MIZORAM ENTREPRENEURSHIP CONCLAVE: Mizoramah hmasawnna chak zawka a kal theihna tura Sawrkar flagship programme New Economic Development Policy (NEDP) hnuaia hmalakna peng pakhat Entrepreneurship Development Scheme (EDS) kaltlangin ni hnih chhung awh tur (1ST-2ND June 2018) Mizoram pum huap leh a hmasa ber atan ‘Mizoram Entrepreneurship Conclave 2018’ chu Convention Center, Lungleiah nghah a ni dawn. He Conclave hi High Powered Committee (HPC), Lunglei leh Mizoram State Entrepreneurship Development Monitoring Committee (MEDMOC) tangkawp ten an buatsaih ang.
Hemi chungchang sawiho tur hian vawiin khan Chief Planning Officer, HPC leh Member Secretary, MEDMOC ni bawk Dr Lalrinchhana hovin a Office Chamber-ah Press Meet neih a ni. Meeting-ah hian Lunglei DIPRO Pi C. Lalremruati leh Lunglei District MJA member-te an President Pu H. Lalthansanga hovin an tel a ni.
Mizoram Entrepreneurship Conclave 2018 chu sumdawnna bul tan tum te, sumdawnna lian zawka kalpui duh te, sumdawnna chungchanga zawhna nei te, sumdawnna bul tan duh si, bul tanna nei lo te leh business idea tha tak a taka chan tir duh te tan ruahman a ni a. Mahni kut kea din tum te kawng kawhhmuh tur leh an mamawh hrang hrang te zirchianga entrepreneuship chungchang inhrilhhriat chu he Conclave-in a tum ber a ni. Dr Lalrinchhana chuan Entrepreneurship Development Scheme (EDS) kaltlanga sumdawnna bultan tum te tana an hmalaknate chhimlam thalaiten anlo hriat ve a, mahni kutke a ding thei tura hmalaa intihsiakna 'Micro Start-up Competition' ah te a tam zawk anlo tel ve theihna turin he Conclave-hi Lungleiah nghah a nih thu a sawi.
Mizoram Entrepreneurship Conclave 2018 hawnna inkhawm hi Convention Center Auditorium-ah 1st June, 2018 zing dar 11:00 AM a neih tura ruahman niin Pu Lalsawta, Minister of Finance, Planning etc chu khuallian a ni anga, Pu Joseph Lalhimpuia, Chairman, Mizoram Youth Commission chu khualzahawm a ni ang. Dr C. Vanlalramsanga, Secretary, Planning and Programme Implementation Department-in hawnna inkhawm hi a kaihruai ang. Chawhnu lamah Technical Session buatsaih niin Lunglei khawpui chhunga Bank hrang hrang manager-te leh Entrepreneuship lama mithiam rual Master Trainer-te an rawn tel dawn a, entrepreneurship lama hriat duh apiang an zawh theih bawk ang. Pu Joseph L. Ralte, Expert Member, MEDMOC-in “My Entrepreneurship Journey & Experiences with Financial Access in Mizoram” tih thupui hmangin ziritirna a pe bawk ang.
Conclave-ah hian Stall thahnem tak buatsaih a ni dawn a, 'Micro Start-up Competition' titha thlanchhuah ten Exhibition hmangin an thil siam an phochhuak ang. 'Micro Start-up Competition' kalhmang leh he competition-a tel tura an inpuahchah dan te leh entrepreneurship lama hriat duhte heng Entrepreneurs-te hi an zawh theih reng dawn bawk a ni. Exhibition hi 1st-2nd June 2018 zing dar 11:00 atanga tlai dar 5:00 thleng mipuite tan hawn a ni dawn a, MEDMOC chuan Mizoram Entrepreneurship Conclave hmasa ber ah hian mipuite a tam thei ang ber tel turin an sawm a ni.-DIPR
Post a Comment