Affidavit diklo thehluta puhna chungchanga Pu Lalhriatrenga Chhangte in Serchhip Bialtu MLA leh Chief Minister ni bawk Pu Lalthanhawla laka Case a file kalzelah vawiin khan Serchhip Chief Judicial Magistrate Pu Lalngaihmawia Zote hma ah Chief Minister Pu Lalthanhawla leh Pu Lalhriatrenga Chhangte te an inlan.
He thubuai chungchang hi Chief Judicial Magistrate hmaah sawiho a ni a, Pu Lalhriatrenga Chhangte in Election Affidavit a Pu Lal Thanhawlan kum in ang lo chungchang Case a File chu Limitation Period- kum khat chhunga Complaint siam a nih loh avangin ngaihtuah zui tlak loah ngaiin a hnawl a. Kolkatta New Towna Pu Lal Thanhawla inhmun chungchang erawh kalpui zel tlakah ngaiin a pawm a, Section 125-A of the Representation of the People Act, 1951 hnuaiah Pu Lal Thanhawla chu ‘Charged’ a ni ta a ni. Court leh hun tur atan June ni 25, ruat a ni.
Kumin January ni 17 khan New Serchhip mi, tuna hnathawka Kolkatta awm mek Pu Lalhriatrenga Chhangte chuan kum 2013 MLA General Election neih dawna Affidavit diklo a thehluh chungchangah Serchhip District Court-ah Chief Minister Pu Lal Thanhawla lakah thubuai a thehlut a. Serchhip District Court ah Chief Judicial Magistrate Pu Lalngaihmawia Zote in a lo dawngsawng a, Criminal Complaint hnuaiah he thubuai hi ziahluh a ni.
Pu Lalhriatrenga Chhangte hi a u, Senior Advocate Pu C.Lalramzauva leh Ukil dang 2 - Pu Ramthianghlima leh Pu L.Lalnunsiama ten an tawiawm a, Pu Lalthanhawla hi a Ukil Pu Remsanga Nghak leh Pu Lalthanpuia ten an tawiawm a ni.
Vawiina court-a a inlan tur kal hi court tualah Serchhip a Congress Party Worker thahnem takin an lo hmuak a, Pu Lalhriatrenga Chhangte pawh hi Serchhip a MNF Party Worker ten an tawiawm bawk.
AIR News Aizawl
Post a Comment