SAVAWM LAK ATANG A NUPUI A CHHAN CHHUAK

May ni 15 (Thawhlehni) khan Pu C. Lianhnawla leh a nupui Pi Lalnunthari te, Mamit Dist, Tuidam khua, chawhmeh la tura kal chu Kawrtethawveng leh Tuidam inkar, Pu Huliana huan bulah Savawm sum ruk zet nen an inbei a, an nupa hian hliam an tuar nual.

He thil thlen hun hi Dar 11 tlang chho a ni. An kal tumna an thlen hmain kawng chhaka telhawng chawr no tha tak chu Pi Lalnunthari hian a hmu a, la turin a kal peng lawk a, a bul lawka savawm lo awm reng chuan hnung lam atanga beiin a seh zui ta a, a nupui leh savawm inbei thawm hriain Pu C. Lianhnawla chu a tlan let vat a, chutia Savawm sum 6 vel zetin a nupui a lo bawh bet reng a hmuh chuan a chempui ken chuan savawm hnungzangah chuan a sat vak a, mahse a chem a hriam tawk loh avangin engtin mah a awm lo va, a chempui chu paihin savawm lak atanga a nupui chhan tum chuan savawm chu kut lawngin a bei a, a hnungzang hmulah thamin theih tawpin a phih vak a, chutia theihtawpa a phih takah chuan savawm pawh chu a phih tho a, savawm chuan amah chu bei zuiin a bawh bet a, seh a tum veleh a, mahse savawm a khabeah a lo nem tlat a, a kein a leng vak vak bawk avangin savawm chuan tihngaihna hre lovin a kalsawn san ta a ni.

Savawm hian Pi Lalnunthari hi a ban dinglamah sehin a nak leh a ngum a ham thler a, a chhip vun a hikin a bek a seh thler bawk a, Pu C. Lianhnawla hi a chalah sehin a dul a ham thler a, a chal hi hmun 13-ah thuisak a ni nghe nghe.

Hetianga savawm sum 6 zet mai kut lawnga a bei ngam hi a huaisenin a chhuanawm tak zet a ni.

He thil thlenna hmun hi kawngpui bul mai a ni a, hetia Pu Lianhnawla leh savawm inbeih lai hian Pi Nunthari chu thisen bual hnuangin, thei leh thei loin kawngpui lam panin a insaseng a. Pi Nuntharin kawngpui a thlen hian kawngpuia motor tlan lai tak a ni a, Motor hian hmu lova an tlan tlang deuh avangin Pi Nunthari hian motor chu a au vak vak a, au thawm an hriat avangin motor pawh chu a back lehm hetih lai hian Pu Lianhnawla pawh savawmin a tlansan avangin a rawn thleng veleh nghal a, motor hi Kawrtethawveng dawmdawi in motor a lo ni hlauh a, anni hian Kawrtethawveng damdawi in an panpui hnuah, bawihsawm ngai ang angte an bawihsawm a, Aizawl lama rawn refer-in tunah hian Falkawn referal Hospital-ah enkawl mek an ni. ~ Làwmtêa Hindi Nahi Janta