May Ni 1, 2018 khan media atang leh Minister of YAS & Water Rsources Shri Letpao Haokip, (Manipur) Press Release kan hmuh angin Manipur Volleyball player/Captain, Sakil Chesam chu April Ni 28, 2018 zan khan 26th Mini National Volleyball Championship(MNVC) Boys Final match Mizoram team leh Manipur team ten R. Dengthuama Hall-a an khelh zawh a khawih (assault) niin hriat a ni a. 

He final match ah hian Manipur team te champion in 1st  Referee decision ah Mizoram team lam chu an lungawilo hle a. Inkhelh zawhah Referee pawh venhim leh hruai hran ngai khawpin a awm a ni. Chutihlai chuan Manipur player hi mi pakhatin alo khawih ta a ni. Medical Report lam atanga a lan danin a khabe ruh hi hmun hnih ah a khi/tliak a. Mizoram leh Manipur damdawiin (Shija Hospitals & Research institute pvt. Ltd) a kalpui a nih hnu ah admit a ni a. Operation leh treatment a lak hnu in May Ni 4, 2018 khan Shija Hospital atanga chhuahtir a ni. Mizoram sawrkar pawhin he thil hi a ngai pawimawh hle a, May Ni 1, 2018 vek khan Minister of UD&PA, Sports etc Pu Zodintluanga pawhin Press Release siamin he thil thleng hi Mizoram mipui leh sawrkarin pawi an tih thu leh pawikhawihtu a dem thu a sawi a. 

Tun hnu ah hetiang thil hi thleng leh tawhlo tura sawrkarin hma alak tur thu leh State dang te nen a kan in unauna tha taka awm zel tura a duh thu a sawi bawk a ni. Hemi chungchang hi hriat a nih veleh, Mizoram Police in Enquiry Officer te ruata uluk taka enquiry tih nghal a ni a. May Ni 7, 2018 khan enquiry report pawh thehluh nghal a ni.

May Ni 1, 2018 ni vek khan Pu C.Lalrokhuma Gen. Secy. Mizoram Volleyball Assn(MVA) & Secretary Organising Committee, 26th MNVC chuan Kulikawn PS ah FIR a thehlut a, Kulikawn PS C/No. 59/18 Dt. 1.5.2018 U/S 325 IPC (Hurt case) ziahluh a ni a, uluk taka chhui chhoh a ni a. He case ah hian thil tisualtu (accused) zawnchhuahna tura finfiahna a tam thei ang ber zawn khawm niin mita hmutu thenkhat te sawi dan in  Sakil Chesam-a khawihtu an hriatdan leh , hmuhdan tlangpui an sawi inangte chu:-
(i) Mipa kum 35 - 45 vel a upa, 
(ii) Sa tha lam deuh 5.5 feet vela sang, 
(iii) Hang lam deuh. khabe hmul nei/zuah, 
(iv) T-shirt dum leh kekawr dum lam ha, 
(v) Lukhum hmathlawk dum lam khum, sam tawi. 
(vi) Witness thenkhat te hian Mizoram team player chhungkhat hnaivai tak emaw anih ngei an ring bawk.
 May Ni 11, 2018 khan rinhlelh thu ah F.Hmingthansanga (37) S/o Thuamliana of Mualpheng, Lalveng chu rinhlelh thuah lak niin thuhretu te atanga finfiahna hrang hrang te lakkhawm a nih hnu ah hengte hi hmuhchhuah a ni:-
(i) April Ni 28, 2018 zana Final match khelhlai a en zan khan T-shirt dum leh kekawr dum a ha a, lukhum hmathlawk dum lam a khum bawk. 
(ii) Feet nga leh inches ruk(5'.6") a sang, pa satha pangngai a ni. 
(iii) Kum 37 a upa, hang lam hmel pu a ni. 
(iv) Khabe hmul a zuah/nei bawk, a sam a tawi 
(v) A fapa Volleyball player chu Mizoram team a khel a ni. 
(vi) 'Min hmutu leh min puhtu an awm tlat chuan a tul leh kan tuar anga a ni mai lawm' tih chu ama sawi dan a ni.

Heng avang hian amah a nih ngei theihna (chance/circumstantial evidences) hi midang aiin a sang lawr lak a ni. Chuvangin amah hi May Ni 15, 2018 ah man (Arrest) a ni a, May Ni 18, 2018 khan Jail ah dah luh niin, investigation tih zawh a nih veleh Court ah Charge sheet submit a ni ang.
-DIPRP

Post a comment

Powered by Blogger.