MIZORAM YOUTH COMMISSION CHU BRITISH COUNCIL HNUAIA IELTS EXAM CENTRE A NI DAWN TA
“August 2, 2018 hian MYC Centre, Aizawl-ah India ram pawna lehkha zir duh leh hna thawk duhte tan IELTS Examination buatsaih nghal a ni ang.”
Chairman MYC, Pu Joseph Lalhimpuia
Mizoram Youth Commission (MYC) hmalaknain British Council palai Raj Tiwari, Manager, Exams Business Development, British Council, East India chu koh chhuah a ni a, nimin khan British Council palai leh Mizoram Youth Commission te’n MYC Chairman hovin meeting an nei a, Mizoram Youth Commission chu Mizoram tan British Council hnuaia International English Language Testing System (IELTS) Examination Centre atan inremna neih a ni. Pu Joseph Lalhimpuia chuan “Mizoram Youth Commission in Mizoram thalaite zinga India ram pawna lehkha zir duh leh hna thawk duhte tana thil tul leh pawimawh hmasa, IELTS Examination hi kan tualchhung Mizoramah ngei Exam Centre nghet neih a ngai kan ti a, chumi atana MYC-in hma kan lakna a lo hlawhtling chho thei ta hi a lawmawm ka ti a, ‘August 2, 2018 hian MYC Centre, Aizawl-ah India ram pawna lehkha zir duh leh hna thawk duhte tan IELTS Examination buatsaih nghal a ni ang,” a ti.
MYC Centre, Aizawla IELTS Examination hmachhawn tur hian MYC chuan mi 85 IELTS Coaching Class kalpui lai a nei nghe nghe a; heng mite chauh ni lo, mahnia exam inhuamte tan pawh IELTS MYC Coaching Class kalpuina leh Mizoram tana Examination Registration Portal tih theihna awmchhun Spotlight Coaching Academy, Saron Veng, Aizawlah August 2, 2018-a IELTS exam hmachhawn duhte chu registration tih nghal theih a ni a. English tawng hmanna ramah hna thawh nan leh lehkha zir chhunzawm nan IELTS pal tlang hi a ngai a, USA, UK, Australia, Canada, New Zealand, Germany leh khawvel ram hrang hrang ram 140 chuangin an pawm a; khawvel ram hrang hranga Universitiy 10000 leh School leh College 3500 chuangin an pawm bawk a ni. -DIPR
Post a Comment