NLUP Kutpui: Vawiin khan Kolasib A/C bialtu MLA Pu PC Zoram Sangliana chuan Parish hall Venglai kolasib ah NLUP Kutpui a hawng.
Hawnna inkhawmah hian Tuirial A/C bialtu Pu Hmingdailova khiangte MLA leh Serlui Bialtu Pu K Lalrinthanga te chu Khual zahawm niin Pu James Lalrinchhana, MCS, Secretary NIB chu sawm bik (Special invitee) niin hawnna hun hi a hmanpui bawk.
Hawnna inkhawm ah hian khuallian chuan thu sawiin NLUP chu mirethei, khawsak harsa, pachhia leh hmeithaite tanpuina leh leirem an rah theihna tur atana ruahman a nih thu a sawi a, taima tak leh rinawm taka thawktu te hlawhtlinna chu a taka hmuh theihin a awm a, chung mi rinawmte thawhrah chuan NLUP Kutpui pawh hi a hring chhuak a ni a ti. mi tamtakin sawi chhiatna tur zawng thin mahse a hlawhtlinna chu hmun tamktak leh chhungkaw tamtak ah hmuh theihin a awm a ni a ti a, NLUP hnathawh ina a hrin chhuah hmasawnna atangin Pathian Ram a lut te pawh a pung ani tiin, Development ina a hrinchhuah chhungkaw mamawh lirthei te pawh a pung nasa ani a ti a, Sawrkar in mi harsa zawkte tan ruahmanna felfai tak a siam a, chu chu mi rinawm leh taima te tan chuan mahni chhungkaw dinchhuahpui na tham a ni a ti a, NLUP tanpuina chu a mamawh an awm chhung chuan chhunzawm zel tur a nih thu a tarlang bawk ani. Hemi bakah hian khuallian chuan NLUP beneficiaries enkawltu Line Department hrang hrang a thawktu te chu thahnem ngai taka beneficiaries te an tanpui thin avangin lawmthu a hrilh bawk a ni.
Tuirial A/C bialtu MLA Pu Hmingdailova khiangte chuan Sawrkar flagship Programme NLUP chu tuipui tham ani a ti a, Mizoram chu ram intodelh lo ani tih kan hre tlang veka, Sawrkar ina mipui thleng phak Policy thatak a duang chu a lawmawm a ni tiin hei hian chhungkaw tamtak tanpui ngai te chu a khaichhuak mek a mi tamtak tan malsawmna ani mek a ni a ti, hetih rual hian mi taima leh rinawm nih a ngai a ni a ti bawk. NITI Aayog tehna ah India rama State hmasawn leh titha ah Pahnihna kan hauh pha a ni tiin heng hi NLUP sum kan hman tangkai avanga kan GSDP leh Per Capita Income pung ina a hrinchhuah ani a ti. State danga awm velo mi harsa te tana tanpuina policy tha tak NLUP chu mi taima leh thawkrim te tan chuan hlawhtlinpuina tham ani a ti bawk.
Serlui Bialtu MLA Pu K Lalrinthanga chuan MIzoram Sawrkar in kut hnathawkte harsatna hria in an dinhmun khirh tak leh harsa tak atanga khaichhuah na turin NLUP chu Sawrkarin a buatsaih ani ati a,NLUP tanpuina dawngtu mi rinawm leh taima te thawhrah chu a taka hmuh theih in a awm mek a chutih laiin mi tlemte rinawmlo te chuan an tanpuina dawn te chu ti riralin, heng zinga mi tamtak chu NLUP hlawhtlinpui tute hnuaiah an inhlawh mek ani a ti. Rinawm leh taima taka thawkte chu mi hlawhtling hmuh tur tamtak an awm thu tarlangin mahni chhungkaw dinchhuahpui ngei turin kalkhawm kuthnathawkte a chah bawk ani.
NLUP Implementing Board Secretary Pu James Lalrinchhana chuan NLUP atanga hlawhtlinna hmu te thawh rah chu zau zawka pholan sakna remchang 'KUTPUI' duanchhuah a ni chu lawmawm a tih thu sawiin an dehchhuah te hralhna tur hun remchang tak anih thu a sawi bawk. Sawrkarin kuthnathawkte a ngai pawimawh hle a ni tiin NLUP Kutpui huaihawt ani chu kuthnathawkte ni a nih thu a sawi bawk. Sawrkar ina mi harsa zawkte khaichhuah nana ruahmanna a siam chu tanpuina dawngtu ten rinawm leh taima taka hma an lakpui chuan malsawmna tamtak an chan tur thu sawi bawkin, ram ngaw leh nungcha te hmangaih leh dimdawi tak chunga hma la zel turin kalkhawm kuthnathawkte chu a chah a ni.
NLUP fair-cum-Exhibition 2018, Kolasib hi Kolasib Bawrhsap Dr.Arun T IAS, in kaihruaiin , Pu Laltanpuia Hnamte, MCS Addl DC leh Koalsib District NLUP Nodal Officer ni bawk chuan technical report a pe a. He hunah hian Trade hrang hranga tanpuina dawng tur te hnenah NLUP tanpuina 3rd and 4th phase sem a ni a, Venglai Bazar shed ah Line Department hrang hrang hnuaia hmalakna te phochhuah niin Kolasib Mipuiten an hlut hle a thil dehchhuah thenkhat te chu hun reilote chhungin hralh zawh nghal vek ani. -DIPR
Post a Comment