Mizote tana Jerusalem chu Mizoram a ni - ZoramthangaMNF President Pu Zoramthanga'n hnam thinlung dotu Congress a chhe dawn a, Mizoram mipui an tho chhuak dawn ta a ti.

Nimina MNF Party inkhawm Mizo Hnam Run-a neihah he thu hi sawiin Pu Zoramthanga chuan Mizote tana Jerusalem chu Mizoram a ni a, Chutianga siam anih theihna tur chuan Mizoram mipuite hnam thinlungah an harh chhuah a ngai a, mipuite erawh an la hmin kim thei lo a, a chhan chu Mizoramah hnam thinlung dodaltu Congress a la lian lutuk a, tun thlengin an la sorkar bawk si a; hnam thinlung dodaltu a chhiat phawt a ngai a ti a, Hetihlai hian, ram pumah an zawmpui an tlachhe chho ta zel a, Mizoramah pawh Congress sorkar a tlachhe ve mek a, tunah chuan hnam thinlungah Mizote an harh tawh dawn a ni, a ti.

Pu Zoramthanga chuan, tuna Mizoram dinhmun chu a chhe hle a, Mizoram kawng zawng zawngte pawh ICU-a awm ang a ni a, thingtlang khaw chengker pawh ni lo Champhai khawpuiah meuh pawh thla 5 hnuah pawh eirawngbawlna Gas an hmu chhunzawm thei lo a. Nationalism tihchhiat tumtu Congress sorkar hnuaiah hian mipui an rum a, an tap a ni, a ti. 

MNF chuan hmathlir a induang fel hle tawh tih sawiin MNF hmalakna tur thenkhat a sawi a, "MNF sorkar chu langtlang sorkar a ni tawh dawn a, langtlang sorkarah chuan corruption pawh automatic-in a insawrzim tawlh tawlh dawn a, tih hleihtheih lohin a awm thuai dawn a ni. Thuneihna semzai (decentralisation of power ) hman a ni dawn a, Society system-a kalin, veng/khuaah village-a thuneitu zawng zawngin an enpui vek tawh dawn a, District level leh State level-ah pawh chutiang vek chu a nih tawh dawn avangin Langtlang sorkar din a ni ang ti. 
Aizawl khawpuia lirthei tawt siamfel nan kawng chhawng siam vek an tum tih sawi bawkin, Motor parking thahnem tak an siam ang a. MNF a sorkar chuan Assam Rifles-te pawh insawn chhuak ngei turin mipuiin an beisei dawn a ni, a ti. An danglamna tur chu chu 'MNF-te chu a neitu dik tak an ni, a dangte hi chu mikhual haw leh mai tur an ni,' " a ti .

-AIR News Aizawl

Post a Comment

Powered by Blogger.