Ziaktu : HC.Vanlalruata, Principal Correspondent, PTI


EIRAWNGBAWLNA GAS LEH SORKARTun sorkar ding lai leh a hmasa tuna Chief Minister kaihhruai Congress sorkar thova kan eirawngbawlna gas lama mawhphurtu – Food, Civil Supplies and Consumer Affairs Minister-te khan mipui kham khawp eirawngbawlna gas a awm loh chungchangah khan an kut an sil ve ve tawh á¹­hin a. Eirawngbawlna gas hniang hnara hman tur a awm leh awm lohvah sorkar a inrawlhna tur a awm lo va, sumdawnna a nih avangin Indian Oil Corporation (IOC) leh gas agent/distributor te inkar a ni an ti a nih kha. Hei hi vawi khat mai lo deuh minister pahnihte hian an sawi ve ve. Khatianga an han sawi takah chuan mipui nawlpui chuan sorkar chu he kan harsatnaah hian kan hlahthlem titih a, IOC leh Mizoram chhunga distributor/agent te kan dem chiam hman hlawm awm e.

Kar hmasa Thawhtanni khan Mizorama Eirawngbawlna Gas distributor inzawmkhawm pawl hruaitute chuan tunlaia eirawngbawlna gas harsatna chungchangah hian Food, Civil Supplies and Consumer Affairs Minister an hmu a. Tunlaia eirawngbawlna gas harsatna, cylinder a lo luh tlem avanga mipuiin harsatna an tawh dan an thlen a. Mipui hman tura hnianghnar zawka eirawngbawlna pek chhuah tur a awm theihna atana á¹­an la turin an ngen a ni. 
Hemi bawhzui ni awm tak hian Thawhá¹­anni khan FCS&CA Minister Pu John Rotluangliana chuan Borkhola LPG Bottling Plant a tlawh a. Sorkar thuchhuahin a sawi dan chuan, “Minister hi FCS&CA Official-ten an á¹­awiawm a, Borkhola LPG Bottling plant hotute kawmin Mizoramina LPG Supply kan hmuh dan kalphung a sawipui a. Tun hnaia Mizoramin LPG Supply kan dawn tlem nachhan a zawh chuan Borkhola Bottling Plant-a Senior Plant Manager Pu Sh. Lal Ngaisang Khozol chuan tunlai LPG Supply tlem nachhan chu Gas thunkhahna khawl (carouser) an siam belh vang niin a chhang a. He khawl siam belh a nih lai hian Hot works (welding etc) te khawih a ngaih avangin chetsualna leh intihpalh awm thei (accident) laka inven nan carouser hmanlai chu chawlhtir a ngai á¹­hin a, hei hian ni khata an gas thun khah á¹­hin ang pangai chu thun khat hman lovin LPG supply a tihtlem phah a nih thu a tar lang a. Carouser siam belh a nih chhung hian kalphung pangaia nikhata Gas bur an thun khah á¹­hin Truck trip 50 vel chu a zahveah a tlakhniam phah a, truck trip 25 vel chauh an thun khat (refill) hman á¹­hin a, hemi avang hian LPG Supply chu tun hnaiah a tlakhniam phah thu a sawi bawk.

“Pu John Rotluangliana chuan, 'Mizoramina LPG Supply ni khata kan dawn zat chu tipung tura hrilhin Mizoram tan ni khatah Truck Trip 12 aá¹­anga 15 inkar tal supply tura a sawi chu Pu Lal Ngaisang Khozol chuan an tihhlawhtlin tur thu a sawi a, hemi bakah hian Carouser an siam belh chu June thla aá¹­anga hman á¹­an theih a nih tur thu tar langin, Carouser 2 hman a nih hnu chuan ni khatah Truck Trip 100 vel gas an thun khah (refill) hman tur thu sawiin hei hian LPG Supply-a harsatna awm á¹­hin chu a tiziaawm viau dawn niin a sawi bawk.

