Mizoram boxing tana mi hlu Dr C Lallunghnema chuan May 8, 2018 (thawhlehni) zing dar 8:29 khan cancer natna avangin chatuan ram a pan a, LPS Pro Fight Organising Committee leh Mizoram Boxing Association (MIZBA) chuan channa nasa takah a ngai.
Mizorama television show hlawhtling ber pawl LPS Pro Fight bultan a nih lai leh a hnu zelah pawha thawh hlawk tak, Pu Hnema hian kum 15 chhung MIBZA Medical Commission Chairman nihna a chelh mek laiin khawvel a chhuahsan.
Chaw kawng cancer a ni tih hriat hnu lawkah Christian Medical College Hospital, Vellore-ah inentirin an kal a, a chuap lamah a lo darh nasat hman avangin ICU-a dah nghal ni mah se rei pawh enkawl a nih hmain chhan theih lohvin a kal ta a ni.
Kum 50 mi Pu Hnema hian a nupui Pi Lalramnghaki leh an fanu neih chhun C Lalruapuii a kalsan. 2000 khan a nupui nen inneiin an mahni in leh lo Chanmari, Aizawlah an khawsa a, a fanu hian class XI a zir mek a ni.
NIH Kolkata atanga Homeopathy Doctor a zirchhuah hnuin Health & Family Welfare Department, Government of Mizoram hnuaiah Ayush Doctor hna a thawk a, Department of Ayush-ah Deputy Director niin Mizorama Ayush tilartu a nih rualin Mizoram boxing leh Mizo thalaite tan a theihna a hmang nasa hle.
2003 atanga a thih ni thlengin MIZBA Medical Commission Chairman niin office bearer zinga mi a ni a, hemi hma hian MIZBA Executive member ni tawhin Mizoram boxing hmasawn nan thilpek leh hnuhma a neih tawhte chu hlu tham tak a ni tiin MIZBA President Dr Zorammawia chuan a sawi.
"Kan ui em em a, amah thlaktu hi kan hmu zo ang em tih kan ngaihtuah. Boxing hmasawnna tura a thiltihte hriatreng a ni ang," Dr Zorammawia chuan a ti.
MIZBA Senior Vice President Pu F Lalnienga chuan ze khawng tak nei a nih avangin a ngaihsanawm tih a sawi a : "Thil ti tak tak mi a ni a, pa nep lo takah ka ngai. Ni chu ni, ni lo chu ni lo ti mai chi leh tha tur nia a hriatah chuan mi dang vengthawng lem lova nawr chi a ni a, mi chak tak leh ka ngaihsan zawng tak a ni," a ti.
2009 khan LPS Vision leh MIZBA tangkawpin LPS Pro Fight a buatsaih tan a, Mizoramah boxing boruak tihnunin a awm thar leh. A buatsaihtute beisei phak bakin a hlawhtling a, hetiang dinhmun a thlen theih nana mi pawimawh zingah Pu Hnema a tel.
Hetih hun laia Organising Secretary Pu B Vanlalhruaia chuan Pro Fight buatsaih turin sum an mamawh a, sponsorship an zawnna kawngah harsatna lian tak an tawk tih a sawi. A chhan chu a vawi khatna a nih avangin tute mahin an hrethiam lova sum sen ngamna tur chi a ni em tih hriatthiam a har hle a ni.
Pu Hnema thahnemngaihna zarzovin Ayush Department chu Pro Fight title sponsorship changtu a ni a, show a hlawhtlin em avangin a kum lehah sumdawng lianten sponsorship an ngaihven.
Mahse, Pu Hnema inpekna leh mamawh laia tanpuitu a nih avangin 2010 show-ah pawh Ayush chu a bik takin sponsorship lian ber chang tura ruat sa a ni a, hlawhtling takin Pro Fight neih chhunzawm leh a ni tiin Pu Hruaia chuan a sawi.
Pro Fight Organising Chairman leh LPS Vision Director Pu Lalsawmliana Pachuau chuan : "A uiawm tak zet a, ani hi Pro Fight kan neih tan theihna kawnga mi tangkai ber pawl a ni," a ti.
Pro Fight buatsaih tan a nih lai atanga a vawi sarihna 2017 thlengin Organising Committee member zingah Pu Hnema a tel a, 2016 khan a hmalakna avang bawkin Pro Fight co-sponsor zingah Ayush an tel.
Organising Committee Vice Chairman Pu Vanneihthanga chuan : "LPS Pro Fight kan tih apianga a hnarkaitu leh phur em em thin, sponsorship chungchangah pawh ngam taka kan biak leh kan pur ber thin he ti teh thuta min boralsan hi hrilh a hai. A tel lova Pro Fight buatsaih leh pawh huphurhawm tak a ni," a ti.
Pu Hnema hian sorkar hnuaiah Mizoramin Ayush kal tlanga hriselnain hma a sawn theih nan hmalakna chhinchhiahtlak tak a nei a, Ayush Hospital changtlung tak Thenzawla din a nih theihna tura sulsutu ber a nih bakah, kawng hrang hrangin Mizo thalaiten hma an sawn theihna turin a theihna a hmang.
LPS Vision buatsaih Youth Icon leh Quiz competition-ah Ayush hmingin sponsorship a tihsak a, vawi eng emaw zat Mizoram Volleyball a tanpui bawk.
Mizoram Volleyball General Secretary Pu C Lalrokhuma chuan : "2016 phei kha chuan min tanpui zin tawh em avangin lawmthu sawi let nan MVA Invitation Volleyball Tournament final-ah Khuallian turin kan sawm a, hreh chung chungin tlawmngaih chhuahin khuallian a ni nghe nghe a ni," a ti.
Pu Hnema hi May 8, 2018 (thawhlehni) zan dar 7-ah Mizoram House, Vellore-ah thlahin Chaplain Rev Lalbiaksanga Pachuau chuan hun a hmang.
khawchinin a zir loh avangin Mizorama a ruang luhpui hun tur leh a vui hun tur hriat theih a ni rih lo. Chutih rualin a chenna Chanmari, Aizawlah vui a ni ang a, Chanmari thlanmualah phum zui nghal a ni ang.- Thang Khuma T-a
Post a Comment