Ni 21.05.2018 (Thawhtanni) hian Mizo Hnam Runah chhung inkhawm neih a ni a. MNF President Pu Zoramthanga chuan Aizawl East-I atangin mi 9, West-I atangin mi 7, leh South-I atangin 9, a vaiin mi 25 te chu MNF-ah a lawmlut a. Lawmluhte zing atang hian Pu Zosangliana Khiangte h/o Dr. Magaret Z.Khuma, Zemabawk, Pu Herman Sangthankhuma MPS (Rtd), Zonuam leh Pu James H.Lalchungchunga Bethlehem Vengthlang ten thu an sawi.

Zoramthanga thusawiMNF President chuan thusawiin, "Pu Hawla hian thil hre chiang lo takin thu a sawi mai zel a. MNF chu sorkar leh duh luatah ruahmanna awm lovin District 3 siam belh a, School 400 chuang upgrate-ah min puh a. District 3 kan hawn belh kha MNF High Command-in uluk taka kan thlir hnuah Cabinet Meeting-in ngun takin a bih chiang leh a. District pathum kan hawn kha a thu ringwtin a ni lova, Cabinet Resolution leh GAD Govt.of Mizoram record thlap a ni a, tunah hian en leh theihin a la awm vek a ni. District Boundary-te chu a khaw mila la siam remah kan ti a nih kha. Engkim ruahman fel vek a nih hnuah keiin Saitual Dist.ka hawng a, Pu Tawna'n Khawzawl Dist.hawngin Pu Tlanga'n Hnahtial Dist.a hawng a. Khatih lai khan Finance Minister ka ni a, heta tan hian nakum leh a kum leh atana sum hman tur a awmsa tih kan hre vek. Tawngkam chauhin District kha kan hawng ve lo va, ruahmanna felsa vekin kan hawng zawk a ni. Congress an rawn sorkar ta si a, tihpuitlin ngaihna an hre lo mai zawk a ni. An sorkar hmasa tlak dawn a, District thar 5, sum awmsa hauh lova an hawn kha MNF sorkar chuan pangngai takin kan tipuitling vek a ni," a ti.



Pu Zoramthanga chuan, "Zirna lama rualawhna avangin mipuiin pawisa thawhkhawmin ramte an hralh hial a, sikulte dinin zirtirtu hlawh an pe a, an tipuitling tak tak thei si lo a, kha kha phurrit a zawnga khawtlang phurrit nasa a ni si a, chu chu MNF sorkar khan kan khawngaih tur leh kan tih tur a ni tih kan hriat avangin sikul tam tak chu Aided School-ah kan hlangkai a, kan sorkar ang a, tuna mi bak pawh kan la tih belh dawn chauh a, kan hun lai khan zirtirtute hlawh lak theih loh a awm ve ngai lo. IR.Battalion pawh Pu Hawla chuan engmah ngaihtuahna awm lova dinah min puh bawk a. IR.Batallion 4 kan din khan Budget leh thil tul zawng zawng kan ngaihtuahsa vek a, hlawh lak theih loh an nei ngai hek lo. Police Batallion khat pawh din thei lote hian zu an zawrh avangin Police tam tak an boral phah a, Police hna 2000 bawr vel an ti ruak hial a. Pathian leh mipui zarah MNF kan sorkar ang a, Police hnaruakte hi hnawhkhat vekin Batallion thar pawh kan din belh zel dawn. 'Phun phun ula, in phun lungawi a ni mai' tih ang maiin Pu Hawla leh a hote hi kan sorkar laia kan hna thawhah an phun an phun a, anmahni'n hmalakna thar an nei si lo va, 'sorkar hmasa kihhnawk' te an ti thul a, a din hmasatute laka phun phun hi an hna a ni ringawt," a ti a.



MNF President chuan, "Pu Hawla hian sorkar leibat awmzia hi a hrelo niin ka hria, leiba rochun chungchang a sawi fo a. Sorkar leibat (Govt to Goverment) hi chu UT hun lai atanga rawn intan tawh a ni a, kan hun lai khan India rama State leiba nei tlem pathumna kan ni. Keini aiin an sorkar reiin an sorkar ngun zawk a, anmahni leiba hnutchhiah kha a tam zawk daih. Kan hun lai khan saihlum anga nget thei lo leibate kha kan ngai pawimawh a, sorkar hnathawk hlawh te, contract/supply leh Bill reng rengte kha ngai pawimawhin pek theihloh kan nei ve ngai lo. Kan hun lai khan budget kha chawhrualin cheng vbc 525 vel a ni a, tuna an budget vbc 9000 chuang lai a ni tawh a, kan hun lai nen khaikhin chuan a intam hleih hle tawh a ni. Keini chuan budget piah lamah Peace Bonus leh thil dang dangah cheng vbc tam tak development sum atan kan hailut a ni. Tin, Citizen Amendment Bill hi MNF chuan kan duh lo bur a, tih takzetin kan do zel dawn a. India sorkar hian a tihpuitlin loh hram kan duhin kan beisei bawk," a ti.

Inkhawm hi Pu L.Ramkinlova General Secretary-in a kaihruai.

(LALTHANZUALA HNAMTE)
Secretary
Media & Publicity Dept
Mizo National Front
Memo No.MNF/Media/2018/01/229
Dt.21.05.2018.

Post a comment

Powered by Blogger.