CHUNGCHANG PU LALDUHOMA THUSAWI ZPM OFFICE NI 18.5.2018: Citizenship Amendment Bill 2016 hi Parliament-in a pass vaih chuan, Budhist leh Hindu ni ve lo ho hi chu rei loteah min chimral mai dawn a, India hi kan tan awm rengna tlak pawh a ni dawn lo tih leh Chakma ho an lo lut hum hum mai dawn a ni tih hi kan hre vek tawhin ka ring a. Tunah hian Chakma Pawl din thar JSS (Jonow Shongaty Somiti) te chuan Chakma District Council huam chhung leh Chittagong Hill Tracts chu Chakma rama siam tumin, Independent an sual mek a. Chuvangin, he Bill hi a bik takin Mizote tan a hlauhawm ber a, thawm pawh nei ring ber tur hi kan ni.

He Bill hi pass lo tur leh, pass a nih pawhin keini chu min huaptir lo turin, ni 16.8.2017 khan, Chairman, JPC hnenah, ZNP President ka nihnain Memorundum sei tak ka lo thehlut tawh a. Pu Lalhmangaiha Sailo pawhin, MPC President a nihnain Memorundum tha tak a thehlut tawh bawk. 

NGO Co-Ordination Committee pawhin ni 5.9.2017 khan, Delhi-ah, Pi Kalpana Sharma, Joint Secretary, JPC hnenah Memorundum an thehlut bawk a. Hemi ni hian Pi Kalpana-i chuan, he Bill dodalna Memorundum hi 9000 lai an dawn tawh thu a lo sawi a ni. Tunah phei chuan a aia tam a ni tawh ngei ang. 

He Bill duh lohna entir nan, 10-13 May, 2018 khan North East Students’ Organisation (NESO) chuan Shillong leh Guwahati-ah Sitting Protest an nei a. Hetah hian hmar chhak Zirlai Pawl 8 – MZP, AASU, KSU, GSU, AAPSU, NSF, AMSU leh TSF aiawhte an tel a ni. Ni 21 May 2018, Thawhtanni hian North East State hmun hrang hrangah Sitting Demonstration neih leh tur a ni a. MZP-te pawhin Aizawlah an nei dawn a, a tam thei ang berin tawiawm a tha ang. Kan Zirlaite hi kan chhuang takmeuh a ni. 

Ni 15 May pawh khan Guwahati-ah mipui tam tak kalkhawmin, he Bill hi an dodal tih an entir a, signature campaign te an nei a. Hetah hian ULFA Chairman, Arabinda Rajkhow-a pawh lo tel vein, Parliament-in he Bill hi a pass lui a nih chuan, hnam tenaute tan India hi tel vena tlak a nih tawh dawn loh avangin, India sorkar nen inremna nei tura inbiakna an neih mek chu an chhutchah nghal tur thu leh, inkahhai pawh an tihtawp nghal tur thu a sawi hial a ni.

Hemi ni vek hian Dibrugarh-ah pawh pawl hrang hrang intelkhawm JJA Mancha pawhin, darkar 100 chhung zet economic blockade siamin he bill hi an dodal bawk. 

He Bill chungchanga bengvar chhuah hmasa ber chu Prism hruaitute an ni a, an fakawm hle a ni. Prism hruaitute hian Chief Minister-in party leh NGO te min ko khawm sela, a huhovin hma la ila tih an rawt a, chu chu keini pawhin kan thlawp a, chumi atan chuan Chief Minister hman hun nghah ni se tih a ni. Tun thleng hian kan Chief Minister hi a la hman thei rih lo a ni. Assam leh Meghalaya Chief Minister-te erawh chuan huaisen takin hma an hruai a, an awhawm khawp mai. Kan Chief Minister erawh hi chu a buai em mai a, a aia ngaih pawimawh zawk a ngah si a, a ka pawh a la ang ve hman lo va, i hrethiam ang u. 

He Bill hi an pass hma hian na taka kan nawr a ngai a, an pass hnu chuan engmah kan ti thei tawh lo vang. Kawng te zawh mup mup a hun tawh. Kan Legislative Assembly-ah pawh Official Resolution pass daih tawh tur hi a ni a. Kan MLA te zingah tumahin Private Resolution pawh an la thehlut lo va, “Thlan nawn leh tlak kan ni lo ve” an tihnaah i ngai mai ang u.
Tun thleng hian Congress leh MNF Party-te hian (ka hriat sual loh chuan) anmahni pualin Memorundum an la thehlut ve lo niin ka hria a. He Bill leh Chakma Foreigner chungchang hi thil inkungkaih tlat a nih avangin, heng party pahnihte hian, Chakma vote an hmuhna tur a nih phawt chuan, kan ram, kan hnam leh kan sakhuate hi ral zawk mahse an pawiti lo a nih hi. 
He Bill hi pass a nih loh nan, ZPM chuan kan tih theih apiang kan ti zel dawn a ni. Party tinte hian sorkarna chan chu kan duh theuh mai, amaherawh chu, chumi atana eng hmanrua pawh hmang hreh lo nih hi kan duh ve ngai lo vang. Tunah chuan, kan Mizo puite ngei lakah hian kan hnam hi a him ta si lo va. Chuvangin, chung mite chu inthlan lo awm turah hian paih an nih ngei theih nan, Tangrual Pawl chuan mitinte tanrualpui atan kan sawm a che u.

Ka lawm e.

Rama Kop Hmar

Post a comment

Powered by Blogger.