INFIAMMITE HNENAH LAWMMAN SEM

INFIAMNA CHANCHINTHAR: Sports Minister Pu Zodintluanga chuan vawiin khan Lal Thanhawla Auditorium, Aizawla programme buatsaihah Mizoram infiammi, ram pawn leh ram chhunga medal la te hnenah incentive cash award sumfai a sem.

Pu Zodintluanga chuan khawvel hmun hrang hrangah Mizo infiammite kalin tun tumah pawh taekwondo team ah Mizo tam tak an kal leh dawn a, Youth Olympics ah pawh Mizo an tel ve leh ngei a beiseiawm, a ti. Sports discipline hrang hrangah Mizote chu India hmahruaitu niin football-ah phei chuan India rama club tha ten Mizo tlangvalte tellovin an khel thei tawh lo, a ti a. Infiamna lama India ram kan hneh thei ang chiah hian inpekna tak tak nen chuan zirna lamah pawh Mizote hi midang aiin kan chungnung thei, tiin Minister chuan thalaite a fuih a. Infiamna lamah mahni inrintawkna an nei ang hian zirna lamah pawh tan an lak phawt chuan India rama competitive exam sang ber UPSC thleng pawhin an thunun thei tih thinlung pu turin a chah. Mizoram infiammite hi State pawnah ram ti hmel mawitu, palai (ambassador) tha tak an nih laiin a entu mipui lam atanga buaina kan tawk thin hi a pawi tak zet, Pu Zodintluanga chuan a ti a. Vawi khat thinrim thil thu a Mizoram hming an tichhia chu an demawm hle tih sawiin a thlen nawn tawh loh nan hma la turin Sports Association hruaitute leh mipuite a ngen a ni. 

INFIAMMITE HNENAH LAWMMAN SEM

Sports Incentive Cash Ward hi kum 2001-2002 khan sem tan a ni a. Hemi tum hian enny R.Lalremliani, boxer chauhin a dawng a ni.  Kum 2001-2016 thleng khan mi 4423 hnenah Rs. 35,85,52,300.00 sem a ni tawh a. Tun tumah hian kum 2016-2018 chhung atan mi 890 hnenah Rs. 1,73,00,000 sem a ni. 

Kum 2016-2017 chhungin incentive cash award dawng thei mi 373 awmin chung zingah chuan Aizawl District an tam ber a, mi 307 an dawng a ni. Kum 2017-18 ah incentive cash award dawng thei mi 521 an ni a, heng zinga mi 412 chu Aizawl District huamchhung infiammite an ni. Kum 2016-17 award hi sports discipline 18 ah sem niin 2017-18 hi discipline 19 ah sem a ni thung. 

Sports Director Pu Zothanmawia kaihhruai Sports Incentive Cash Award hlanna inkhawmah hian MLA Pu Chalrosanga Ralte bakah Mizoram State Sports Council Secretary Pu C.Laltlanthanga leh mi pawimawh dangte an tel a ni. -DIPR