le?"

"Instrumental music."

"Awle, duhsakna ka hlan a che.."

Instrumental music a tih vang chuan mahni tui zawng na na na chu ka bengkhawn ta viau a, TV lam hawi chuan ka inher rem zui ve nghal a, a hmel chu ka hmuh hnu niawm tak a ni. Mahse, chutiang rual chu hriat ka nei awm hauh si lo.

Electric guitar kuahin stool-ah hian a ṭhu fel at a, microphone a siam rem hnuah chuan heti hian a ti zui a.

"Pa, he hla hi i phuah kha a ni a, i pa ngai em em a i awmlaia i phuah a ni tih ka hria e..." a ngawi zui vang vang a, rilru a khawih reuh kher mai!

"He hla hi i lo ngaithla a nih chuan i fapa hian ka ngai che a ni tih i hriat ka beisei. Ila dam a nih chuan pa, khawngaihtakin aw.." naupangho chu an inhru fap fap tih ka hria, hriau pawh tla se a ring viau ang tihtur khawpin thawm an nei lova. Kei ngei pawh chu fahrah nun dai tawh ka nih vang chuan ka mittui a hnai hle a ni tih ka hai lo.

A mittui a hru a, a romol a ah fel hnuah chuan a guitar chu a ti ri ta a.

Ni lo!! Chu hla chu ka phuah asin!!

Ka ngaihthla ngam tawh lo, ka ding thut a, min ngaihven nge ngaihven lo pawh ngaihtuah lovin ka tlanchhuak ta daih a nih kha. Chak takin ka inlam panin ka kal a, ka ngaihtuahna chu a bîng mum mum thei! Ka fapa maw ani kha? Muanpuii khan nau a pai maw!!?

Awm ngaihna reng ka hre lo a ni.

[Ka Ṭingṭang, ka khumbul mai ṭhutmutna ṭhutthlenga ka dah chu ka ban thuai a. Tuktin leh zantin deuhthaw ka kuaha ka zaipui mahnise khami ṭum kher kha chuan ka hlawhchham chiang kher mai!

Ka kut a khur a, thlanfimin min bawh huh hlup tawh a, theih chu nise ṭah tlawk tlawk mai ka va han chak tak em! Ka hmai hupin ka insehruh ngawt ngawt a, khawvelah hian ka leng lo ni ta berin ka hria.

Pawnah ka chhuak a, inchhungah ka lut leh a, khawilaimah chu ka tan hmun nuam a awm lo. Ka sahal huam huam a ni ber mai.

Ka khum pindanah chuan ka lut leh a, khum chhaklama almirah chu hawngin tlaia ka zu inbang chu ka lachhuak a, a thlit ringawt pawh ka harsat a ni ber mai. A in te chu khawilamah hian a ni ringawt! A no chawp chuan bangkil vawm nan a ni ka hman tak ni.

Tlaiah khan a kai nuam tawk chauhin ka in a, zanriah eikham hlima ka lengchhuak kha darkar khat pawh ka thang hmain ka kir leh a, tunah chuan kai nuam tawk chu sawi loh in lo ang hlauh ka ni. Ka harh mah mah zawk. Ruichhum hmawk thei ila chuan ka phurrit hi a ziaawm zawk mahna. Mahse, farkhat pawh ka lem belh thei bawk si lo!

Rawlchhuah meuha duhtawka ṭah hawm hawm mai a ni ka chak ber chu ni.

Engngatinge ka lo va chhuah kher kher le? Kha thil tawng lo tur khan inah lo inkhung mai ila ṭha tur asin.

Kum rei tak chu lungmuang takin he khuaah hian hun ka hmang ve tawh. Ka nunhlui ten min vuak lét ve deuh avangin nupui neihlam hi ka ngaihven teh chiam lova. Duh ila, tum ni ila chuan mahni tumtawk te te chu ka hmu ve chuan ka hria. Mahse, ka rilruah a awm thei tlat lo.

In, parawl in atana lian lam mah tur hi ka pualin ka nei ve a, eizawnna kawngah pawh High School-ah ka thawk ve bawk a, ka inenkawl ve thei viau. Chuvangin ka khawvel hman mek chu hrehawm a ni hauh lova, nunhlui te ka theihnghilh ni a tam zawk avangin ka nun chu a nuam chhawm ve a ni mai.

Kohhrana inhmang tak a ni chu min ti hauh lovang le. Sunday school te chu ka kai ve hram hram a, Pathianni zan te pawh tihfuh zanah chuan inkhawm pui chang te pawh ka nei ve ṭhin alawm. Zu in zeuh zeuh ka chin vang hian a kohhran ang zawnga rual pawl chiam chu ka inthlahrung ve deuh ṭhin niberin ka hria.

