HRISELNA: Katchat hi hnim chi khat a ni a, Mizoramah pawh katchat hmuh tur a tam a. Khawvel hmun hrang hrangah katchat hi hnim hnawksak taka ngaih a ni a. Nimahsela, thil hnawksak tak pawh hian ţangkaina leh ţhatna a lo nei ve lehzel mai a.
- Katchat zîkno hian zun a titam thei a.
- Katchat hi rulhlut thahna hlo atan an hmang ţhin a.
- Katchat hi cancer enkawl nan an hmang ţhin a, engti ang chiaha ţha nge tih erawh a finfiahna a awm lo va.
- Katchat tui sâwr hi TB natna enkawlna atan an hmang ţhin bawk a.
- Katchat tui sâwr hi taksa nâ leh kham enkawl nana hman ţhin a ni a.
- Katchat zung tui sâwr hi antiseptic anga hman ţhin a ni a, ruhseh enkawl nan hman ţhin a ni a, chaw ei tui nan an hmang ţhin bawk a.
- Katchat zung hi sahbon atan hman ţhin a ni a.
- Katchat zung hi lu sûk nana hman hian sam a tiţhang chak theia hriat a ni a.
- Katchat hnah hi thei leh thlai vawn ţhat nan hman ţhin a ni a.
- Katchat hian thei a vawng dai a, a tuina leh ţhatna hloh lovin a vawng ţha rei thei a, rannung lakah a veng thei bawk a ni.
- Katchat hâla a vâp hi leiţha atan a hman theih a.
- Katchat hnah no hi an ei fo va. Katchat hian taksa tana ţha lo, ptalquiloside a pai a, ptalquiloside hian cancer awm theihna remchang a titam theia hriat a ni a.
Nimahsela, ptalquiloside hi tuiah a kal ral awlsam hle a, boruakah a ral thei a, chhum hmin chuan a ral deuh vek a. Chi leh soda nena chhum a ţha lehzual a. Chuvangin, a hlanga ei lo va, chhum hmaa tuia chi telha chiah ţhin a hima ngaih a ni.
Thil rêng rêng, a tâwk leka tih leh ei a pawimawh, tia kan tarlan fo hi a dik ngawt mai.
Katchat sawi chuan rilruah thil pakhat a lo lang a, ka'n sawi mai mai teh ang.
2007 kum khan Kolkata-a kan lehkha zir laiin, Pratt Memorial School-ah temporary zirtirtu angin Mizo subject ka zirtir ve ţhin a. Lehkhabu râwn tur ka neih mang loh avangin, ka buai ve zeuh ţhin a.
Vawi khat chu Vankhama phuah RIMAWI RAM tih hla hi ka zirtir a. Chheri chawmkhuang katchatin lo rem, tih lai hi, "Sir, engnge katchat chu?" tiin min zawt alawm le.
Katchat chu hnim chi khat tih chu ka hre reng a. Nimahsela, 'lo rem' tih lai tak hian min tibuai deuh ta tlat mai a. Ka ngaihtuah vang vang a, "Katchat chu sava emaw, rannung chi khat emaw a ni ang" ka'n ti a nih kha.
HRISELNA, MI TIN TAN
(Gilead Thinghnai)
Post a Comment