Hmar Peoples Convention (Democrat)-a army chief Lalropuia Famhoite (50) chu May 21, Thawhṭanni zan dar 11 vel khan Mothers Care, Imphal, Manipur-ah a thi a, a thih chhan hi thisen sang (hypertension) nia thu dawn a ni.
Thu dawn danin, Lalropuia Famhoite hi Thawhṭanni chhun khan Churachandpur-ah a thisen a sang thut a, Imphal panpui nghal niin, Mothers Care Hospital ICU-ah enkawl a ni a; Thawhṭanni vek zan dar 11 velah a thi a ni. Thawhṭanni zan khan an chenna, Saikot, Churachandpur-ah lumen a nih hnuah nimin khan vui a ni.
Lalropuia hi April 16, 2015 khan Mizoram police-te'n Silchar-ah an lo man tawh a, a rualin HPC(D) dang pahnih Norbar Sanate leh Ngurthantluanga Sanate te pawh man an ni a; thubuai siamsak an ni nual a, April 20, 2015-ah Aizawl Chief Judicial Magistrate phalnain Central Jail-ah dah luh an ni.
Lalropuia Famhoite hi jail-ah hun eng emaw chen a tàn hnuah, Mizoram sorkar leh HPC(D), Zosangbera kaihhruaite inkara inremna zawnga inbiakna neih a nih avangin December 2016-ah Central Jail aṭangin PR bond hmanga chhuah a ni.
Hetih lai hian, Lalropuia Famhoite ruala man zinga mi HPC(D) finance secretary Norbar Sanate (47) erawh chu January 27, 2018 zanah Cachar district-a Hmarkhawlianah silaia kah hlum a lo ni tawh thung. -Vanglaini
Post a Comment