Chhin khat pawh chhing lovin chu zan chu ka tluan ṭhak a, zingah hmatakah inbualin ka tihtur hre lo chu ka vakchhuak a, khawlai dung tluan mai pawh chuan min daih lo, kawngpui dung zui chuan ka kal kal ringawt mai a, dâi thlengin ka kal tak hial chu.

Mahse, chu zingkar boruak tharlâm chuan ngaihtuahna thar min pe thung a, ka fapain ṭap chunga a zawn a pa chuan ka pan dawn, ka fapain pa a nei tawh ang a, keiin fapa ka nei tawh bawk ang. Chu thutlukna ka siam lai chuan ka biangah mittui a luang ngiai ngiai a, zing nichhuak engphût mai hnuaiah chuan ka fapa awmna lama zinchhuah tum chuan ka inlam panin ka kal ta hlawk hlawk a.]

SURPRISE: Kan Principal hnenah Aizawl lama kal thut ka ngaih thu chu ka hrilh hman awrh chauh a ni. Tichuan, Sumo chuan Aizawl lam pan chuan min tlanpui ta vang vang a. Ka ngaihtuah kual nasa lutuk chu a tawpah phei chuan ka mangang zawk lek lek a ni.

Kawnglaka chaw eia chawlh te chu rei hi ka ti mai mai khawp a, ka thin a lo rim deuh ṭun thei nia mawle.

Ni tlak ruaiah Aizawl chu kan lut a, ka naute inlama innghat tur mah ni ila Pa Puia hmuh ṭula ka hriat vangin an inlam panin ka kal hmasa a, an in te chu an lo sa thar diai tawh a, a zamawm deuh rum rum mai!

Verandah-a putar lo ṭhu chu, "Ka pu, hei hi Pa Puia te in kha a ni em aw?" tiin ka zawt a. Mi chhang ta mai lo chuan chîk zet mai hian min en zet a, chutah muang fân raih hian ka rin loh tak maiin, "Rinawma.." a tichhuak sup a.

Amah chu Pa Puia lo ni rengin! Kan inhmuh hnuhnungber ang tura ka ngaih tlat vanga hre lo mai ka lo ni. A sam a lo tan tawh bawk nen.

Kan han inkuah thuak thuak a, lawm avangin kan biangah chuan mittui a luang hial asin. A tan chuan fapa tlanbo thawthâng kha ka ni miau mai si a. Ka tan lah 'pa'.

Sawi tur kan ngah lutuk chu sawi tur kan hre lo a ni ber zawk ang chu mawle.

An in aṭanga ka naute ina insawnchhuah chu a lo phal ikhaw lo mai a. Ka bag chu amah chuan pindan lamah a keng lut hmak mai!

Zanriah an chhungkaw zinga ka kîl lai chuan ka kalchhan chu ka sawichhuak ta a, an bengkhawn kher mai. Mahse, ka fapa ngei anih leh nih loh ka chian ngam loh thuin ka tlip a.

"I hlaphuah chu a ni ngei a maw?" tiin Pa Puia chuan min zawt a.

"Ni e, ka chiang alawm. A music pawh nangma siam a nia, Director tape-ah kan han record nghe nghe kha, kan record kha Muanpuii khan min laksak daih a.." ka tih chuan engmah phei chu a sawi zawm lem hlei lova.

A fapa naupang ber chaweikham tawh hnenah chuan, "Valpui, i u kha phone la a ranglamin lo kal teh se," a ti zui daih a. Min ngaihvenpui vak lo niin ka hria, ka lo sawichhuak kher a ni.

"Pa, kan buai viau asin, a pawimawh viau em a ti?" tiin Valpuia chuan a pa chu a lo hrilh leh a.

"Pawimawh, tuna an thiltih tur atana pawimawh," tiin a lo chhang hmak a. A nelawm loh ngai reng ala ni mai ka ti.

Ka inthiar zo bathroom aṭanga ka chhuak chu Pa Puia fapa upa ber Thlenga chu a lo lut ve mek bawk a, min hriat hmel tawh chiah loh vang chuan ka insawi duh ta bik lova.

A nu leh pa pindan lamah chuan a lut tlang nghal daih a, eng emaw pawimawh tak an sawi a ni chêk ang chu. Engmah lah ka hriatpui ve bawk si lova. Lo bengkhawn viau chi lah a ni hek lo.

Pawna zial ka lo zuk vang vang lai chuan Thlenga chu a lo chhuak leh a, a bike tlawhnungin hmanhmawh hmel fe chuan a tlan liam nghal daih a.

A hnu deuhah Pa Puia chu lo chhuakin Guitar hi a lo khaichhuak vu vu a, ka bula herhsawp chu ka lo bansak thuai a.

