Mizo nula scientistDr. Lallianpuii Kawlni, Hmingdailova Colney(L), IFS leh P.C. Lalhlimi te fanu, Bungkawn Vengthar, Aizawl ami chu vawiin May ni 25, 2018 khan Wildlife Institute of India (WII) Dehradun-a Scientist-C thawk turin a tling thar.

WII hi Ministry of Environment, Forest & Climate Change, Government of India hnuaia awm niin India leh khawvelah pawh wildlife conservation leh research-ah Institution pawimawh berte zinga mi a ni. Deradhun-a based niin India-a wildlife lam zirnaah chuan a tha berte zinga mi a ni. 

Indian Forest Service (IFS) te leh State Forest Service-ho hian he institution-ah hian training course an nei thin. Chu bakah MSc leh PhD program, wildlife lamah an nei bawk a. WII Scientist-te hi zirtirtu an ni tel tihna a nih chu.

Dr. Lallianpuii hi Veterinarian niin kum 2011 khan CVSc&AH, Central Agricultural University, Selesih, Aizawlah BVSc&AH degree zovin kum 2013 khan Bangalore Veterinary College, KVAFSU, Karnataka atangin MVSc (Wildlife) a zo leh a. Hemi hnu hian Dept. of Veterinary Microbiology, CVSc&AH, CAU, Selesihah Biotech Hub leh Transboundary Disease project-ah a thawk leh a. WII-ah hian kumin kuntira Scientist-C recruitment neihah khan dil vein written test leh interview a pal tlang hnuah vawiin khan result a chhuak a, Mizo zinga Wildlife Institute of India (WII)-a Scientist-C hmasa ber a ni tura a tlin thu kan dawng ta a ni.

India ramah hian Scientist-B hi written test leh interview kaltlangin entry level a ni a. National institute hoah chuan competitive tak a ni. PhD rual chu sawi loh Post Doctorate rual, paper nei tha tak tak ten an inchuh thin. Hetih lai hian PhD pawh nei lo chunga Scientist-C lehnghal a han tling thei hi interviewer-te mit a tlung hle tihna a ni; a titha lawr lak tihna a ni mai. Tin, ani aia nungchate hmangaih leh an chunga lainatna lantir nasa hi an tam lem lo ang. Ramsa leh sava chi hrang hrang damlo leh hliam tuarte hmangaih taka lo enkawl thintu kan Mizo nula chhuanawm hian a hun puma nungchate tana a han thawk tur hi a inhmeh khawp mai; Master degree a neihna a ni bawk nen. 

Mizoram tan pawh nakin zelah kan la chhawr tangkai theih ngei turin a lakah beiseina sang tak kan nei a ni.  Go and save our environment, Scientist!

Post a Comment

Powered by Blogger.