Union Minister of State for Road Transports & Highways Mansukh L Mandaviya chuan Silchar atanga Tuipang kawng siamna’na cheng vbc 6000 a mamawh chu tihpuitlin a tiam.
Ni hnih awh Indian Road Congress (IRC) 215th Mid Term Council Meeting chu Zirtawpni khan MZU auditorium-ah Mansukh L Mandaviya hian a hawng a. Kawng tha chuan zawi zawiin thil tha a thlen a, hmasawnna a hmu thin a ti. Sorkar laipui chuan Mizoram pawh a ngai pawimawh hle tih sawiin, Silchar atanga Tuipang kawng siamna’n cheng vbc 6000 a mamawh chu tihpuitlin sak a ni ang a ti a. Lei tihthatna hlo tel lova buh leh bal tharchhuak thei turin Mizoram chu ram tha tak a nih thu leh hemi atan hian a hralh chhuahna tur leh kawng tha a mamawh tih a sawi bawk.
He hunah hian PWD Minister Pu Lal Thanzara chuan kawng chu inkalpawh tawnna atana thil pawimawh tak a ni a ti a, Mizoram ah ruahtui a tlak rei avangin hnathawhna hun a tlem a, kawng siamna atana lung hman turah pawh harsatna a tawk a ni, a ti a. IRC-a mithiam kal khawmte chuan Mizoram tana kawng tha leh him zawk a neih theihna’n an thiamna hmanpui turin a sawm bawk a ni.
Mizoram chu state te, hmasawnna kawng zawh mek a nih thu sawiin PWD Minister chuan Mizoramah hian khaw 800 vel a awm a, hengte hi PMGSY hmangin kawngin a tlawh vek tawh a. Railway lama inkalpawhna la buaipui mek a nih avangin Mizoram ang, tlangram tan chuan kawng hi economy lama hmasawnna atan thil pawimawh ber a la ni rih, a ti.
Thusawitu dang IRC president Krishna Reddy chuan kawng siamah hmasawnna a awm zel theihna atan theihtawp an chhuah thu a sawi a. Lirtheia chetsualna hian economy-ah nghawng a nei thui hle a, mithiamte chhut danin gross domestic product atanga chhutin 100-a 3 vel lirtheia chetsualna hian a nghawng a. Kawng siamna atana DPR siam dawn leh kawng siam hna thawh dawnin road safety ngaihtuah tel zel tur a ni a, an state Karnataka-ah chuan kawng siamna tur DPR ah road safety an dah pawimawh tawh a, chetsualna a tlakhniam phah tih a sawi.
Indian Road Congress (IRC)-ah hian India ram state hrang hranga kawng enkawltute, contractor leh mithiam hrang hrangte an kalkhawma, kawng enkawl kawnga harsatna awm te, a sutkian dan turte leh hmasawnna turte an sawiho thin a ni. IRC hi Mizoramin tum thum a thlenna a ni a, kum 1997 leh kum 2008 khan a lo thleng tawh a ni.-AIR Aizawl
Post a Comment