Lehlanga Aizawl rawn tlawh Vice President M. Venkaiah Naidu-a’n nimin khan Mizoram University (MZU) Campus-ah ‘Academic & Seminar Complex’ a hawng a, hmeichhia leh mipa Hostel sakna tur lungphum a phum nghal bawk.
Hemi puala inkhawm MZU Auditorium-a buatsaihah thu sawiin Vice President chuan, zirna tha nei tura pawimawh tak hmunhma leh in tha tak a hawng thei leh in dang sakna tur lungphum a phum thei chu lawmawm a tih thu a sawi a; heng hmunhmate hi University-in tangkai taka hmangin, ram chhunga University tha berte zingah a tel theih phah a beisei thu te, MZU-in hma lam a panna kawngah tangkai taka hman a nih ngei a beisei thu leh Mizoram chhunga zirlaite mai bakah hmarchhak state hrang hranga zirlaite tan pawh zirna in tha tak a nih chhoh zel a beisei thu a sawi a ni.
Vice President Pu Naidu chuan Mizoram leilung, thing leh mau, boruak, sik leh sa te chu duhthusama mawi leh nuam a ni a, environment humhalh a pawimawh rualin mahni hnam ziarang leh hnam tawng humhalh a pawimawh hle a ni, a ti a. Zirlaite chu tawng hrang hrang an zir a nih pawhin anmahni pianpui tawng leh an pian leh murna theihnghilh lo turin a chah a. Miin taima tak leh rim taka hna a thawh chuan rin phak baka sang a thleng thei a ni, tiin President hlui Abdul Kalam-a leh Prime Minister Narendra Modi-a te chu entawn tur tha tak an ni, a ti a. Tunlai khawvelah IT tel lova engmah a tihtheih tawh loh avangin hemi kawngah hian tan la sauh sauh turin zirlaite a fuih bawk.
Vice President chuan university-te leh industry-te thawk dunin, tuna mipui mamawh phuhru turin hma an la tur a ni a, graduate leh post-graduate degree neih mai a tawk zo tawh lo a, inelna sang tawh tak khawvelah hian hna thawhna atana tangkai zirna neih a ngai a ni, a ti a. hemi kawngah hian sorkar laipui chuan Skill India programme kalpuiin ram chhunga thalai Nuai têlte tan hnathawhna tur kawng a kawhhmuh mek a ni, a ti.
Pu Naidu-a chuan zirlaite chu hna zawngtu ni loin hna thawh tur petu ni zawk turin a chah a, an thawh duh zâwng an thlan fel hnuah an thiamna te tat hriam turin theihtawpa tan la turin a chah a ni.
MZU Vice Chancellor, Prof. K.R.S. Sambasiva Rao-a’n University mamawh hrang hrang a hnena a thlente chu a changtu Minister-te sawipuiin theihtawpa a bawhzui tur thu Vice President hian a sawi bawk.
Governor Pu Nirbhay Sharma pawhin thu sawiin, Vice President taimakna a fak a, state 2 tih loh chu ram chhung state zawng zawng a tlawh kim vek tawh, a ti a. Governor chuan Mizoram mipui zinga zaa 93-te chu ziak leh chhiar thiam an nih laiin hna thawk zat erawh chu zaa 24 vel chauh an ni thung a, hei vang hian zirna kalpui a nih dan chu thlir nawn a pawimawh hlea a hriat thu a sawi a. Mizo zirlaite chu mahni tawng bakah tawng dang, a bikin Hindi thiam tel ngei ngei turin a chah a, khaw hawi tizaua mi dangin thil an tih dan thate thlir nachang hre turin a chah bawk.
MZU Vice Chancellor Prof.KRS Sambasiva Rao-a’n Vice President lo lawmna thu sawiin, MZU dunhmun tlangpui a sawi a. MZU-in an mamawh hrang hrang pawh lo thlen nghalin, chung zingah chuan MZu Campus-a PPP mode hmanga Medical College leh Hospital din te, Mizorama Cancer Hospital din te, AIDS/HIV Research and Control Centre din te, Lungleia MZU South Campus din te a tel a ni.
Vice President rawn zin hi Mizoram sorkar aiawhin Lengpui Airport-ah Minister Pu H. Rohluna’n a lo hmuak a, MZU-a hun a hmannaah hian Governor Nirbhay Sharma, Minister Pu Lalsawta leh Chief Secy. Arvind ray-a te’n an tawiawm a. MZU-a hun a hman zawh hian Delhi panin a kir leh nghal a ni.
AIR News Aizawl
Post a Comment