Ama'n a perh dawn emaw tihlaiin Guitar chu min pe a, "Ka khawih khât ta hle mai. I hla sawi chu han sa chhin teh," a ti zui a.

Ka han sa ve mai bawk a, a chang tawp ber erawh chu ka hrechhuak zo ta der lo nia mawle. A lo rei ta deuh aniang.

"A nih eng tinnge Guitar a kal?"

Chu chu ka bel lo leh ta, a kawng hmang awm deuh chu ka la hria, ka ti thei sawih sawih a ni.

'Khawmaw,' tiin guitar chu a lo ban thuai a, amah chuan a perhzui ta a, bahlah hlek lo chuan a remchhuak thei ta, mahse, a kutthlâk chu tunhma nen a inthlau kher mai. Ka khawih khât a tih chu awih loh sak ngawt chi pawh a ni ta lo.

Inchhung lama luh zai pawh rel lo chuan kan pahnihin verandah-ah chuan nunhlui ram lam kan suartluan dun leh ta ngial a. An nu pawhin pawnah min ṭhutchilh ve ta hial a, a lunglen thlak mang e..

Mahse, a tukah erawh ka lawm lo viau thung. A chhan chu fapa zawnchhuah tumin ka thawkchhuak ve a, ama duhna lamah ringawt min hruai kual ta mai a. Ka sawi lah chuan, "Hmanhmawh suh," a ti mai bawk si.

Chawhnu lamah chuan ka hman ve tawh em ang chu maw tiin ka la inruahman hram a, chu lah chu an pindanah min luhpui leh ta mauh mai bawk si.

Mahse, ka rilru chu a her danglam chiang viau a ni.

A Tape Recorder chu a lo khai chhuak a, chutah chuan amah nena kan hla record original ngei mai chu a lo play ta teh rengah! Sawi tur a vang viau, mittui nen a ni hun ka hman tak ni.

Guitar min pe a, "A ngai ang chiah khan 'play' thei turin inzir rawh," tih chauh chu ka dawn a ni leh mai.

Thingpui leh eitur annuin min pe a, amah chuan ka zirlai chu min rawn enpui zeuh zeuh chauh. Mahse, ka hriatsa anih vangin harsatna ka nei hran lo. Ka bel thuai mai.

Chhuah ka duhthu ka sawi lah chuan "Zanah programme pawimawhah ka hruai ang che, vawiin chu la chhuak lo mai rawh," a ti leh tlat bawk si. Keilahin ka hnial ngam der bawk si lo.

Tui lo zet chuan zanriah te chu ka kilpui a ni ber mai. Ka rilruah 'fapa' bak a awm lo.

"I duhthusam thlapin han inchei teh," tih thu chu Pa Puia hnen aṭanga ka dawn a ni. A nupui, Nu Sangtei nuih a lo za na sa mai.

Zanriah eikhama an motora kan inphurchhuak chu eng programme-a kal tur nge kan nih ka hre ve bawk si lova, rilru siam thiam a har kher mai. Pa Puia lah chuan engmah a sawi lem bawk si lova, zawt mah ila min hrilh chian duh pawh kan rin loh vang chuan ka zawt buangbar peih lo mai.

Hall thar ve deuh pakhatah hian min hruai lut a, kan ṭhulut mai dawn emaw ka tih lai chuan green room lam pan chuan min hruai ta zel a, Pa Puia hian eng emaw tak chu a ti dawn a niang ka ti ta vel mai mai.

"Zanin hian i fapa nen in inhmu dawn a, i hla kha zaninah stage-ah min play sak dawn nia," ti a min hrilhtu chu Pa Puia fapa Thlenga kha a ni a, chu thu chuan min ti hrilhhai kher mai. An Talent Search-ah inlan turin ruahmanna min lo siam sak a nih awm chu mawle.

Ka ngaihtuahna bing mum mum lak ata chu Pa Puia min fuihna hrang hrang te chuan a kaiharh zel a, ka fapa nen lah chuan inhmuh lâwk min phalsak der bawk si lo. Chu hun chu engtia hmachhawn tur nge ka hrethiam lo kher mai.

Show chu an ṭan mawlh mawlh tawh a, keini chu a tawp bera hun hmang tur kan ni. Midang show nei tur chu ka hmu nual, mahse, ka fapa leh a nu awm ang chu hmuh tur an awm ve lo. An lak ata dahhran ka nih miau avangin. A hun lo thleng tur chu sakuh ser nghah ngawt ngawt mai loh chu tih theih dang ka nei lo.

Mawngkham urhin kan ṭhu tawh, ninawm lamah a kal ṭan ta. Guitar te chu ka'n khawih leh ringawt ṭhin, han perh rik chiamna hun a ni si lo.

