Lt. Gen. Nirbhay Sharma Vawiin khan Chief Minister Pu Lal Thanhawla, Mizoram Legislative Assembly Speaker, Cabinet Minister, Deputy Speaker leh sawrkar hotu thenkhatte chuan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu Raj Bhavan-ah an thlah a ni.

Lt. Gen. Nirbhay Sharma chuan Mizorama awm chu nuamin thlakhlehawm viau mah se a chhuahsan a hun tak thu a sawi a. Kum thum liamta chhunga a hun hman dan chu a lungawi thu sawiin, thil tam tak a zir hman thu a sawi a. Mizoramin hma a sawn theih nan a theihtawp a chhuah thin a thu a sawi a ni. Engtik niah emaw chuan Mizoram chu ral ven buk satliah niloin, Asia Chhimchhak khawmualpui leh a piah lam thlenga India kawtchhuah a nih ngei a beisei thu a sawi bawk a ni.

Lt. Gen. Nirbhay Sharma



Vawiin chawhma vek khan Mizoram Ex-Service League-te chuan Mizoram Governor thlahna an nei a, ngaihhruina thilpekte an hlan nghal a ni.

Lt. Gen. Nirbhay Sharma Governor chuan Mizoramah ruihhlo do turin, mipui hriselna atana hma la tur leh midangte Hindi zirtir turin an ni aia pawl chak an awm lo a ti a, khawtlang tana tha taka thawh chhunzawm zel turin duhsakna a hlan a ni.

Chief Minister, Cabinet Minister-te, Deputy Speaker leh sawrkar hotute chuan Mizoram Governor chu Raj Bhavan atangin Thuampui Helipad thleng an thlah a. 1st Bn. MAP leh 3rd Bn. MAP te’n Guard of Honour nen an thlah liam a ni. 

-DIPR

Post a comment

Powered by Blogger.