MNF senior vice president Tawnluia chuan nimin khan Khawzawl Zaingen Veng YMA Hall-ah MZP headquarters, Khawzawl-in HSSLC pass tharte lawmpuinaah thu sawiin, MNF-in sorkarna an chan chuan kum 2008-a district-a an puan tawhte an tihpuitlin tur thu a sawi.

Tawnluia chuan, MNF sorkar laiin Khawzawl tichangkang turin hma an la nasa nia sawiin, "IR batallion kan dah a, chuta thawk mi 1,000 zette hlawh hi Khawzawl bazarah a luang a ni. Khawzawl hi district puitlingin awm se la, tiin kan sorkar laiin notification kan chhuah a; Congress sorkar thar khan district thar kan puante tihpuitlin a tum lo a, a enkawlzui duh lo hi pawi kan ti hle. MNF kan sorkar chuan Khawzawl leh district-a kan puan tawhte kha kan tipuitling dawn a ni," a ti.

MLA Lalruatkima pawhin thu sawiin, khawzawl khawtlang ṭangruala enkawl higher secondary school chu sorkarin kum khatah ṭanpuina cheng nuai khat vel chauh Lump a pek avangin khawtlang tan a hautak hle tih a sawi a, "Sorkar hian an ko chhâwk zànsak a hun tawh tak zet a ni," a ti. Khawtlang leh zirlaite'n ram leh hnam a him zel theih nan ngaihtuahna an sen ve reng a pawimawh thu a sawi bawk.-Vanglaini

Post a comment

Powered by Blogger.