A tawpah chuan kan hun a thleng ve ta hram a, dar 10:00 a ri hial tawhin ka hria.

Green room a TV an dahah chuan ka fapa chu a lo lang ta a, a t-shirt hmaah chuan kan vanglai, kan zai ṭhin laia ka thlalak chu lian leh fiah fe mai hian a innemkai kulh mai a, chu ringawt pawh chuan ka thinphu a ti rang tawh. Thlenga chuan ka tihdan tur chu min hrilh mawlh mawlh a, ka bengah chuan a lutnain ka hriatrengna a thleng em chu ka hre hauh lo.

Ka fapa Rinawma Jr. chuan kan hunlaia kan band hla bawk a play leh a, ka awm hle hle thei tawh lo.

A play zo chu kutbeng thawm a ring kher mai. An host hmelṭha leh zei tak lo penchhuak chu TV aṭang chuan kan lo thlir ve reng a, ka bula awm te chuan, min fuih mawlh mawlh ni hian ka hria.

"Zanin hi Grand Finale zan a ni a, pakhatna nih i inring em?" tiin ka fapa chu a zawt a.

"Helaiah hian pakhatna nih tuma lo kal ka ni lova, ka pain ka zawng a ni tih hi hria se ka duh vanga lo tel ve chauh ka ni. Hetianga Final hial thleng thei tura hunṭha min petu Judge te chungah ka lawm hle a ni,"a tih chuan mipui lam chu an thum deuh mam mam a.

"I pa chuan i zai hi a hmuh i ring em?"

"Tunah hmu lo mahse engtikah emaw chuan a hmuh ka ring, ka ring ve tawp."

"A nih leh tunah hian i pa chu i bulah hian lo kal ta thut mai se, engtinnge i lo lawm ang," ti a zawhna chu hrilhhai hmel tak hian a melh reng ringawt a.

"Zaninah hian thawnthu pawh nise thawnthu lungchhiat thlak leh run thlak tak mai tur chu kan lo hre ta a, Rinawma te pafa chanchin, thlirtu mipui ten hnukulh ṭeuha kan thlir ṭhin leh a pa hmu ngei tura kan duhpui em em chu engtin nge a kal zel i lo thlir chhunzawm ang." A tih chiah chuan Thlenga chuan min lo signal zauh a.

Ka guitar chu ka thai ri ta!

Kha kan record original ang ngei mai khan guitar chu ka play chhunzawm a, TV a lo lang ka fapa chu a hawiphawk hle tawh mai. Keipawh chuan ka guitar play lai chu ka theihnghilh ṭep ṭhin a ni.

Ka sir maiah chuan Pa Puia'n guitar dang hmanga back up min lo pe tih ka hriat veleh chuan dawhsan lam panin green room lam aṭang chuan ka kalphei zui nghal a. A nihna takah chuan Thlenga min signal hun nghak tur ka ni. Mahse, ka dawh hman tawh si lo.

Guitar harsa ti tak chunga play chung chuan stage chu ka va dakchhuak a, ka fapa chuam mipui lam a lo hawi daih vangin min la hmu mai lo. Mipui lam authawm leh kutbeng thawm ring lutuk chuan a ti chi ai deuh a ni mai thei e. Min han hmu chiah chu a microphone ken chu a thlauh tawp a, a din ngai chuan dingin thlarau hmu ang mai chuan min melh ta reng a, kan sir lama Muanpuii lo tlanchho ka hmuh leh lek phei chuan keimah tak pawh chu ka inthunun zo tawh lo. Ka guitar chu ka dah lawk a, an lam pan chuan ka kalphei rang kher mai.

Rinawma Jr. nen mittui tla zawih zawih chunga kan inpawm lai chuan anu chu kan bul maiah chuan a lo ding reng a, ka fapa bianga mittui luang ka hruksak hnuah anu lam chu ka hawi a, inthlahrunhmel tak hian min lo en reng a.

An nufaa ka kuah vawng vawng lai chuan Livetelecast a ni tih lam reng ka rilruah a awm tawh lo.

Kum 15 hnuah chhungkua chu kan insuihkhawm leh ta...

He ka Perhkhuang hi awm lo ta se keini chhungkua chu kan inhmukhawm leh kher dawn em ni? Kan chhungkaw tan chuan 'Rohlu' a lo ni e.

Post a comment

  1. Ka story hi eng ngati nge in post ve ngawt a?

    ReplyDelete
    Replies
    1. Whatsapp leh Facebook velah kan hmuh ho hi kan lo senglut thin a. A ziaktu hming nen kan dah thin. Blog/website ah i dah nge chu kan hre lem lova, kan lo dahtha ve tawp. I duh loh chuan kan remove nghal thei.

      Delete

Powered by Blogger.