MNF general secretary R Rohmingliana chuan May 5, Inrinni khan Aizawl Press Club-ah thuthar thehdarhtu-te a kâwm a; Congress kaihhruai sorkarin Chawngte-C huam chhungah zu siamnna (factory) an bun mek niin a sawi a, "Tunah hian hmalak mek a ni a, kumin chhung ngeia zu siam ṭan a nih theih nan hmalakna kalpui mek a ni," a ti.
R Rohmingliana sawi danin, zu factory siamna hmun chu Udalthana Road, Chawngte-C chhunga District Council tuikhuah bulah a ni a, building tur sak zawh tawh a ni. Zu siamna tur khawl chi hrang hrang pawh chah thlen tawh niin, building chhungah dah luh a ni tawh hlawm a, a bun hna (installation) chiah hmabak a ni tawh. A bun hna (installation) thawh nan leh factory atan electric current phase thum a ṭul avangin lak luh dan tur buaipui mek a ni.
Zu factory siam mek hi Chakma Autonomous District Council (CADC) sorkara chief executive member Kali Kumar Tongchongya hun laia bul ṭan a ni tih sawii R Rohmingliana chuan, "Zu factory din hna hi a rûk thei ang bera sorkarin a kalpui avangin mipui hian kan la hre zau lo hle a ni," a ti.
R Rohmingliana chuan, "Congress sorkar chuan zu zawrh mai duh tâwk loin, zu siamna hmunpui, factory hial Mizoram chhung ngeiah din a ni ta mek hi MNF chuan pawi a ti tak zet. Congress sorkar hian zu factory a din mek hi tihlawhtling lo hram tur hian MNF chuan a ngen a ni," a ti a; kohhran leh khawtlang mipuite chu zu factory din mek chu Congress sorkarin a tihtawp theih nan ṭawngṭai turin an ngen tih a sawi bawk.
Post a Comment