Supply Minister chuan, "Mizoram puma LPG Supply-a harsatna awm á¹­hin chu sutkian a nih theih nan District hrang hranga Gas Agency te chu Borkhola Bottling Plant aá¹­anga khaihlak awm lova pek chhuah (supply) an nih theih nana hma la tura hrilin, Sr. Plant Manager chuan hemi chungchang pawh hi a tahtawlin hmalak dan an ngaituah chhoh zel tur thuin a chhang bawk a ni,” tiin sorkar thuchhuah chuan a tar lang.

Hetih lai hian Nilaini khan PRISM chuan hetiang hian thuchhuah an siam ve thung a: “PRISM party chuan Mizoramin gas mipui mamawh khawp kan nei lo fo chu pawi a tiin mipui mamawh phuhru zo tura chak zawka hma la turin leh kan quota zat dik tak leh connection kan neih dan dik tak puang zar turin sawrkar a ngen. “PRISM President Pu Vanlalruata chuan Gas harsatna kan tawh fo chungchang sawiin, ‘Mizoram mipuiin gas kan kham loha kan buaina chhan bulpui ber chu kan quota aia tam connection kan neih vang a ni a. A tithei falten danin a phalsak bak connection an neih thin avangin mimirin kan tuar a. Kan quota zat diktak leh connection kan neih dan diktak puangzar turin sawrkar kan ngen a, gas harsatna hi a rang lama chingfel turin kan ngen bawk a ni,’ a ti.”

Mizorama eirawngbawlna gas distributor/agent inzawmkhawm pawl hruaitute chuan Borkhola a khawl siam belh avanga harsatna awm hi thudik a nih thu an sawi a. Chutiang a nih rual chuan tunhnaiah hian Tripura lam pe tamin Mizorama distributor-te’n an dawn tlem phah thung ni a an hriat thu an sawi a. Sumdawng an nih avangin eirawngbawlna gas hi a tam thei ang bek lo lut sela, a tam thei ang ber hralh se tih chu an duhdan a nih thu leh chu chu an tan chuan hlawkna leh thil lawmawm tak a ni an ti a. A lo luh tlem chhan hi anni’n an lakluh tlem vang a ni lo an ti ve thung.

A chunga kan sawi leh thuchhuah siam kan puan chhawn takte hi a dik vek loh pawhin a dik thawkhat chuan a rinawm hlawm a. A pawi lai tak chu sorkarin mawhphurhna a lakna tur a la ngam lo leh la duh lova kut a sil fo hi a ni. IOC leh eirawngbawlna gas distributor/agent te inkar leh sumdawnna thil ni a minister pahnihin an sawi hi a dik chin thui tak a awm a. Mahse, chutih rual chuan IOC hi mimal company a ni lova, sorkar ta leh enkawl (state-owned/public sector) a ni a. India sorkar enkawl leh neitu nihna corporation/company chu sorkar laipui thuhnuai a awm tihna a ni a. Chutiang company-in harsatna an siam a nih chuan Mizoram kher lo, state sorkar chu a inrawlh ngei a ngai a ni.

Entirna siam ta ila - private company a ni emaw, sorkar laipui hnuaia mi corporation a ni emaw, Mizoram chhunga awm an nih phawt chuan state sorkarin engemaw chen mawh a nei a ni. An hnathawh danah leh an thiltih zawng zawng (day to day functioning)-ah a zu inrawlh tur a ni tihna lam a ni lova, kha’ng company-te kha mipui rawngbawltu tur tho an nih avangin mipui thlan sorkar chuan an ngaihvenin thunun an tul chinah an thunun ang a, mipui tawrhna thleng kha a hrilhin a thlen tawh lohna turin hma a la ngei ngei tur a ni. Mipui tana tawrhna leh harsatna an thleng chung pawha ngawi reng leh kut kuangkuaha entu sorkar chu mipui laka mawhphurhna lak tum lo leh nachang hre lo tihna a ni. Chuvangin hetianga an duh thala mipui laka an chet theih lohna tur hian dan fel fai tak a tul angin a siam tur a ni ang.

Post a Comment

Powered by Blogger.